Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Maleko 1:1-45

1  Ko te kamataga tenei o te tala ‵lei e uiga ki a Iesu Keliso:  E pelā eiloa mo muna ne tusi i te tusi a Isaia te pelofeta: “(Kiloke! Ko uga atu ne au taku avefekau ke mua atu i a koe, telā ka fakatoka ne ia tou auala);  Faka‵logo mai! E isi se tino e pakalaga i te koga lavaki, ‘Fakatoka te auala o Ieova! Fai ke ‵tonu ana auala.’”  Ne sae mai a Ioane te Papatiso i te koga lavaki, kae talai atu ne ia te papatisoga e pelā me se fakailoga o te salamō ke fakamagalo ei agasala.  Ona ko te mea tenā, ne ua‵lolo atu ei ki a ia a tino katoa mai i Iuta mo tino katoa i Ielusalema, kae ne papatiso ne ia latou i te vaitafe o Iolitana. Kae ne fakaasi ‵tonu atu foki ne latou olotou agasala.  Ne pei a Ioane ki gatu ne faite ki fulufulu o kamela kae ne ‵sai ana kona ki se fusi ne faite ki pa‵kili o manu, kae ne kai ki sē akelise mo meli vao.  Ne talai atu a ia, ana muna: “E isi se tino ka vau i oku tua telā e sili atu i a au; e se ‵tau mo au o punou ki lalo o ‵tala ana taka.  E papatiso ne au koutou ki te vai, kae ka papatiso ne ia koutou ki te agaga tapu.”  Ko aso eiloa konā ne fanatu ei a Iesu mai Nasaleta i Kalilaia kae ne papatiso a ia ne Ioane i te Iolitana. 10  I tena fanakaga eiloa mai te vai, lavea ei ne ia te lagi ko matala, mo te agaga tapu ko fanaifo ki luga i a ia, e pelā me se lupe. 11  Ne lagona atu ei se leo mai te lagi e fai mai penei: “A koe ko taku Tama, ko taku fagasele; ko oti ne talia ne au a koe.” 12  Ne ave fakavave a ia ne te agaga tapu ki te koga lavaki. 13  Ne nofo a ia i te koga lavaki i aso e fasefulu, ke tofotofo ne Satani. E isi foki ne manu fe‵kai i konā, kae ne fesoasoani atu a agelu ki a Iesu. 14  I te otiga ne puke fakapagota a Ioane, fano ei a Iesu ki Kalilaia o talai te tala ‵lei a te Atua i ei 15  kae fai atu: “Ko oti ne fakataunu te taimi ne fuafuagina, kae ko pili mai te Malo o te Atua. Sala‵mo, kae fakatuanaki ki te tala ‵lei.” 16  I tena sasaleatuga i te tafatai o te Vai o Kalilaia, lavea ei ne ia a Simona mo Anitelea, te taina o Simona, e pei te lā tili i te vai, me i a lāua ne tino faiika. 17  Fai atu ei a Iesu ki a lāua: “Tau‵tali mai i a au, kae ka fai ne au koulua mo fai ne tino faiika ki tino.” 18  Ne tiaki fakavave ne lāua te lā tili kae tau‵tali atu i a ia. 19  Ne momea atu tou tagata ki mua, lavea ei ne ia a Iakopo te tama a Sepetaio mo Ioane tena taina, e ponopono te lā tili i loto i te lotou poti. 20  Ne kalaga atu a ia ki a lāua e aunoa mo te fakatalave. Ne tiakina ne lāua te lā tamana ko Sepetaio mo tino ga‵lue i te poti kae tau‵tali atu i a ia. 21  Ne olo atu ei latou ki Kapanaumi. Ne oko atu ki te Sapati, ulu atu ei a ia ki loto i te sunako o akoako i ei. 22  Ne ofo masei a tino i te auala ne fai ei ana akoakoga, me ne akoako atu tou tagata e pelā me se tino pule, kae e se pelā mo failautusi. 23  Ne nofo foki i te sunako i te taimi tenā se tagata e pukea ne se agaga masei, kae pakalaga atu, 24  ana muna: “Se a tau fekau i a matou, e Iesu, te tino Nasaleta? E a, a koe ne vau o fakaseai matou? E iloa faka‵lei ne au a koe, ko te Tino Tapu a te Atua.” 25  Ne ‵liko ne Iesu a ia, ana muna: “Filemu, kae fano nei ki tua mai i a ia!” 26  I te otiga ne fai ne te agaga masei ke poko te kīkī o te tino tenā kae pakalaga loa ki luga, fano ei ki tua mai i a ia. 27  Ne ofo masei a tino katoa i konā kae fakatau fai‵pati i a latou eiloa, olotou muna: “Se a te mea tenei? Se akoakoga fou eiloa! E nofo foki tou tagata mo te ‵mana ke ‵tuli ne ia a agaga ma‵sei, kae e faka‵logo foki a latou ki a ia.” 28  Ne salalau fakavave atu a te tala tenā e uiga ki a ia ki kogā koga katoa i Kalilaia. 29  Ne tiaki fakavave ne latou a te sunako kae olo atu ki te fale o Simona mo Anitelea fakatasi mo Iakopo mo Ioane. 30  Ne takato i konā te mātua o te avaga a Petelu me e poko ne te fiva, kae ne fakailoa fakavave atu ne latou ki a ia e uiga ki ei. 31  Ne fanatu a Iesu ki tou fafine, puke ki tena lima kae fakatu aka ki luga, ‵lei tena fiva, fesoasoani atu ei a ia ki a latou. 32  I te tōga o te la i te afiafi, ne avatu ei ne tino ki a ia a latou kolā e ma‵saki mo latou katoa kolā e pukea ne temoni. 33  Ne mumu atu a tino katoa o te fa‵kai ki te mataloa o te fale tenā. 34  Ne faka‵lei aka ne ia a tino e tokouke kolā ne pokotia i masaki kese‵kese, ‵tuli ne ia a temoni e tokouke, kae seki talia ne ia ke fai‵pati mai a temoni, me ne iloa ne latou i a ia ko Keliso. 35  Kae i te taeao ‵malu, ne tu aka tou tagata, fanatu ei ki se koga sē logoa o ‵talo i ei. 36  Kae ne ‵sala atu ki a ia a Simona mo nisi tino kolā ne ‵nofo mo ia. 37  I te mauaga ne latou, fai atu ei ki a ia: “A tino katoa kolā e ‵sala ki a koe.” 38  Kae ne fai atu a ia ki a latou: “Tatou ka olo ki se isi koga, ki fa‵kai kolā e ‵pili mai, ko te mea ke talai foki au i ei, me e tenā te pogai ne uga mai ei au.” 39  Fano ei tou tagata, kae talai atu i loto i olotou sunako i Kalilaia kātoa kae afuli keatea ne ia a temoni. 40  Ne fanatu foki ki a ia se tino lepela i konā, totuli ifo kae tagi atu ki a ia, ana muna: “Kafai e manako koe ki ei, e mafai o fai ne koe au ke ‵ma.” 41  Ne ‵fonu te loto o Iesu i te alofa ki a ia. Ne ‵kapa atu tena lima, puke atu ki ei kae fai atu: “Au e manako ke ‵ma koe.” 42  I konā foki eiloa ne ‵lei ei tena lepela kae ne ‵ma foki tou tagata. 43  E se gata i ei, ne uga fakavave ne ia tou tagata ke fano 44  mo ana fakatonuga konei: “Ke mo a e fakailoa ne koe ki se tino se mea e tasi, kae fano o fakaasi atu a koe ki te faitaulaga, kae ofo atu foki a mea kolā ne fakatonu mai ne Mose mō tou faka‵maga, ko te mea ke fai mo fai se molimau ki a latou.” 45  Kae i te fanoga a te tagata tenei, ne fakasalalau valevale atu ne ia te tala tenei i koga katoa, ko se mafai ei ne Iesu o ulu atu ki loto i se fa‵kai, kae ko fano sale fua i koga kolā e se tokouke a tino i ei. E tiga te feitu tenā, ne mumu atu faeloa ki a ia a tino mai koga katoa.

Fakamatalaga mai lalo