Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 9:1-62

9  Ne ‵luku mai ne ia te toko sefululua kae tuku atu ki a latou te ‵mana ke pule i temoni kae ke faka‵lei a masaki.  Uga atu ei ne ia a latou ke olo o talai a te Malo o te Atua kae faka‵lei foki a masaki,  kae fai atu ki a latou: “Ke seai se mea e ave i te malaga, ke seai se tokotoko io me se taga meakai, io me ne falaoa io me ne tupe siliva io me se isi gatu.  I so se fale e ulu koutou ki ei, ‵nofo i konā ke oko eiloa ki te taimi e tiaki ei ne koutou.  Kae ko so se koga e se talia ei koutou ne tino, kafai e olo koutou kea‵tea mo te fa‵kai tenā, tuetue atu a ‵pefu i otou vae ke fai mo molimau ki a latou.”  Olo ei latou i loto i te fenua kātoa mai i tamā fa‵kai ki nisi tamā fa‵kai, o folafola atu te tala ‵lei kae faka‵lei a masaki i koga katoa.  Ne logo a Helota, te pule o te kogā fenua tenā, i mea katoa kolā e ‵tupu, kae ne ‵numi masei tou tagata ona ko te mea e fai mai a nisi tino me ko oti ne toe fakatu aka a Ioane mai te mate,  kae e fai mai a nisi tino me ko Elia telā ko oti ne sae mai, a ko nisi tino e fai mai me ko oti ne tu aka se pelofeta mai aso mua.  Muna a Helota: “Ne ‵kati ne au te ua o Ioane. Ko oi la te tino tenei e logo atu au me e fai ne ia a mea konei?” Tela la, ne fia lavea ne ia a Iesu. 10  I te ‵fokimaiga o ana apositolo, ne fakamatala atu ne latou ki a ia olotou mea katoa ne fai. Ne puke ei ne ia a latou kae olo atu i a latou eiloa ki te fa‵kai e igoa ki a Petesaita. 11  Kae i te iloaga ne te vaitino, tau‵tali atu ei i a ia. Ne atafai a ia ki a latou kae faipati atu ki ei e uiga ki te Malo o te Atua, kae ne faka‵lei ne ia a tino ma‵saki kolā ne ma‵nako ki se faka‵leiga. 12  Ko pili ki te afiafi kae olo atu ana soko kae fai atu ki a ia: “Uga atu te vaitino ke olo ki fa‵kai mo koga tai ‵pili mai ko te mea ke maua se koga mo olotou malo‵lo mo ne meakai ma latou, me i a tatou e ‵nofo atu i se koga ‵mao ‵ki.” 13  Kae ne fai atu a ia ki a latou: “Tuku atu ne koutou ne meakai ke ‵kai ei latou.” Olotou muna: “E seai ne omotou mea, kae na ko falaoa e lima mo ika e lua, seiloga ke olo atu matou o ‵togi mai ne meakai ma tino katoa konei.” 14  Kāti e nofo ki se toko 5,000 tāgata te lotou aofaki. Kae ne fai atu a ia ki ana soko: “Fai atu ke saga‵saga latou i potukau e nofo pelā ki se toko limasefulu.” 15  Ne fai eiloa penā ne latou kae ne saga‵saga ei latou katoa ki lalo. 16  Ne puke ei ne ia a falaoa e lima mo ika e lua, kilo aka ki te lagi, fai te fakafetai, tofitofi ne ia kae tuku atu ki ana soko ke tufa atu ki te vaitino. 17  Tela la, ne ‵kai latou kae ne ma‵kona i ei, kae ko toegā meakai kolā ne fakaputu aka ne faka‵fonu ki ei a tapola e sefululua. 18  Fakamuli ifo, i te taimi ne ‵talo tokotasi ei a ia, ne olo fakatasi atu ana soko ki a ia, kae ne fesili atu a ia ki a latou, ana muna: “Ne a muna a te vaitino me ko oi au?” 19  Ne tali atu latou, olotou muna: “Ko Ioane te Papatiso, a ko nisi tino e fai mai me ko Elia, kae e fai mai nisi tino me se pelofeta i aso mua telā ko oti ne fakatu aka.” 20  Ne fai atu ei a ia ki a latou: “A ko koutou la, se a te otou mau me ko oi au?” Ne tali atu a Petelu ki a ia: “A koe ko te Keliso a te Atua.” 21  Ne fai atu ei ne ia se fakatonuga ‵mafa ke mo a ma fakaasi atu ne latou te mea tenā ki se isi tino, 22  kae fai atu: “E ‵tau o logo‵mae te Tama a te tagata i mea e uke kae ka ‵teke atu ki a ia a toeaina, faitaulaga pule, mo failautusi, kae ka tamate foki a ia, kae ka toe fakatu aka i te tolu o aso.” 23  Ne fai atu ei a ia ki a latou katoa: “So se tino e fia tautali mai i a au, ke se toe mafaufau ki a ia eiloa, amo tena lakau fakasaua* kae tautali mai faeloa i a au. 24  Me ko so se tino e manumanu ki tena ola, ka se maua ne ia, a ko so se tino e galo tena ola ona ko au e toe maua ne ia. 25  Kae se a te aoga ki se tino māfai e maua ne ia te lalolagi kātoa kae e galo atu ei tena ola io me ko ana mea katoa? 26  Me ko so se tino telā e mā i a au mo aku pati, ka mā foki a te Tama a te tagata i te tino tenā i te taimi e vau ei a ia i tena ‵malu mo te ‵malu o tena Tamana mo ana agelu tapu. 27  Kae e fai ‵tonu atu au ki a koutou: ‘E isi ne tino i konei ka se ‵mate seiloga ke lavea muamua ne latou te Malo o te Atua.” 28  E tonu eiloa, me kāti ko te valu o aso mai tua o te faiga o pati konā, puke ei ne ia a Petelu, Ioane, mo Iakopo kae ‵kake aka latou ki luga i te mauga o ‵talo. 29  Kae koi ‵talo a ia kae ne ‵fuli ei a foliga o ana mata kae ne malapu‵lapu mai ana gatu ‵kena. 30  Kae kiloke! e tokolua tāgata e sau‵tala fakatasi mo ia, ko Mose mo Elia. 31  Ne ‵sae aka a lāua konei mo te ‵malu kae ne kamata o sau‵tala latou e uiga ki te taimi ka tiaki ei ne ia te lalolagi, telā e ‵tau o fakataunu ne ia i Ielusalema. 32  Ne ‵moe pala‵pala a Petelu mo ana taugasoa, kae i te taimi ne ala faka‵lei aka ei, lavea ei ne latou tena ‵malu mo te tokolua tāgata e ‵tu i ana tafa. 33  Kae i te taimi ko olo keatea ei a te tokolua konā mai i a ia, fai atu ei a Petelu ki a Iesu: “Te Faiakoga, ko ‵lei aka eiloa ke ‵nofo matou i konei. Ka faka‵tu ne matou i konei a faleie e tolu, e tasi mō koe, e tasi mō Mose, kae e tasi mō Elia.” Kae e seki iloa ne ia ana pati kolā ne fai atu. 34  A koi faipati atu a ia e uiga ki mea konei kae ne fanaifo se kaumana o fakapulou i luga i a latou. I te taimi ne ulu atu ei latou ki loto i te kaumana, ne ma‵taku ei latou. 35  Ne faipati mai se leo i loto i te kaumana, ana muna: “Tenei eiloa taku Tama, ko ia telā ko oti ne filifili ne au. Faka‵logo ki a ia.” 36  I te taimi ne oko mai ei te leo tenā a ko Iesu ko nofo tokotasi fua. Ne ‵nofo fifilemu latou kae ne seki fakamatala atu foki ne latou ki se isi tino i aso konā a mea kolā ne lavea ne latou. 37  I te suā aso, i te taimi ne oko ifo ei latou ki lalo mai te mauga, ne fakafetaui atu ki a latou se vaitino. 38  Kae kiloke! ne pakalaga mai se tagata mai loto i te vaitino, ana muna: “Te Faiakoga, au e fakamolemole atu ke onoono aka koe ki taku tamaliki tagata, me ko ia aka eiloa taku fuatasi, 39  kae kiloke! a ia e pukea ne se agaga masei, e pakalaga fakapoi ki luga, kae fitifiti valevale kae poko tena kīkī kae ‵sali ana suavale, kae e ta ne ia kae faigata o fano keatea ma i a ia. 40  Ne fakamolemole au ki ou soko ke afuli aka te agaga tenā keatea kae ne seki mafai ne latou.” 41  Ne tali atu a Iesu, ana muna: “Te kautama sē fakatuanaki kae fai mea piko‵piko tenei! Ka pefea te leva e fesoasoani kae fa‵ki ei au i a koutou? Aumai tau tama ki konei.” 42  Kae i te taimi ne fanatu ei te tamaliki, ne ‵pei a ia ne te temoni ki lalo kae fai ke poko tena kīkī. Ne ‵liko ne Iesu te temoni kae faka‵lei a te tamaliki, tuku atu ei ne ia ki tena tamana. 43  Ne ofo masei a tino katoa e uiga ki te ‵mana o te Atua. I te taimi koi ofo ei a tino katoa i mea kolā ne fai ne ia, fai atu ei a ia ki ana soko: 44  “Fakalogo‵logo faka‵lei mai kae ke masaua foki a pati konei, me e ‵tau o tuku atu te Tama a te tagata ki lima o tāgata.” 45  Kae ne tumau eiloa te lotou sē malamalama i ana pati konā. E tonu, ne ‵funa aka eiloa a mea konā mai i a latou ko te mea ke se malamalama latou i ei, kae ne ma‵taku latou ma fesili atu ki a ia e uiga ki pati konei. 46  Kae ne kinau latou me ko oi te ‵toe tino sili i a latou. 47  Ne iloa ne Iesu olotou mafaufauga, puke mai ei ne ia se tamaliki, fakatu i ana tafa, 48  kae fai atu ki a latou: “So se tino e talia ne ia te tamaliki tenei ona ko toku igoa, ka talia foki ne ia au, kae ko so se tino e talia ne ia au, e talia foki ne ia a Ia telā ne uga mai ne ia au.” Me ko te tino e fai ne ia a ia e pelā me se tino sē taulia i a koutou katoa, ko ia tenā e tafasili i te maluga.” 49  Ne tali atu a Ioane: “Te Faiakoga, ne lavea ne matou se tagata e afuli ne ia a temoni i tou igoa, kae ne taumafai matou o ‵vao a ia, me i a ia e se tautali mai i a matou.” 50  Kae ne fai atu a Iesu ki a ia: “Sa taumafai koutou o ‵vao a ia, me ko so se tino telā e se ‵teke ki a koutou e kau mo koutou.” 51  I te taimi ko pili ei o fanaka a ia ki te lagi, ne malosi eiloa tena loto ke fanatu a ia ki Ielusalema. 52  Ne uga atu ne ia a avefekau ke ‵mua atu i a ia. Ne olo atu latou kae oko atu ki se fakai foliki o tino Samalia, ke fai i ei a fakatokatokaga mō ia. 53  Kae ne seki talia ne latou a ia me ko oti ne fakaiku aka ne ia ke fanatu a ia ki Ielusalema. 54  I te laveaga ne te avā soko, ko Iakopo mo Ioane a te mea tenei, fai atu ei lāua: “Te Aliki, e manako koe ke fai māua ki te afi ke fanaifo mai te lagi o fakaseai atu latou?” 55  Ne mafuli aka tou tagata kae ‵liko atu ki a lāua. 56  Olo atu ei latou ki se isi fa‵kai foliki. 57  A koi olo atu latou i te auala kae fai atu se tino ki a ia: “Au ka tautali atu i a koe i so se koga e fano koe ki ei.” 58  Fai atu ei a Iesu ki a ia: “E isi ne lua o alope, a ko manu eva e isi ne olotou ofaga, ka ko te Tama a te tagata e seai sena fale mo ana nofo.” 59  Ne fai atu tou tagata ki te suā tino: “Vau o tautali mai i a au.” Muna a te tagata tenā: “Tuku mai mua au ke fano o tanu toku tamana.” 60  Kae ne fai atu a Iesu ki a ia: “Tuku ei a tino ‵mate ke tanu olotou tino ‵mate, kae fano koe o folafola atu te tala ‵lei e uiga ki te Malo o te Atua ki koga katoa.” 61  Ne toe fai atu se isi tino: “Ka tautali atu au i a koe, e te Aliki, kae talia mai ke fakatofa muamua au ki tino o toku kāiga.” 62  Muna a Iesu ki a ia: “E seai se tino e puke tena lima ki se mea fakamalū laukele, kae toe kilo ki mea i ana tua, e aoga mō te Malo o te Atua.”

Fakamatalaga mai lalo

 Ke onoono ki te Mataupu Fakaopoopo e 7.