Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 7:1-50

7  I te otiga o ana pati kolā ne ‵tau o fai atu ki tino, fanatu ei a ia ki Kapanaumi.  E isi se pologa a te pule o te kautau, telā e pele ki a ia, e masaki kae ko pili o mate.  I te taimi ne logo ei a ia e uiga ki a Iesu, uga atu ei ne ia a toeaina Iutaia o fakamolemole atu ki a ia ke vau o faka‵lei aka tena pologa.  Kae ko latou kolā ne olo atu ki a Iesu ne kamata o fakatagi atu, olotou muna: “A ia se tino telā e ‵tau eiloa o maua ne ia tou fesoasoani,  me ko ia eiloa ko alofa ki te ‵tou fenua kae ne fakatu foki ne ia te sunako mō matou.”  Ne fanatu ei a Iesu i a latou. Ko tai pili atu a ia ki te fale kae uga atu ne te pule o te kautau ana taugasoa ke fai atu ki a ia: “Tou ‵malu, sa vau, me i a au e seai soku aoga ke ulu mai ei koe ki loto i toku fale.  Ko te pogai eiloa tenā ne seki fanatu ei au ki a koe. Kae fai aka fua sau pati, ko ‵lei ei taku tavini.  Me i a au foki se tagata e isi saku pule, o pule ki luga i sotia. E fakatonu atu au ki se sotia, ‘Fano!’ ko te mea eiloa ko fano, kae ki te suā sotia, ‘Vau!’ ko te mea eiloa ko vau, kae ki taku pologa, ‘Fai te mea tenei!’ ko te mea eiloa ko fai ne ia.”  I te lagonaga ne Iesu a mea konei, ne ofo a ia i te tagata tenā. Ne ‵fuli atu ei a ia ki te vaitino kolā ne tau‵tali atu i a ia kae fai atu: “Au e fai atu ki a koutou: E seai eiloa se tino i Isalaelu kai maua ne au, e lasi penei tena fakatuanaki.” 10  Kae i te ‵fokiatuga ki te fale a latou kolā ne uga atu, maua atu ei ne latou a te pologa ko ‵lei. 11  Fakamuli ifo, ne faimalaga atu ei a ia ki se fa‵kai e igoa ki a Naina, kae ne ma‵laga fakatasi atu a ia mo ana soko mo se vaitino. 12  I tena piliatuga ki te mataloa o te fa‵kai, kiloke! e isi se tino mate e amo mai, ko te tama tagata eiloa e tokotasi a tena mātua. I tafa i ei, a ia se fafine ko mate tena avaga. E tokouke foki a tino o te fa‵kai ne o‵mai fakatasi mo tou fafine. 13  I te taimi ne lavea atu ei ne te Aliki a te fafine, ne alofa malosi a ia ki tou fafine, kae fai atu ki ei: “Sa tagi.” 14  Ne fanatu a ia, puke atu ki te moega telā e sau ei te tino mate, kae ne ‵tu a tino kolā e amo ne latou. Ne fai atu ei a ia: “Te tamataene, au e fai atu ki a koe: Tu ki luga!” 15  Ne nofotu aka te tino mate, kae ne kamata o faipati, tuku atu ei ne Iesu ki tena mātua. 16  Ne ma‵taku katoa latou, kae ne kamata o tavae atu ki te Atua, olotou muna: “Ko oti ne fakatu aka se pelofeta sili mai i a tatou,” kae “Ko oti foki ne saga mai te Atua ki ana tino.” 17  Kae ne salalau atu te tala tenei e uiga ki a ia i Iuta mo fenua katoa i ana tafa. 18  Ne lipoti atu ne soko o Ioane a mea katoa konei ki a ia. 19  Ne kalaga atu ei a Ioane ki ana soko e tokolua kae uga atu ki te Aliki ke fai atu ki a ia: “A koe ko te Tino telā ka vau, io me koi faka‵tali matou ki se isi tino?” 20  I te lotou okoatuga ki a ia, fai atu ei a tāgata konā: “Ne uga mai māua ne Ioane te Papatiso ke fai atu ki a koe, ‘A koe ko te Tino telā ka vau, io me e faka‵tali matou ki se isi tino?’” 21  I te itula foki tenā ne faka‵lei ei ne ia a masaki e uke, masaki ma‵sei, mo tino e pukea ne agaga ma‵sei kae faka‵pula atu foki a mata o tino ‵kivi. 22  Tela la, tali atu ei a ia ki te tokolua konā: “Olo o fakailoa atu ki a Ioane a mea ne lavea kae lagona ne koulua: A tino ‵kivi ko lavea ne latou a mea, a tino vae ma‵sei ko sa‵sale, ko faka‵magina a lepela, a tino ‵tuli ko ‵logo olotou taliga, ko toe faka‵tu mai a tino ‵mate, kae ko folafola atu te tala ‵lei ki tino ma‵tiva. 23  Kae ka fiafia a te tino telā e se siga ona ko au.” 24  I te ologa o avefekau a Ioane, fai atu ei a Ia ki te vaitino e uiga ki a Ioane: “Se a te mea ne fia lavea ne koutou i te koga lavaki? E mata, se mouku loa telā e agi valevale ne te matagi? 25  Se a la te mea ne fia lavea ne koutou? E mata, se tagata e pei ki gatu ‵gali? A tino kolā e ‵pei ki gatu ‵gali kae e ola e pelā me ne tino mau‵mea, e ‵nofo i palesi o tupu. 26  Se a la te mea ne fia lavea ‵tonu ne koutou? Se pelofeta? E tonu, au e fai atu ki a koutou, a ia tenā e sili fakafia atu i se pelofeta. 27  Ko ia eiloa tenei ne tusi mai e uiga ki ei: ‘Kiloke! Ka uga atu ne au taku avefekau ke mua atu i a koe, telā ka mua atu o fakatoka tou auala.’ 28  Au e fai atu ki a koutou: E seai se tino i tino kolā ko oti ne fa‵nau mai e sili atu i a Ioane, kae ko te ‵toe tino malalo i te Malo o te Atua e sili atu i a ia.” 29  (Kae i te lagonaga ne tino katoa mo tino ao lafoga a te mea tenei, ne fakaasi mai ei ne latou i te Atua e amiotonu, me ko oti ne papatiso latou i te papatisoga a Ioane. 30  Kae ne seki fia ‵saga atu a Falesaio mo tino ‵poto i te Tulafono ki pati fakatonutonu a te Atua ki a latou, me i a latou e seki papatiso ne Ioane.) 31  “Ko oi la ka faka‵tusa ne au ki ei a tino o te kautama tenei, kae ko oi a tino e ‵pau mo latou? 32  E ‵pau latou mo tama‵liki fo‵liki kolā e saga‵saga i te maketi kae e fakatau paka‵laga atu ki a latou eiloa, kae fai atu: ‘Ne fakatagi ne matou te pu mō koutou, kae ne seki ‵saka koutou. Ne ‵tagi mautuutu matou, kae e se ‵tagi fanoa‵noa koutou.’ 33  E penā foki te vauga a Ioane te Papatiso, ne seki kai a ia ki falaoa io me inu ki uaina, kae fai mai koutou: ‘E isi se temoni i a ia.’ 34  Kae ne vau te Tama a te tagata e kai kae inu, kae e fai mai koutou: ‘Kiloke! a te tagata tenei se tino gafula kae inu uaina, se taugasoa o tino ao lafoga mo tino agasala!’ 35  Kae e fakatalitonugina te poto o te tagata e auala i ana tama‵liki.* 36  Kae ne ‵kami faeloa a ia ne se Falesaio e tokotasi ke ‵kai fakatasi lāua. Ne ulu atu ei a ia ki loto i te fale o te Falesaio kae sagasaga i te taipola. 37  Kae ne iloa ne se fafine telā e lauiloa i te fa‵kai tenā me se tino agasala, me i a Iesu e nofo o kai i te fale o te Falesaio, fanatu ei a ia mo se fagu sausau manogi. 38  Ne vau a ia mai i ana tua kae totuli ifo i ana vae. Ne tagi tou fafine kae ne ‵sofi ifo ana loimata ki vae o Iesu kae ‵solo ne ia ki ana laulu. Ne sogi atu foki ki ana vae kae ‵mili ne ia ki te sausau manogi. 39  I te laveaga ne te Falesaio telā ne ‵kami ne ia tou tagata, a te mea tenei, fai aka ei ana mafaufauga: “Kafai a te tagata tenei se pelofeta, e ‵tau o iloa ne ia me ko oi te fafine telā e puke atu ki a ia, me i a ia se fafine agasala.” 40  Ne fai atu ei a Iesu ki a ia: “Simona, e isi se mea e fia fai atu ne au ki a koe.” Ana muna: “Te Faiakoga, fai mai la!” 41  “E tokolua tāgata ne kaitalafu tupe i se tino; e tokotasi te tino ne kaitalafu ne ia te 500 tenali, a ko te suā tino e limasefulu tenali. 42  I te taimi ko se mafai ei ne lāua o ‵togi a lā kaitalafu, ne fakamagalo ei ne ia a lāua tokolua?” Tela la, ko oi la te tino i a lāua konā ka alofa malosi atu ki a ia?” 43  Ne tali atu a Simona: “Kāti la ko ia telā e lasi tena kaitalafu.” Ana muna ki a ia: “E tonu koe.” 44  Ne ‵fuli atu ei a ia ki te fafine kae fai atu ki a Simona: “E lavea ne koe te fafine tenei? Ne ulu mai au ki tou fale; ne seki tuku mai ne koe ne vai ke ‵fulu ei oku vae. Kae ne faka‵siu ne te fafine tenei oku vae ki ana loimata kae ‵solo ne ia ki ana laulu. 45  Ne seki sogi mai koe ki a au; kae ko te fafine tenei, talu mai te taimi ne ulu mai ei au ki loto, ne sogi faeloa a ia ki oku vae. 46  Ne seki ‵mili ne koe toku ulu ki se sinu, kae ne ‵mili ne te fafine tenei oku vae ki se sausau manogi. 47  Ona ko te mea tenei, au e fai atu ki a koe, e tiga eiloa te uke o ana agasala kae ko oti katoa ne fakamagalo ona ko te lasi o tena alofa. Kae ko te tino telā e foliki tena mea e fakamagalo, e foliki foki tena alofa.” 48  Ne fai atu ei a ia ki te fafine: “Au agasala ko magalo.” 49  Ne ma‵natu ifo ei a tino kolā e ‵kai mo ia i te taipola: “Ko oi la te tagata tenei e fakamagalo ne ia a agasala?” 50  Kae ne fai atu a ia ki te fafine: “Ko oti ne fakasao koe ne tou fakatuanaki; fano la mo te filemu.”

Fakamatalaga mai lalo

 Io me “i mea kolā e fua mai i ei.”