Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 14:1-72

14  E toe lua aso kae fai te Paseka mo te Fakamanatuga o Falaoa sē Faka‵fete. Kae ne salasala a faitaulaga pule mo failautusi ki se togafiti ke puke ei ne latou a Iesu ke tamate,  me ne fai aka faeloa latou penei: “E se ‵tau o fai te mea tenā i te aso o te fakamanatuga i te mea ma fakatupu ei ne tino se fakalavelave.”  I tena nofoatuga i Petania i te fale o Simona te lepela, a koi sagasaga a ia o kai kae fanatu se fafine mo se fagu sausau ne faite mai te nato, kae ‵togi ‵mafa ‵ki. Ne ‵tala ne ia te sausau kae kamata o ‵ligi atu ki luga i te ulu o Iesu.  Ona ko te mea tenei ne fakaasi atu ei te sē fia‵fia o nisi tino i a latou aka eiloa: “Kaia e fakamāumāu ei te sinu manogi tenei?  Me ne mafai o fakatau atu a te sinu manogi tenei ki tupe e sili atu i te 300 tenali,* ko tuku atu ei a tupe ki tino ma‵tiva!” Kae ne kaitaua latou ki tou fafine.  Kae ne fai atu a Iesu: “Tuku malie ei a ia. Kaia e fakalavelave ei ne koutou te fafine tenei? Me ko fai ne ia se mea ‵lei ki a au.  Me e ‵nofo faeloa koutou mo tino ma‵tiva, kae kafai e ma‵nako koutou, e mafai eiloa o fai ne koutou a mea ‵lei ki a latou, ka ko au e se ‵nofo faeloa mo koutou.  Ko fai ne ia a tena mea e mafai o fai o ‵mili toku foitino ki te sinu manogi a koi tuai au o tanu.  Au e fai ‵tonu atu ki a koutou: I so se koga o te lalolagi e talai atu ei te tala ‵lei tenei, ka fakamatala atu foki i ei a te mea ne fai ne te fafine tenei e pelā me se fakamasauaga ki a ia.” 10  Kae ne fanatu a Iuta te Isikaliota, se tokotasi mai te toko sefululua, ki te kau faitaulaga pule ke fakatogafiti ne ia a Iesu kae ke tuku atu ki a latou. 11  I te lagonaga ne latou a te mea tenā, ne fia‵fia ei latou kae tauto atu ke tuku atu ki a ia a tupe siliva e tolusefulu. Ne kamata tou tagata o ‵sala atu ki se taimi ‵lei ke fakatogafiti ei a Ia. 12  I te aso muamua o te ‵kaiga o falaoa sē faka‵fete, ko te taimi e masani o ofo atu i ei ne latou se manu mo fai te taulaga o te Paseka, ne fai atu ana soko ki a ia: “Tefea te koga e manako koe ke fakatoka ne matou ke kai koe i ei i te Paseka?” 13  Ne uga atu ne ia ana soko e tokolua kae fai atu ki a lāua: “Olo ki loto i te fa‵kai kae ka fetaui koulua mo se tagata e amo ne ia se fagu kele e ‵fonu i vai. Tau‵tali la i ei, 14  kae ko so se fale e ulu a ia ki ei fai atu ki te tino i o ia te fale, ‘Muna a te Faiakoga: “Tefea te potu talimalo telā ka ‵kai ei matou mo oku soko i te Paseka?”’ 15  Kae ka fakaasi atu ne ia ki a koulua se potu lasi i luga telā e toka a mea katoa i ei, fakatoka la mō tatou.” 16  Ne olo a soko konei kae oko atu ki te fa‵kai, kae ne maua atu ne lāua a mea katoa kolā ne fai atu ne ia, fakatoka ei ne lāua mō te Paseka. 17  I te afiafi po, olo atu ei a ia mo te toko sefululua. 18  A koi saga‵saga latou i te taipola o ‵kai, kae fai atu a Iesu: “Au e fai ‵tonu atu ki a koutou: E tokotasi i a koutou telā e ‵kai fakatasi māua, ka fakatogafiti ne ia a au.” 19  Ne kamata o fanoa‵noa ana soko kae fai atu latou taki tokotasi ki a ia: “E a, ko au?” 20  Ne fai atu a ia ki a latou: “Ko te tino e tokotasi mai te toko sefululua, telā e tuku fakatasi mā lima ki loto i te pōla. 21  E tonu, a te Tama a te tagata ka fano eiloa keatea, e pelā eiloa mo muna ne tusi e uiga ki a ia, kae kalofa eiloa a te tagata telā e fakatogafiti ne ia te Tama a te tagata! E sili atu moi ne sē fanau mai te tagata tenā.” 22  A koi ‵kai latou, ne puke ne Iesu se falaoa, fai te fakafetai, tofitofi kae tufatufa atu ki a latou, kae fai atu: “Puke; e fakauiga te mea tenei ki toku foitino.” 23  Ne puke aka ne ia se ipu, fai te fakafetai, kae tuku atu ki a latou, kae ne inu katoa latou ki ei. 24  Kae ne fai atu a ia ki a latou: “Ko tena uiga ko toku ‘toto o te feagaiga,’ telā ka ‵ligi ki tua mō tino e tokouke. 25  Au e fai ‵tonu atu ki a koutou: Ka se toe inu eiloa au ki te uaina tenei, ke oko eiloa ki te aso ka inu fakatasi ei au mo koutou ki te uaina fou i te Malo o te Atua.” 26  Fakamuli ifo, i te otiga ne usu ne latou a pese o vikiga, olo ei latou ki te Mauga o Olive. 27  Kae ne fai atu a Iesu ki a latou: “Ka tiaki katoa ne koutou au, me e fai mai te tusi: ‘Ka tamate ne au te tausi mamoe, kae ka mafuta valevale a mamoe i te lafu.’ 28  Kae kafai ko toetu aka au, ka mua atu au i a koutou ki Kalilaia.” 29  Ne fai atu a Petelu ki a ia: “E ui eiloa e tiaki ne latou konei a koe, kae e se mafai eiloa o tiaki ne au a koe.” 30  Ne fai atu a Iesu ki a ia: “Au e fai ‵tonu atu ki a koe i te aso nei, e tonu, i te po eiloa tenei, a koi tuai o tagi fakalua te moa, kae ko oti ne fakafiti fakatolu ne koe au.” 31  Kae ne fai ‵tonu atu a Petelu: “Kafai foki eiloa e ‵tau o ‵mate fakatasi tāua, e se mafai lele eiloa o fakafiti ne au a koe.” Ne fai atu foki penā a nisi soko katoa. 32  Ne oko atu latou ki te koga e igoa ki Ketesemane, fai atu ei a ia ki ana soko: “‵Nofo i konei ke fano au o ‵talo.” 33  Kae ne puke ne ia a Petelu, Iakopo mo Ioane ke olo latou, kae ne kamata ei o mafatia malosi kae fi‵ta tou tagata. 34  Ana muna ki a latou: “Ka mafatia eiloa au ke oko ki te mate. ‵Nofo i konei kae ke matapula‵pula koutou.” 35  Ne tai momea atu a ia ki mua kae fakasiga ifo ki lalo kae ‵talo atu ko te mea ke se oko mai te itula tenā ki a ia, māfai e mafai. 36  Kae ne fai atu a ia: “Apa,* te Tamana, e mafai ne koe o fai a mea katoa. Ke ave keatea te ipu tenei mai i a au. Kae ke se fai te mea e manako au ki ei ka ko te mea e manako koe ki ei.” 37  Ne fanatu a ia ki ana soko kae ne maua atu ne ia a latou e ‵moe. Ana muna ki a Petelu: “Simona, a koe na e moe? E a, e se maua ne koe te malosi o ‵pula i se itula e tasi? 38  Ke tumau i te matapula‵pula kae ‵talo faeloa, ko te mea ke se fakaosoosogina koutou. E manako ki ei te loto, kae ko vāivāi te foitino.” 39  Ne toe foki a ia o ‵talo, kae fai atu ana pati foki eiloa konā. 40  Ne toe foki mai a ia kae toe maua atu ne ia a latou e ‵moe, me ko se ‵pula eiloa olotou mata, kae ne seki iloa ne latou me ne a olotou pati e ‵tau o fai atu ki a ia. 41  Ne toe fanatu a ia ki a latou i te tolu o taimi, ana muna ki a latou: “A koutou e ‵moe kae malo‵lo i se vaegā taimi penei! Ko lava! Ko pili mai te itula! Kiloke! Ka tuku atu eiloa a te Tama a te tagata i se auala faitogafiti ki lima o tino agasala. 42  ‵Tu ki luga; tatou ka olo. Kiloke! A te tino ka fakatogafiti ne ia au ko pili mai.” 43  A koi faipati a ia, kae oko mai a Iuta, se tokotasi o te toko sefululua, fakatasi mo te vaitino mo olotou pelu mo pago, ko tino mai te kau faitaulaga pule, failautusi mo toeaina. 44  Ko oti ne tuku atu ne te tino faitogafiti ki tino konā se fakailoga, ana muna: “A te tino e sogi atu au ki ei, ko ia tenā. Ke puke ne koutou kae takitaki atu fakapagota.” 45  Kae ne fanatu ‵tonu a ia ki a Iesu kae fai atu, “Te Faiakoga!” sogi atu ei ki ei. 46  Ne olo atu latou o puke a Iesu. 47  Kae ne tapale ne se tino e tokotasi i konā a tena pelu, ‵kati ei ne ia te taliga o te pologa a te faitaulaga sili ke tō kea‵tea. 48  Ne fai atu a Iesu ki a latou: “A koutou na e o‵mai mo otou pelu mo ‵pago o puke au e pelā me se tagata ‵faomea? 49  I aso takitasi ne nofo faeloa au i te faletapu fakatasi mo koutou o akoako atu i ei, kae ne seki puke aka eiloa au ne koutou. Kae ko ‵tupu katoa a mea konei ke fakataunu ei a muna i Tusitusiga Tapu.” 50  Ne tiaki a ia ne latou katoa kae ‵tele keatea. 51  Kae ne tautali fakapilipili atu ki a ia se tamataene e pulupulu ki se gatu lino ‵lei, kae ne taumafai latou o puke a ia. 52  Ne tiaki ne te tamataene tenā a tena gatu lino ‵loa kae tele keatea e aunoa mo tena gatu tenā. 53  Ne ‵taki atu ne latou a Iesu ki te faitaulaga sili, kae ne maopoopo mai katoa a faitaulaga pule mo toeaina mo failautusi. 54  Kae ne tautali atu a Petelu i a ia mai se koga tai ‵mao, ke oko eiloa ki te koga ateatea i loto i te fale o te faitaulaga sili. Ne saga‵saga fakatasi a ia mo tavini o te fale o fakavelavela i tafa o se afi ‵ka. 55  Ko te taimi eiloa tenā ne salasala ei a faitaulaga pule mo tino o te Sanetulini kātoa ki ne fakamaoniga e uiga ki a Iesu ko te mea ke tamate ei a ia, kae e seai ne olotou mau ne maua. 56  Ne tuku atu ne tino e tokouke a molimau sē ‵tonu e uiga ki a ia, kae e kese‵kese katoa olotou mau. 57  Ne ‵tu aka foki a nisi tino o tuku atu a molimau sē ‵tonu e uiga ki a ia, olotou muna: 58  “Ne lagona ne matou ana muna konei, ‘Ka lepe ne au ki lalo te faletapu tenei ne faite ne tino kae ka toe fakatu aka ne au se isi faletapu i aso e tolu telā ne seki faite ne tino.’” 59  Kae ne kese‵kese faeloa olotou mau konā. 60  Fakamuli loa, ne tu aka te faitaulaga sili i va o latou kae fesili atu ki a Iesu: “E a, e seai sau tali? Ne a mea konei e molimau mai a tino konei e uiga ki a koe?” 61  Ne nofo filemu a ia kae seai eiloa sena pati ne fai. Ne toe fesili atu te faitaulaga sili ki a ia, ana muna: “A koe ko te Keliso te Tama a te Atua Tapu?” 62  Fai atu ei a Iesu: “Ao, ko au, kae ka lavea ne koutou a te Tama a te tagata e sagasaga i te feitu fakaatamai o te tino i o ia te malosi kae vau foki i kaumana o te lagi.” 63  Ne saesae ne te faitaulaga sili ana gatu kae fai atu: “Kaia e toe ‵sala ei tatou ki nisi molimau? 64  Ko oti ne lagona ne koutou ana muna ma‵sei e uiga ki te Atua. Se a te otou faka‵tau?” Ne taku fakamasei ne latou katoa a ia me e ‵tau eiloa o fakasala a ia ki te mate. 65  Kae ne kamata o popoki a ia ne nisi tino, fakapulou atu ana mata, fusufusu ne latou a ia kae fai atu: “‵Valo mai aka!” I te otiga ne laupāpā ana mata, puke ei ne tavini o te fono famasino a ia. 66  A koi nofo atu a Petelu i te koga ateatea i lalo kae ne vau se pologa fafine a te faitaulaga sili. 67  I te laveaga ne ia a Petelu e fakavelavela i tafa o te afi, ne kilo ‵tonu atu tou fafine ki a ia kae fai atu: “A koe foki ne ‵nofo mo Iesu te Nasaleta.” 68  Kae ne fakafiti a Petelu, ana muna: “E se iloa ne au a te tagata tenā kae e se malamalama foki au i au pati konā e fai mai.” Ne fano ei a ia ki tua. 69  Ne toe lavea a ia i konā ne te pologa fafine kae fai atu ki tino kolā e takatu‵tu ‵pili mai: “Tenei te tino e tokotasi o latou.” 70  Ne toe fakafiti ne tou tagata te mea tenā. Kae mai tua malie ifo ne toe fai atu a tino kolā ne takatu‵tu i konā ki a Petelu: “E tonu eiloa, a koe foki se tokotasi o latou, me i a koe se tino Kalilaia.” 71  Kae ne kamata a ia o kaitaua kae tauto atu: “E se iloa ne au te tagata tenā e fai‵pati koutou ki ei!” 72  I konā foki eiloa ko te moa loa ko tagi i te lua o taimi; ne masaua ei ne Petelu a pati a Iesu kolā ne fai atu ki a ia: “A koi tuai o tagi fakalua te moa, kae ko oti ne fakafiti fakatolu ne koe au.” Ne tagi mautuutu tou tagata.

Fakamatalaga mai lalo

 A te tenali e tasi ko te peofuga o te tino i te aso; a te 300 tenali ko te peofuga o se tino i te tausaga kātoa.
 Se pati i te ‵gana Alamaika telā e fakauiga ki “te tamana.”