Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 10:1-52

10  Ne tu aka a Iesu ki luga i konā kae fanatu ki tuakoi o Iuta i te suā feitu o te Iolitana, kae ne toe mumu atu se vaitino ki a ia. E pelā eiloa mo tena masani, ne toe kamata o akoako atu ne ia a latou.  Ne olo atu a Falesaio o tofotofo a ia, kae fesili atu ki a ia me e mata, e saoloto i te tulafono ke ‵tala ne se tagata tena avaga.  Ne tali atu a ia ki a latou: “Ne a fakatonuga a Mose ki a koutou?”  Olotou muna: “Ne talia ne Mose se pepa fakamaoni ke ‵tala ei te avaga.”  Kae ne fai atu a Iesu ki a latou: “Ne tusi atu ne ia te tulafono tenei ki a koutou ona ko te otou loto ma‵keke.  Kae mai te kamataga o faite a mea, ‘Ne faite ne ia te tagata mo te fafine.  Ona ko te mea tenei ka tiaki ei ne te tagata tena tamana mo tena mātua,  ko fai ei lāua mo fai se foitino e tasi, tela la, ko se tokolua lāua a ko fai lāua mo foitino e tasi.  Tenā la, a lāua kolā ko oti ne fakatasi ne te Atua, e se mafai o ‵tala ne se tino.” 10  I te lotou ‵fokiatuga ki te fale, ne fesilisili atu ana soko ki a ia e uiga ki te mea tenei. 11  Kae ne fai atu a ia ki a latou: “So se tagata e ‵tala tena avaga kae toe avaga ki se isi fafine ko agasala a ia i te mulilua ki tena avaga. 12  Kae kafai e ‵tala ne se fafine tena avaga kae toe avaga ki se isi tagata, ko mulilua a ia.” 13  Ne avatu ne tino ki a ia a tama‵liki fo‵liki ko te mea ke fakaeke atu ana lima ki luga i a latou, kae ne ‵liko atu ana soko ki a latou. 14  Ne seki fiafia a Iesu i te laveaga ne ia te mea tenā, fai atu ei ki a latou: “Tuku a tama‵liki ke o‵mai ki a au, kae sa taofigina latou, me i te Malo o te Atua i o tino penā mo latou. 15  Au e fai ‵tonu atu ki a koutou: So se tino e se talia ne ia te Malo o te Atua e pelā me se tamaliki e se mafai eiloa o ulu ki loto i ei.” 16  Ne kopi ne ia a tama‵liki, fakamanuia atu ki a latou kae fakaeke atu ana lima ki luga i a latou. 17  I tena auala o fano kae tele atu se tagata, totuli ifo i ana mua, kae fesili atu ki a ia: “Te Faiakoga ‵lei, ne a mea e ‵tau o fai ne au ke maua ei te ola se-gata-mai?” 18  Ne fai atu a Iesu ki a ia: “Kaia e fai mai ei koe i a au e ‵lei? E seai se tino e ‵lei, e tokotasi fua te tino ‵lei, ko te Atua. 19  E iloa ne koe a tulafono konei, ‘Sa tatino; sa mulilua; sa kaisoa; sa molimau ‵pelo; sa amio fakaloiloi; āva ki tou tamana mo tou mātua.’” 20  Ne fai atu te tagata tenei ki a ia: “Te Faiakoga, ko oti ne tausi ne au a mea katoa konei talu mai te taimi koi talavou ei au.” 21  Ne kilo atu a Iesu ki a ia kae ne alofa ki ei, fai atu ei ki a ia: “E tasi te mea e galo i a koe: Fano o fakatau atu au mea katoa kae tufa atu ki tino ma‵tiva, kae ka maua ne koe a koloa e uke i te lagi, ko vau ei koe o fai mo oku soko.” 22  Kae ne fanoanoa tou tagata i te tali tenā, fano ei keatea mo te fanoanoa, me e uke ana koloa. 23  I te otiga ne kilokilo a Iesu ki ana feitu katoa, fai atu ei ki ana soko: “Ko oko eiloa i te faigata ke ulu atu a tino kolā e uke olotou tupe ki loto i te Malo o te Atua!” 24  Ne ofo masei ana soko i ana pati. Kae ne toe fai atu a Iesu ki a latou: “Aku tama, ko oko eiloa i te faigata a te ulu atu ki loto i te Malo o te Atua! 25  E faigofie atu ke ulu se kamela ki loto i te pu o se nila i lō se tagata maumea ke ulu atu ki loto i te Malo o te Atua.” 26  Ne gasolo aka eiloa o ofo latou kae fai atu ki a ia: “Ko oi la e mafai o sao?” 27  Ne kilo ‵tonu atu a Iesu ki a latou kae fai atu: “E se mafai ne tāgata o fai te mea tenā, kae e se penā eiloa a te Atua, me e mafai ne te Atua o fai a mea katoa.” 28  Ne fai atu a Petelu ki a ia: “Kiloke! Ko oti ne tiaki ne matou a mea katoa kae ne tau‵tali atu faeloa i a koe.” 29  Muna a Iesu: “Au e fai ‵tonu atu ki a koutou: So se tino e tiaki ne ia tena fale, ana taina, ana tuagane io me ko tena tamana io me ko tena mātua io me ko ana tama‵liki io me ko ana manafa ona ko au mo te tala ‵lei 30  ka uke fakafia selau atu ana mea e maua i te vaitaimi tenei—ko fale, taina, tuagane, mātua, tama‵liki, mo manafa, fakatasi mo fakasauaga—kae ka maua foki ne ia i taimi mai mua, a te ola se-gata-mai. 31  Kae e tokouke a tino kolā ne ‵mua ka faka‵muli, kae ko tino kolā ne faka‵muli ka ‵mua.” 32  Ne olo atu latou i te auala ki Ielusalema, a ko Iesu ne mua atu i a latou, kae ne ofo latou. Kae ko tino kolā ne tau‵tali atu i a latou ne kamata o ma‵taku. Ne fakatafa aka ne Iesu te toko sefululua ki se feitu kae fai atu ki a latou e uiga ki mea kolā ka ‵tupu ki a ia: 33  “A tatou e olo ki Ielusalema kae ka tuku atu a te Tama a te tagata ki faitaulaga mo failautusi. Ka fakasala ne latou a ia ki te mate, kae ka tuku atu ne latou a ia ki tino o fenua fakaa‵tea, 34  kae ka fakatauemu latou ki a ia kae popoki kae ta fakamasei ne latou, ko tamate atu ei, kae ka toe fakatu aka a ia mai tua o aso e tolu.” 35  Ne olo atu ki a ia a Iakopo mo Ioane, ko tama ta‵gata e tokolua a Sepetaio, kae fai atu ki a ia: “Te Faiakoga, a māua e ma‵nako ke fai ne koe so se mea e fakatagi atu ei māua.” 36  Ne fai atu a ia ki a lāua: “Se a te mea e ma‵nako koulua ke fai ne au mō koulua?” 37  A lā muna ki a ia: “Talia mai ke ‵nofo māua, e tokotasi i tou feitu fakaatamai kae tokotasi i tou feitu fakamaui i tou tulaga ‵malu.” 38  Kae ne fai atu a Iesu ki a lāua: “E se iloa ne koulua a te mea telā ne fakamolemole mai koulua ki ei. E a, e mafai ne koulua o inu a te ipu telā ko pili o inu ne au, io me papatiso ki te papatisoga telā ka papatiso au ki ei?” 39  Ne tali atu lāua: “E mafai ne māua.” Fai atu ei a Iesu ki a lāua: “Ka inu eiloa koulua ki te ipu telā ka inu au ki ei, kae ka papatiso foki koulua ki te papatisoga telā ka papatiso au ki ei. 40  Kae e seai saku pule ki te tino ka nofo i toku feitu fakaatamai mo toku feitu fakamaui, me i koga konei e ‵nofo fua i ei a tino kolā ko oti ne fakatoka mō latou.” 41  I te ‵logoga a nisi soko e tokosefulu i te mea tenei, ne kamata ei o se fia‵fia latou ki a Iakopo mo Ioane. 42  Kae ne kalaga atu a Iesu ke o‵mai latou ki a ia, kae fai atu ki a latou: “E iloa ne koutou me i a latou kolā e fai pelā me ne takitaki o malo e fai pelā me ne aliki ki luga i tino, kae ko olotou tāgata takutakua e pule fakasaua atu ki a latou. 43  A ko koutou e se ‵tau o fai penā; kae ko so se tino i a koutou e manako ke sili a ia, e ‵tau o fai mo fai te otou tavini, 44  a ko so se tino e fia muamua i a koutou, e ‵tau o fai mo fai te pologa a koutou katoa. 45  Ke oko ki te Tama a te tagata, ne seki vau ke tavini mai a tino ki a ia, kae ke tavini atu ki tino kae tuku atu foki tena ola e pelā me se togiola mō tino e tokouke.” 46  Ne oko atu latou ki Ieliko. Kae i tena ologa mo ana soko mo te vaitino mai Ieliko, ne sagasaga atu i tafa o te auala a Patimaio te tama tagata a Timaio, se tino ‵kivi kae gutu akai. 47  I te lagonaga ne ia me ko Iesu te Nasaleta, kamata ei o pakalaga tou tagata, ana muna: “Te Tama a Tavita, ko Iesu, ke alofa mai koe ki a au!” 48  Kae ne fai atu te vaitino ki a ia ke se uā, kae ne tumau a ia i te pakalaga malosi atu: “Te Tama a Tavita, ke alofa mai koe ki a au!” 49  Ne tu a Iesu kae fai atu: “Ka‵laga ki ei.” Kae ne ka‵laga atu latou ki te tino ‵kivi, kae fai atu ki a ia: “Fakamalosi! Tu ki luga, ko Iesu tenā e kalaga atu ki a koe.” 50  Ne ‵pei keatea tena gatu, tafuke aka a ia ki luga kae fanatu ki a Iesu. 51  Kae ne fai atu a Iesu ki a ia: “Se a te mea e manako koe ke fai ne au mō koe?” Ne fai atu te tino ‵kivi ki a ia: “Laponi,* Faka‵pula aka oku mata.” 52  Ne fai atu a Iesu ki a ia: “Fano. Ko tou fakatuanaki ko ‵lei ei koe.” I konā eiloa ne ‵pula ana mata, kamata ei o tautali atu i a ia i te auala.

Fakamatalaga mai lalo

 Io me ko te “Faiakoga.”