Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Maleko 13:1-37

13  I tena fanoga ki tua mo te faletapu kae fai atu tena soko e tokotasi ki a ia: “Te Faiakoga, onoono aka la ki vaegā fatu mo vaegā fale konei!”  Kae ne fai atu a Iesu ki a ia: “E lavea ne koe te ‵lasi o fale konei? E seai se fatu ka moe i luga i te suā fatu kae e se ‵pei katoa ki lalo.”  I te taimi ne sagasaga ei a ia i luga i te Mauga o Olive kae lavea atu ne ia te faletapu, kamata ei a Petelu, Iakopo, Ioane mo Anitelea o fesili atu penei ki a ia:  “Fai mai aka ki a matou, Ka ‵tupu mafea a mea konei, kae se a foki te fakailoga ka iloa ei a te gataga o mea konei?”  Fai atu ei a Iesu ki a latou: “Fakaeteete ke se faka‵se koutou ne se tino.  E tokouke a tino ka o‵mai i toku igoa kae fai mai, ‘Au ko ia,’ kae ka faka‵se ne latou a tino e tokouke.  E se gata i ei, kafai e lagona ne koutou a taua mo tala o taua, ke mo a e ma‵taku koutou; e ‵tau eiloa o ‵tupu a mea konei, kae e seki oko mai te gataga.  “Me ka fai taua te suā atufenua ki te suā atufenua, mo te suā malo ki te suā malo. Ka ‵poko a mafuie ki koga katoa; ka oko mai foki a oge meakai. A mea katoa konei ko te kamataga o puapuaga.  “E pelā mo koutou, ke matapula‵pula koutou. Ka ave koutou ne tino ki fono fakamasino, kae ka ‵ta koutou i loto i sunako. Ka faka‵tu koutou i mua o kovana mo tupu ona ko au, ke fai mo molimau ki a latou. 10  Kae e ‵tau foki o talai muamua atu te tala ‵lei ki atufenua katoa. 11  Kae i te taimi e ‵taki atu ei ne latou ke tuku atu koutou ki te fono, sa manava‵se e uiga ki otou pati ka fai. So se pati e tuku atu ki a koutou i te itula tenā, faipati atu, me e se ko koutou e fai‵pati, kae ko te agaga tapu. 12  E se gata i ei, ka tuku atu ne te tino a tena taina ke tamate, kae ka tuku atu foki ne se tamana a tena tama. Ka ‵teke atu a tama‵liki ki olotou mātua kae tuku atu ke tamate. 13  Ka takalia‵lia a tino katoa ki a koutou ona ko toku igoa. Kae ko te tino telā e loto mau ke oko ki te gataga ka sao eiloa a ia. 14  “Kae kafai ko lavea ne koutou a te mea fakatakalialia telā e ofa ne ia a mea e tu i te koga e se ‵tau o tu i ei (ke na malamalama la te tino faitau), ke na ‵tele atu la a latou kolā e ‵nofo i Iuta ki luga i mauga. 15  Ko te tino i luga i te tuafale ke se fanaifo ki lalo io me fano ki loto o puke se mea mai i tena fale, 16  ko te tino i te fatoaga ke se toe foki ki te fale o puke sena gatu i ei. 17  Kalofa eiloa i fāfine fai‵tama mo fāfine kolā koi faū olotou pepe māfai ko oko mai a aso konā! 18  ‵Talo faeloa ko te mea ke se tupu a te mea tenā i te taimi o te ‵tau ‵moko, 19  me ko aso eiloa konā ko aso o te fakalavelave telā e seki tupu aka eiloa talu mai te kamataga o mea ne faite ne te Atua ke oko atu eiloa ki te taimi tenā, kae ka se toe tupu eiloa se mea penā. 20  A te tonuga loa, moi ne se fakamu‵tana a aso konā ne Ieova, e seai eiloa se tino e sao. Kae ona ko tino filifilia, kolā ko oti ne filifili aka ka fakamu‵tana ei ne ia a aso konā. 21  “Kae kafai foki e fai mai se tino ki a koutou, ‘Kiloke! Tenei a te Keliso,’ io me ‘Kiloke! Tenā a ia,’ sa tali‵tonu ki ei. 22  Me ka ‵sae mai a Keliso ‵loi mo pelofeta ‵loi kae ka fai ne latou a fakailoga ‵lasi mo mea fakaofoofogia ke takitaki ‵se ei a tino, ke oko foki loa ki tino filifilia. 23  Tela la, ke fakaeteete koutou; me ko leva ne fai atu ne au a mea katoa konei ki a koutou. 24  “Kae i aso konā, mai tua o te fakalavelave tenā, ka pouli te la, ka se maina te masina, 25  ka ta‵tela ifo a fetū mai te lagi, kae ka ga‵lulu a mea ma‵losi o te lagi. 26  Kae ka lavea atu ei ne latou a te Tama a te tagata e vau i kaumana mo tena ‵mana mo tena ‵malu sili. 27  Ko uga atu ei ne ia agelu kae ka fakamaopoopo mai ne ia ana tino filifilia mai feitu e fa o te lalolagi, mai toe feitu ‵mao o te lagi mo te lalolagi. 28  “Ke mafaufau ki te akoakoga mai te tala fakatusa e uiga ki te lakau ko te mati: I te taimi e toe ola aka ei ana kaula kae ko kamata o ‵somo aka ana lau, ko iloa ei ne koutou me ko pili mai te ‵tau ‵vela. 29  E penā foki koutou, kafai ko lavea ne koutou a mea konei ko ‵tupu, ko iloa ei ne koutou me ko tu pili atu a ia i otou mataloa. 30  Au e fai ‵tonu atu ki a koutou me ka se palele atu te kautama tenei seiloga ke fakataunu a mea katoa konei. 31  Ka ‵galo atu a te lagi mo te lalolagi, kae ka se mafai o ‵galo aku muna. 32  “E uiga ki te aso tenā io me ko te itula tenā, e seai se tino e iloa ne ia, ke oko ki agelu i te lagi mo te Tama, kae na ko te Tamana fua. 33  Ke matapula‵pula kae mataala, me e se iloa ne koutou te taimi telā ko oti ne fuafuagina. 34  E pelā eiloa me se tagata ne faimalaga ki se isi fenua kae tiakina tena fale kae tuku atu te pule ki ana pologa, ke tofu latou taki tokotasi mo olotou galuega, kae fakatonu atu ki te tino tausi mataloa ke tumau i te matapulapula. 35  Tela la, ke tumau i te matapula‵pula, me e se iloa ne koutou te aso e vau ei te Matai o te fale, me ko te fakaafiafi, io me ko te valuapo io me ko te vaveao io me ko te taeao ‵malu; 36  me kafai e oko fakapoi mai a ia, ke se maua atu ne ia a koutou e ‵moe. 37  Ko aku pati e fai atu ki a koutou e fai atu foki ne au ki tino katoa, Ke tumau i te matapula‵pula.”

Fakamatalaga mai lalo