Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 12:1-44

12  Ne faipati atu foki a ia ki a latou e auala i tala fakatusa: “E isi se tagata ne ‵toki tena togavine. Ne ‵pui ne ia kae keli foki se lua ke tuku i ei te mea ‵tau uaina kae fakatu foki ne ia se taoa i ei. Ne lisi ne ia ki tino fai fatoaga, fano ei a ia ki se isi fenua.  I te okoga ki te ‵tau e tau ei a fuagā vine, uga atu ei ne ia tena pologa ki tino fai fatoaga ke puke mai ne fuagā vine mai i a latou.  Kae ne puke ne latou a ia, ta ne latou, uga atu ei ke fano e aunoa mo se mea.  Ne toe uga atu ne ia te suā pologa ki a latou, kae ne ‵pago ne latou tena ulu kae fakamasiasi ne latou a ia.  Ne toe uga atu ne ia te suā tino, kae ne tamate ne latou a ia, ne toe uga atu foki a tino e tokouke, kae ne ‵ta ne latou a nisi tino a ko nisi tino ne tamate ne latou.  Toe tokotasi eiloa tena tino e ‵toe, ko tena tama fagasele. Ne uga fakamuli atu ne ia ki a latou kae fai aka penei, ‘Ka āva eiloa latou ki taku tama.’  Ne fai aka ei a pati a tino fai fatoaga, ‘Tenei eiloa tena sui; o‵mai ke tamate ne tatou, ko maua ei ne tatou a te togavine telā e ‵tau o maua ne ia.’  Tenā la, puke ei ne latou a ia, tamate, kae ‵pei ki tua mo te togavine.  Ne a la mea ka fai ne te tino i o ia te togavine? Ka fanatu eiloa a ia o tamate a tino fai fatoaga konā kae tuku atu te togavine ki nisi tino. 10  E a, e seki fai‵tau ne koutou a pati konei i te Tusi: ‘A te fatu telā ne tiakina ne tufuga fai fale, ko oti ne fai mo fai te fatu tulimanu tafasili i te aoga. 11  Ne aumai eiloa te mea tenei mai i a Ieova, kae e fakaofoofogia ki a tatou’?” 12  Ona ko te mea tenā, ne ‵sala ne latou se auala ke puke fakapagota ei ne latou a ia, kae ne ma‵taku latou i te vaitino, ona ko te lotou iloa me ne fai ne ia se tala fakatusa e uiga ki a latou. Telā tiakina ei ne latou kae olo keatea. 13  Ne uga atu ne latou ki a ia a nisi Falesaio mo nisi tino o te potukau a Helota, ke ‵po ne latou a ia i ana pati. 14  I te lotou okoatuga, fai atu ei ki a ia: “Te Faiakoga, e iloa ne matou i a koe e faipati ki te mea tonu, kae e se fia saga atu koe ki nisi tino, me e se kilo atu koe ki foliga o tino i tua, kae akoako foki ne koe te mea tonu e uiga ki auala o te Atua: E mata, e saoloto i te tulafono ke ‵togi atu a lafoga foitino ki a Kaisala io me ikai? 15  E ‵tau o ‵togi ne matou io me e se ‵tau o ‵togi?” Ne iloa ne Iesu te lotou togafiti, fai atu ei ki a latou: “Kaia e tofotofo ei ne koutou au? Aumai ki a au se tenali e tasi ke onoono aka au ki ei.” 16  Ne avatu ne latou ki ei se tenali. Fai atu ei a ia ki a latou: “I o oi te ata mo te igoa tenei?” Ne fai atu latou: “I o Kaisala.” 17  Fai atu ei a Iesu: “Toe ‵togi atu a mea a Kaisala ki a Kaisala, a ko mea a te Atua ki te Atua.” Ne ofo masei latou i a ia. 18  Ne olo atu a Satukaio kolā e fai mai me e seai se toetu, kae fesili atu ki a ia: 19  “Te Faiakoga, ne fai mai a Mose ki a matou me kafai e mate se taina o se tagata, e ‵tau o avaga tena taina mo tena avaga ko te mea ke maua se tamaliki ma tena taina. 20  E isi ne tautaina e tokofitu, ne avaga te toekimua kae i te taimi ne mate ei e seai sena tamaliki. 21  Ne avaga te tokolua mo te fafine tenā kae ne mate foki e aunoa mo se tamaliki; kae e penā foki te tokotolu. 22  Kae seai foki se tamaliki a te tokofitu. Fakamuli ifo ne mate ei te fafine. 23  I te taimi o te toetu ko oi la i a latou konei ka fai mo fai te avaga a tou fafine? Me ne a‵vaga katoa a latou mo ia.” 24  Ne tali atu a Iesu ki a latou: “E mata, e se ko te mea tenei e ‵se ei koutou, ko te sē iloa ne koutou a Tusitusiga Tapu io me ko te ‵mana o te Atua? 25  Me i te taimi e toe‵tu aka ei a tino mai te mate, e se toe a‵vaga a tāgata io me e tuku atu a fāfine ke a‵vaga, kae ka fai a latou pelā mo agelu i te lagi. 26  Kae e pelā mo tino ‵mate, ka faka‵tu aka eiloa latou, e a, e seki fai‵tau koutou ki te tusi a Mose, ki te tala e uiga ki te lakau ‵ka, i pati a te Atua ki a ia: ‘Au ko te Atua o Apelaamo mo te Atua o Isaako mo te Atua o Iakopo’? 27  A ia e se ko te Atua o tino ‵mate, a ko te Atua o tino ola. Ko oko eiloa te ‵se o koutou.” 28  E isi se failautusi ne fanatu kae lagona ne ia a latou e kinau; ne iloa ne ia me ne tali atu a ia ki a latou i se auala ‵lei, fesili atu ei a ia: “Se a te ‵toe tulafono sili?” 29  Ne tali atu a Iesu: “Tenei te ‵toe tulafono sili: ‘Faka‵logo mai e Isalaelu, a Ieova ko te ‵tou Atua, ko Ieova fua e tokotasi, 30  kae e ‵tau mo koe o alofa ki a Ieova tou Atua mo tou loto kātoa, mo tou foitino kātoa, mo tou mafaufau kātoa, mo tou malosi kātoa.’ 31  A ko te lua o tulafono, ‘E ‵tau mo koe o alofa ki tou tuakoi e pelā mo koe ki a koe eiloa.’ E seai se mea e sili atu i tulafono e lua konei.” 32  Ne fai atu te failautusi ki a ia: “Te Faiakoga e fetaui eiloa au pati mo te munatonu, ‘E tokotasi eiloa a Ia, kae e seai aka foki se tino i tafa o Ia,’ 33  kae ko te alofa ki a ia mo tena loto kātoa, mo tena mafaufau kātoa, mo tena malosi kātoa, mo te alofa ki tena tuakoi e pelā mo ia ki a ia eiloa, e sili fakafia atu i lō taulaga ‵sunu mo taulaga katoa kolā e ofo atu.” 34  I te iloaga ne Iesu me ne tali atu te tagata tenā mo te poto, fai atu ei ki ei: “Ko se ‵mao koe mai te Malo o te Atua.” Kae ne seki toe ai se tino ne loto toa o fesili atu ki a ia. 35  Kae i te taimi ne akoako atu ei a Iesu i te faletapu, ne fai atu a ia: “Kaia e fai mai ei a failautusi me i a Keliso ko te tama a Tavita? 36  E auala i te agaga tapu, ne fai mai a Tavita, ‘Ne fai atu a Ieova ki toku Aliki: “Nofo i toku feitu fakaatamai ke oko ki te taimi e tuku ei ne au ou fili mai lalo i ou vae.”’ 37  Ne taku ne Tavita a ia ki te Aliki, kae e fai la pefea a ia mo fai tena tama?” Ne fakalogo‵logo atu ki a ia a te vaitino mo te fia‵fia. 38  Kae i ana akoakoga ne fai atu ei a ia: “Ke fakaeteete koutou i failautusi kolā e ma‵nako ke olo sale latou mo olotou gatu ‵loa kae ke fakatalofa atu a tino ki a latou i maketi 39  kae ke ‵nofo latou i nofoga tafa ki mua i sunako mo toe koga ma‵luga i ‵kaiga i afiafi. 40  Ko latou kolā e ‵faomālō ne latou a fale o fāfine ko ‵mate olotou avaga kae ma‵nako ke onoono atu a tino ki olotou ‵talo ‵loa. Ka maua eiloa ne latou konei se fakasalaga telā e ‵mafa atu.” 41  Ne sagasaga a ia ki lalo i te koga telā e lavea ei ne ia a pusa tupe kae ne kamata o onoono atu ki te vaitino kolā e lafo olotou tupe ki loto i pusa tupe, kae e tokouke a tino mau‵mea ne lafo ne latou a tupe siliva e uke. 42  Ne fanatu se fafine mativa ko mate tena avaga kae lafo atu ki ei a tupe fo‵liki e lua kolā e se taulia malosi. 43  Ne kalaga atu a Iesu ki ana soko kae fai atu ki a latou: “Au e fai ‵tonu atu ki a koutou, me e uke atu a tupe ne lafo ne te fafine mativa tenei ko mate tena avaga i lō tupe a tino katoa kolā ne lafo ki loto i pusa tupe. 44  Me ne lafo ne latou katoa konā mai i olotou tupe ‵toe, a ko te fafine tenā ne lafo atu ana mea katoa eiloa e ola ei a ia.”

Fakamatalaga mai lalo