Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 8:1-56

8  Mai tua malie ifo i ei, ne faimalaga atu a Iesu mai fa‵kai ‵lasi ki nisi fa‵kai ‵lasi, e pelā foki mo fa‵kai fo‵liki ki nisi fa‵kai fo‵liki, o talai kae folafola atu te tala ‵lei e uiga ki te Malo o te Atua. Kae ne fakatasi atu foki te toko sefululua ki a ia,  mo nisi fāfine kolā ko oti ne fakasaoloto mai i agaga ma‵sei kae faka‵lei aka foki olotou masaki kese‵kese. Ne aofia i ei ko Malia telā e fakaigoa ki te Makatala, telā ne o‵mai ki tua mai i a ia a temoni e toko fitu;  Ioana te avaga a Kusa, te tino pule a Helota, Susana; mo nisi fāfine e tokouke kolā ne fakaaoga olotou kope totino ke tavini atu ki a latou.  I te maopoopomaiga o se vaitino fakatasi mo tino kolā ne olo atu ki a ia mai i fa‵kai takitasi, ne faipati atu ei a ia i te faiga o se tala fakatusa:  “E isi se tino ‵toki lakau ne fano o ‵toki ana fuaga. I te taimi ne ‵toki ei ana fuaga, ne ta‵tela atu a nisi fuaga i tafa o te auala kae ne lakalaka ne tino, kai ei ne manu eva o te lagi.  A ko nisi fuaga ne ‵to atu ki te koga fatufatua, kae i te lotou olaakaga, mage‵mage atu ei ona ko te seai o ne vai.  Ne ‵to atu foki a nisi fuaga i va o lakau makai‵kai kae i te olaakaga o lakau makai‵kai ne ola sai‵tia ei a fuaga.  Ne ‵to atu a nisi fuaga ki te laukele ola ‵lei, kae i te lotou olaakaga, ne ‵fua mai ei i taki selau.” I te faiatuga ne ia a pati konā, kalaga atu ei a ia: “A te tino telā e isi ne ana taliga, ke na fakalogo la ki ei.”  Ne kamata o fesili atu ana soko ki a ia me se a te uiga o te tala fakatusa tenā. 10  Ne tali atu a ia: “Ko oti ne talia ke malamalama koutou i mea ‵funa kae tapu o te Malo o te Atua. Kae e faipati au ki nisi tino e auala i tala fakatusa, me e tiga eiloa e ‵kilo atu ki ei kae e se lavea ne latou, e tiga eiloa e lagona ne latou kae e se iloa ne latou tena uiga tonu. 11  Tenei la te uiga o te tala fakatusa tenā: A te fuaga ko te Muna a te Atua. 12  A fuaga i tafa o te auala ko latou kolā ko oti ne lagona ne latou te muna a te Atua, kae ne fanatu te Tiapolo, ave ei ne ia keatea te muna mai i olotou loto ko te mea ke se tali‵tonu latou kae ke se ‵sao foki. 13  A fuaga i te koga fatufatua ko latou kolā ne lagona ne latou te muna mo te fia‵fia, kae e seai ne olotou aka. Ne tali‵tonu latou i se vaitaimi toetoe, kae i te taimi e tofotofo ei, ‵to atu ei latou keatea. 14  A ko fuaga kolā ne ‵to atu i va o lakau makai‵kai, ko latou kolā ne lagona ne latou te muna, kae ne ‵saga atu latou ki manavasega, koloa mo fakafiafiaga o te olaga tenei, ko ola sai‵tia ei latou kae e seai ne fuaga ‵lei e ‵fua mai i a latou. 15  A ko fuaga i te laukele ola ‵lei, konei la a tino kolā ne lagona ne latou te muna mo te loto ‵lei, tausi ne latou kae ‵fua mai mo te lotomau. 16  “E seai se tino e faka‵ka ne ia se moli kae pulou atu ki se pōla io me e tuku mai lalo o se moega. E tuku ne ia ki luga i te tugamoli ko te mea ke lavea ne tino kolā e ulu mai ki loto, a te mainaga. 17  Me e seai se mea ‵funa e se fakaasi. E seai foki se mea e ‵funa faka‵lei ka se mafai lele o iloa kae e se tuku faka‵sau mai ki tua. 18  Tela la, ke ‵saga tonu atu ki te auala e fakalogo‵logo ei koutou. Me ko te tino telā e isi ne ana mea ka toe tuku atu ki a ia a nisi mea, ka ko te tino telā e seai ne ana mea, ka tapale foki mai i ei a nai mea kolā e nofo mo ia.” 19  Ne olo atu ki a ia a tena mātua mo ana taina, kae ne seki oko atu latou ki a ia ona ko te tokouke o tino. 20  Kae ne fakailoa atu penei ki a ia: “A tou mātua mo ou taina kolā e ‵tu i tua kae e fia fai‵pati ki a koe.” 21  Ne tali atu a ia ki a latou: “A toku mātua mo oku taina ko latou konei e lagona ne latou te muna a te Atua kae e fai ne latou.” 22  I te suā aso, ne ‵sopo latou mo ana soko ki te poti, kae fai atu a ia ki a latou: “Tatou ka olo ki te suā feitu o te vai.” Ne olo ei latou. 23  Ka koi tele atu te lotou poti kae tō tena moe. Ne poko te kau matagi kae ne kamata o ‵fonu te lotou poti i te vai. Ne oko atu foki i ei ki se tulaga fakamataku. 24  Fakamuli loa ne olo atu latou o ‵fagu a ia, olotou muna: “Te Faiakoga, te Faiakoga, a tatou ko pili o ‵mate!” I te taimi ko ala faka‵lei ei a ia, ne ‵liko ne ia te matagi mo te sou o te tai, malū ei te matagi mo te tai. 25  Fai atu ei a ia ki a latou: “Tefea te otou fakatuanaki?” Ne ma‵taku kae ofo latou, fai aka ei olotou pati i a latou eiloa: “Ko oi la te tino tenei, me e fakatonu foki ne ia te matagi mo te tai, kae ne faka‵logo ki a ia?” 26  Ne oko atu latou ki uta i te fenua ko Kelasa, i te suā feitu o Kalilaia. 27  I tena fanakaga ki uta, fetaui ei a ia mo se tagata mai te fa‵kai telā e pukea ne temoni. Ne seki pei eiloa a ia ki gatu i se taimi leva ‵ki, kae ne seki nofo eiloa a ia i se fale, kae nofo fua i tanuga. 28  I te laveaga ne ia a Iesu ne pakalaga tou tagata ki luga kae fai atu penei: “Kaia e fakalavelave mai ei koe ki a au, e Iesu, te Tama a te Atua Tafasili i te Maluga? Au e fakamolemole atu ke se fakapuapuaga ne koe au.” 29  (Me ko oti ne fakatonu atu a Iesu ki te agaga masei ke fano keatea mai te tagata tenā. Ne ulufia a ia ne te temoni i se taimi leva ‵ki, kae ko saisai fakafia a ia ki seni mo pikifao kae leoleo foki ne tino, kae ne ‵motu ne ia a seni kae afuli atu ne te temoni ki koga ‵mao.) 30  Ne fesili atu a Iesu ki a ia: “Ko oi tou igoa?” Ana muna: “Ko Lekeono,” me e tokouke a temoni ne ulu atu ki loto i a ia. 31  Kae fakatagi atu faeloa latou ke se afuligina latou ki te lua ‵poko. 32  E isi se lafu puaka e kai‵kai i luga i te mauga, ne fakatagi atu ei latou ki a ia ke uga atu latou ki loto i puaka konā, kae ne talia ne ia. 33  Ne olo ei keatea a temoni mai te tagata tenā kae ulu atu ki loto i puaka konā. Ne ‵tele fakavave atu ei te lafu puaka ki te kaugutu o te mauga, ‵to ei ki lalo i te vai, ma‵lemu atu i ei. 34  I te laveaga ne tino fagai puaka a te mea tenā, ne ‵tele atu ei latou o fakailoa atu ki tino i te fa‵kai mo te fenua kātoa. 35  Ne olo atu ei a tino o onoono ki te mea telā ne tupu, kae ne olo atu latou ki a Iesu. Ne maua atu ei ne latou te tagata telā ne olo ki tua a temoni mai i ei, e pei ki gatu ‵lei kae ko ‵lei foki tena mafaufau, e sagasaga i lalo i vae o Iesu, kae ne ma‵taku ei latou. 36  Ne fakamatala atu ki a latou ne tino kolā ne lavea ne latou te mea tenā a te auala ne faka‵lei aka ei te tagata telā ne pukea ne temoni. 37  Ne fakamolemole atu ei te vaitino mai fenua i tafa o Kelasa ki a Iesu ke fano keatea mai i a latou, me ne ma‵taku ‵ki latou. Ne sopo a Iesu ki te poti, olo ei latou keatea. 38  Ne fakamolemole atu faeloa te tagata telā ne olo keatea a temoni mai i ei ke tautali atu a ia i a Iesu, kae ne seki talia ne ia, ana muna: 39  “Toe foki ki tou fale, kae tumau i te fakaasi atu a mea kolā ne fai ne te Atua mō koe.” Ne fano ei tou tagata kae folafola atu i te fa‵kai kātoa a mea kolā ne fai ne Iesu mō ia. 40  I te fokiatuga a Iesu, ne fakafetaui atu te vaitino ki a ia mo te fia‵fia, me ne fakatali‵tali eiloa a latou ki a ia. 41  Kae ne fanatu foki se tagata e igoa ki a Iailo. Ko ia ko te ofisa tausi o te sunako. Ne fakasiga ifo a ia ki vae o Iesu kae fakatagi atu ki a ia ke fanatu ki tena fale 42  me e isi sena tama fafine eiloa e tokotasi telā kāti ko sefululua ana tausaga, kae ko pili o mate. I tena auala o fanatu, ne mumu atu ei te vaitino ki a ia. 43  Kae e isi se fafine telā ne ‵tafe tena sua i tausaga e sefululua kae e seai eiloa se faka‵leiga ne maua ne ia mai se tino. 44  Ne fanatu ei tou fafine i ana tua kae fakapatele atu ki te kapa o te gatu o Iesu, kae ne gata fakavave ei te ‵tafe o tena sua. 45  Fai atu ei a Iesu: “Ko oi ne patele mai ki a au?” I te fakafitiga ne latou katoa, fai atu ei a Petelu: “Te Faiakoga, a te vaitino konā eiloa e mumu atu i ou tafa kae e fakatauteke atu i ou tua.” 46  Kae ne fai atu a Iesu: “E isi se tino ne patele mai ki a au me ne iloa ne au te fanoga o te ‵mana keatea mai i a au.” 47  I te iloaga ne ia i a ia ko se mafai o ‵muni, ne fanatu ei te fafine mo te polepole, fakasiga ifo i ana mua kae fakaasi atu i mua o tino katoa te pogai ne fakapatele atu ei a ia ki a Iesu, mo te ‵leiga fakavave o tena masaki. 48  Kae ne fai atu a ia ki tou fafine: “Taku tama, ko ‵lei tou masaki ona ko tou fakatuanaki. Vau o fano mo te filemu.” 49  A koi faipati a ia kae oko atu se sui o te ofisa tausi o te sunako, kae fai atu: “Ko oti ne mate tau tama. Sa toe fakalavelave atu ki te Faiakoga.” 50  I te lagonaga ne Iesu te mea tenā, fai atu ei: “Sa mataku, fakatuanaki fua koe, kae ka toe ola a ia.” 51  I tena okoga ki te fale, ne seki talia ne ia se tino ke ulu mo ia ki loto kae na ko Petelu, Ioane, Iakopo mo te tamana mo te mātua o te tamaliki fafine. 52  Ne ‵tagi mautuutu a tino katoa i te fanoa‵noa ona ko te tamaliki fafine. Fai atu ei a Iesu: “Sa ‵tagi, me i a ia e seki mate kae e moe fua.” 53  Ona ko ana pati konei, ne ‵kata fakatauemu ei a latou ki a ia, me ne iloa ‵lei ne latou i te tamaliki ko mate eiloa. 54  Ne puke ne ia te lima o te tamaliki kae kalaga atu, ana muna: “Te tamaliki fafine, tu ki luga!” 55  Ne toe ola* aka ei a ia, kae tu fakavave ki luga. Ne fakatonu atu ei a Iesu ke tuku atu ne ana mea ke kai. 56  Ne fia‵fia malosi i ei ana mātua, kae ne fakatonu atu a Iesu ki a lāua ke mo a eiloa e fakaasi atu ki se tino a te mea telā ne tupu.

Fakamatalaga mai lalo

 Io me ko te “malosi ola.” I te ‵gana Eleni, pneuʹma. Ke onoono ki te Mataupu Fakaopoopo e 8.