Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 11:1-33

11  I te lotou piliatuga ki Ielusalema ne oko atu foki ki Petefake mo Petania i te mauga o Olive, kae ne uga atu ne Iesu ana soko e tokolua  kae fai atu ki a lāua: “Olo atu ki te fa‵kai tenā i lū mua, kae kafai e oko atu koulua ki ei, ka lavea ne koulua se tamā asini e ‵sai i ei, telā e seki sopo aka eiloa se tino i ei. ‵Tala ko aumai ei.  Kae kafai e fai atu se tino ki a koulua, ‘Kaia e fai ei ne koulua te mea tenā?’ fai atu la penei, ‘E manako ki ei te Aliki, kae ka uga fakavave mai ne ia ki konei.’”  Ne olo atu lāua kae maua atu ne lāua a te tamā asini e ‵sai i te mataloa, i tua o te fale i tafa o te auala, ‵tala ei ne lāua.  Kae ne fai atu a nisi tino kolā ne takatu‵tu i konā ki a lāua: “Kaia e ‵tala ei ne koulua te tamā asini tenā?”  Ne fai atu lāua ki tino konā e pelā eiloa mo pati a Iesu; tuku atu ei ne latou a lāua ke olo.  Ne avatu ne lāua te tamā asini ki a Iesu, kae ‵fola ne latou olotou gatu i luga i te asini, sagasaga ei tou tagata i luga i ei.  Ne ‵fola foki ne tino e tokouke olotou gatu i luga i te auala, a ko nisi tino ne ‵kati ne latou ki lalo a kaula o lakau i tafa o te auala.  Kae ne paka‵laga atu faeloa a latou kolā e olo atu i mua mo latou kolā e olo atu mai tua penei: “Matou e ‵talo ke fakaola a ia! Ke manuia a ia telā e vau i te igoa o Ieova! 10  Ke manuia te Malo o te ‵tou tamana ko Tavita telā ka oko mai! Matou e ‵talo ki a ia telā e nofo i te koga maluga ke fakaola ne ia te tino tenei!” 11  I tena okoatuga ki Ielusalema kae ulu atu ki loto i te faletapu, ne kilokilo atu a ia ki mea katoa, kae ona ko te mea ko leva te taimi, ne olo ei latou mo te tokosefululua ki Petania. 12  I te lotou ologa mai Petania i te suā aso, ne fiakai a ia. 13  A koi tai ‵mao kae lavea ne ia te lakau ko te mati telā e isi ne ana lau. Ne fanatu tou tagata o onoono me isi ne ana fuaga e maua i luga i ei me ikai. I tena okoatuga ki ei, lavea ei ne ia me e seai ne fuaga i ei kae na ko lau fua, me e se ko te ‵tau o mati i te taimi tenā. 14  Fai atu ei tou tagata ki ei: “Ke se toe ai se tino e kai ne ia se fuaga mai i a koe ke oko eiloa ki te se-gata-mai.” A ko ana soko ne fakalogo‵logo atu ki a ia. 15  Ne oko atu latou ki Ielusalema. Ne ulu atu a ia ki loto i te faletapu kae afuli ne ia ki tua a tino katoa kolā e fakatau kae ‵togi olotou mea i ei. Ne tuletule ne ia ki lalo a taipola a tino ‵fuli tupe mo nofoga o latou kolā e fakatau olotou lupe, 16  kae ne seki talia ne ia ke ave ne se tino so se mea i loto i te faletapu. 17  Ne akoako kae fai atu a ia: “E a, e se tusi i te tusi: ‘A toku fale ka fakaigoa ki te fale e fai i ei a ‵talo mō fenua katoa’? Kae ko fai ne koutou te fale tenei mo fai se ana o tino kai‵soa.” 18  Ne lagona ne faitaulaga pule mo failautusi a te mea tenā, kamata ei latou o salasala ki se auala ke tamate ei a ia, me ne ma‵taku latou i a ia ona ko te mea ko oko eiloa i te ofo o te vaitino i ana akoakoga. 19  Kae ne olo latou ki tua o te fa‵kai i te afiafi. 20  Kae i te lotou oloatuga i te taeao ‵malu, lavea ei ne latou te mati ko magemage ke oko ki ana aka. 21  Ne masaua ne Petelu te mea tenā, fai atu ei ki a ia: “Te Faiakoga, kilo atu! a te mati telā ne fetū ne koe ko magemage.” 22  Ne tali atu a Iesu ki a latou: “Fakatuanaki ki te Atua. 23  Au e fai ‵tonu atu ki a koutou me i so se tino e fai atu ki te mauga tenei, ‘Masagi ki luga kae tō ki te tai,’ kae e se fakalotolotolua i tena loto kae e fakatuanaki i ana pati kolā ne fai ka taunu eiloa, ka tupu eiloa te mea tenā. 24  Tenei te pogai e fai atu ei au ki a koutou: A mea katoa kolā e ‵talo kae fakatagi atu koutou ki ei mo te fakatuanaki, ka maua eiloa ne koutou. 25  Kae kafai e ‵tu koutou o ‵talo, fakamagalo atu so se tino telā e ita koe ki ei, ko te mea ke fakamagalo foki ne te otou Tamana telā i te lagi au mea ‵se.” 26*  —— 27  Ne toe ‵foki atu latou ki Ielusalema. A koi sasale atu a ia i loto i te faletapu kae olo atu a faitaulaga pule mo failautusi mo toeaina ki a ia 28  kae fai atu ki a ia: “I o oi te malosi e fai ei ne koe a mea konei? Io me ko oi foki ne tuku atu ne ia te malosi tenā ke fai ei ne koe a mea konei?” 29  Ne fai atu a Iesu ki a latou: “Ka ‵sili atu ne au ki a koutou se fesili e tasi. Kafai ko tali mai ne koutou, ko fakaasi atu ei ne au te malosi e fai ei ne au a mea konei. 30  Taku mai aka, ne aumai i fea te pule a Ioane o papatiso, mai i te lagi io me mai i tāgata?” 31  Ne fakatau tītī olotou manatu i a latou eiloa, kae fai aka penei: “Kafai e fai atu tatou, ‘Mai te lagi,’ kae ka fai mai a ia, ‘Kaia la ne seki tali‵tonu ei koutou ki a ia?’ 32  Kae e se ‵tau eiloa o fai atu tatou, ‘Mai tāgata’?” —Me ne ma‵taku eiloa latou i te vaitino, me e tali‵tonu latou i a Ioane se pelofeta. 33  Tela la, ne tali atu latou ki a Iesu: “E se iloa ne matou.” Ne fai atu a Iesu ki a latou: “E se fakaasi atu foki ne au ki a koutou me ne mafua mai i fea te malosi e fai ei ne au a mea konei.”

Fakamatalaga mai lalo

 Ke onoono ki te fakamatalaga mai lalo i te Mat 17:21.