Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 6:1-49

6  I te Sapati e tasi ne fanatu a ia i loto i se fatoaga saito, kae ne tau ei ne ana soko a kaufui saito o kai, kae milimili ne latou ki olotou lima.  Kae ne fai atu ei a nisi Falesaio: “Kaia e fai ei ne koutou te mea telā e tapu i te Sapati?”  Kae ne tali atu a Iesu ki a latou: “E a, e seki fai‵tau koutou ki te mea ne fai ne Tavita i te taimi ne fia‵kai ei a ia mo ana tāgata?  I te taimi ne ulu ei a ia ki loto i te fale o te Atua o puke a falaoa kolā ko oti ne ofo atu ki te Atua, kai ne ia kae tuku atu a nisi mea ki ana tāgata, ko mea kolā e se saoloto ke kai ki ei se tino kae na ko faitaulaga fua?”  Fai atu ei a ia ki a latou: “A te Tama a te tagata ko te Aliki o te Sapati.”  I se isi Sapati, ne ulu atu a ia ki loto i te sunako kae kamata o akoako atu. Kae e isi se tino i konā e ‵mate tena lima fakaatamai.  Ne lamalama tou tagata ne failautusi mo Falesaio i te mea ma faka‵lei ne ia se tino i te Sapati, ko te mea ke maua ne latou se pogai ke ‵losi atu ei ki a ia.  Kae ko leva ne iloa ne ia olotou mafaufauga, fai atu ei a ia ki te tagata e ‵mate tena lima: “Tu ki luga kae vau ki te kogaloto.” Ne tu aka ei a ia i te koga tenā.  Fai atu ei a Iesu ki a latou: “E mata, e saoloto i te Sapati ke fai se mea ‵lei io me se mea masei, ke fakasao io me tamate se tino?” 10  I te otiga ne kilokilo atu ki a latou katoa, fai atu ei a ia ki te tagata tenā: “‵Fola mai tou lima.” Ne fai eiloa ne ia te mea tenā, ko te mea eiloa ko ‵lei tena lima. 11  Kae ne kaitaua masei ou tāgata, kae ne kamata o fai‵pati latou me se a te mea ka fai ne latou ki a Iesu. 12  I aso eiloa konā, ne fanaka ei a ia ki luga i te mauga o ‵talo i ei, kae ne ‵talo atu a ia ki te Atua i te po kātoa tenā. 13  Kae i te taeaoakega, ne kalaga atu a ia ki ana soko kae ne filifili ne ia mai i a latou te toko sefululua, kae fakaigoa foki ne ia ki apositolo. 14  Ko Simona, telā ne fakaigoa foki ne ia ki a Petelu; Anitelea tena taina; Iakopo; Ioane; Filipo; Patolomaio; 15  Mataio; Toma; Iakopo te tama a Alefaio; Simona telā e fakaigoa ki te tino loto finafinau; 16  Iuta te tama a Iakopo; mo Iuta te Isikaliota, telā ne fai mo fai te tino faitogafiti. 17  Ne fanaifo a ia ki lalo fakatasi mo latou kae tu i se koga laugatasi, kae e tokouke foki ana soko mo se vaitino mai i Iuta kātoa mo Ielusalema mo kogā koga i te tafatai o Tulo mo Saitonu, kolā ne o‵mai o fakalogo‵logo ki a ia kae ke faka‵lei foki olotou masaki. 18  Ke oko foki ki tino kolā ne fakalavelavegina ne agaga ma‵sei ne ‵lei katoa. 19  Kae ne taumafai a te vaitino kātoa o fakapa‵tele atu ki a ia me ne fano ki tua te ‵mana mai i a ia kae ne ‵lei ei latou katoa. 20  Ne kilo aka ana mata ki ana soko kae fai atu: “E fia‵fia a koutou kolā e ma‵tiva, me i o koutou te Malo o te Atua. 21  “E fia‵fia a koutou kolā e fia‵kai nei, me ka ma‵kona eiloa koutou. “E fia‵fia a koutou kolā e ‵tagi nei, me ka ‵kata koutou. 22  “E fia‵fia koutou māfai e takalia‵lia a tino ki a koutou, māfai e ‵tuli ne latou a koutou, e fakatauemu atu ki a koutou kae taku fakamasei otou igoa ona ko te Tama a te tagata. 23  Ke eva koutou mo te fia‵fia i te aso tenā, me kiloke! a te otou taui e lasi ‵ki i te lagi, me konā foki a mea ne fai sale ne olotou tupuga ki pelofeta. 24  “Kae kalofa eiloa i a koutou tino mau‵mea, me konā aka eiloa a mea ka maua ne koutou. 25  “Kalofa eiloa i a koutou kolā e ma‵kona nei, me i a koutou ka fia‵kai. “Kalofa eiloa i a koutou kolā e kata‵kata nei, i a koutou ka fanoa‵noa kae ‵tagi mautuutu. 26  “Kalofa eiloa i a koutou māfai e tavaegina koutou ne tino katoa, me konā eiloa a mea ne fai ne olotou tupuga ki pelofeta ‵loi. 27  “Kae e fai atu au ki a koutou konei e fakalogo‵logo mai: Ke tumau koutou i te a‵lofa ki otou fili, kae fai mea ‵lei ki a latou kolā e takalia‵lia ki a koutou, 28  ke fakamanuia atu ki a latou kolā e fetū ne latou a koutou, kae ‵talo mō latou kolā e fakamasei ne latou a koutou. 29  Kafai e ‵pa ne se tino a tou kalafou e tasi, tuku atu foki te suā kalafou, kae kafai e ave ne se tino a tou gatu i tua, tuku atu foki ki ei tou gatu ‵tao loto. 30  Tuku atu ki tino katoa kolā e akai atu ki a koe, kae sa toe fai ke aumai au mea kolā ko oti ne puke ne se tino. 31  “Tela la, a mea katoa kolā e ma‵nako koutou ke fai atu ne tino ki a koutou, ke fai foki ne koutou ki a latou. 32  “Me kafai e a‵lofa koutou ki tino kolā e a‵lofa atu ki a koutou, se a la tena aoga ki a koutou? Me i tino agasala e a‵lofa foki ki tino kolā e a‵lofa ki a latou. 33  Kae kafai e fai ne koutou a mea ‵lei ki a latou kolā e fai foki ne latou a mea ‵lei ki a koutou, se a la tena aoga ki a koutou? E fai foki ne tino agasala a mea konā. 34  Kafai foki e fakakaitalafu au tupe ki tino kolā e fakamoemoe koe ke toe maua mai a mea mai i ei, se a la tena aoga ki a koutou? E fakakaitalafu foki ne tino agasala olotou tupe ki tino agasala ko te mea ke toe maua mai olotou mea katoa. 35  I lō te fai penā, ke tumau koutou i te a‵lofa ki otou fili kae fai te mea ‵lei kae fakakaitalafu atu e aunoa mo te fakamoemoe ke toe maua mai ne mea, kae ka lasi ‵ki te otou taui; kae ka fai koutou mo fai a tama a te Tino Tafasili i te Maluga, me e atafai a ia ki tino sē loto fakafetai mo tino ma‵sei. 36  Ke tumau i te loto fakamagalo, e pelā eiloa mo te otou Tamana e loto fakamagalo. 37  “E se gata i ei, sa fakamasino atu kae ka se fakamasinogina koutou, sa fakamasei a nisi tino kae ka se fakamaseigina koutou. Tumau i te fakamagalo atu kae ka fakamagalogina koutou. 38  Fakamasani o tuku atu ki nisi tino kae ka tuku atu ne tino ki a koutou. Ka ‵ligi atu ne latou ki otou gatu se fua ‵lei, e teke ke ī ki lalo, e lulugina, kae ma‵ligi foki ki tua. Me ko te fua telā e fua atu ne koutou, ka fua mai foki ki a koutou.” 39  Ne fai atu foki ne ia se tala fakatusa ki a latou: “E mata, e mafai ne se tino ‵kivi o takitaki te suā tino ‵kivi? E mata, ka se ‵to tokolua atu lāua ki te lua? 40  E se sili atu te tamaliki akoga i tena faiakoga, kae ko tino katoa kolā e akoakogina faka‵lei ka fai foki pelā mo olotou faiakoga. 41  Kaia la e saga ei koe ki te mouku i te mata o tou taina kae se lavea ne koe te potu lakau i tou mata? 42  E mafai pefea o fai atu koe ki tou taina, ‘Taina, ke ‵seu aka ne au te mouku tenā i tou mata,’ kae e se kilo atu koe ki te potu lakau i tou mata? A koe se tino loi! ‵Seu muamua te potu lakau i tou mata, ko lavea faka‵lei ei ne koe te auala ke ‵seu ei keatea te mouku i te mata o tou taina. 43  “Me e seai se lakau ‵lei e fua mai i ei a fuaga ma‵sei, e seai foki se lakau masei, e fua mai i ei a fuaga ‵lei. 44  Me e iloa a lakau takitasi i olotou fua. E pelā mo tino e se tau ne latou a mati mai lakau makai‵kai, io me e tau ne latou a fuagā vine mai lakau tala‵tala. 45  E aumai ne se tino ‵lei a mea ‵lei mai koloa ‵lei i tena loto, kae e aumai ne te tino masei a mea ma‵sei mai i ana koloa ma‵sei, me e faipati mai ne te gutu a mea kolā e ‵fonu i tena loto. 46  “Kaia la e ka‵laga mai ei koutou ki a au te Aliki! te Aliki! kae e se fai ne koutou a mea kolā e fai atu ne au? 47  A tino katoa kolā e o‵mai ki a au kae e lagona ne latou aku muna kae fai ne latou, ka fakaasi atu ne au ki a koutou a te tino e ‵pau mo ia: 48  A ia e pelā me se tagata telā e faite tena fale, ne keli ne ia ke ‵poko ki lalo kae fakatakato tena fakavae i luga i te papa. Fakamuli ifo i te okomaiga o te lofiaga, ne ‵tafe atu te vaitafe ki luga i te fale tenā, kae seki lava tena malosi o fakagasue ne ia, me ne ‵lei eiloa tena faitega. 49  I te suā feitu, a ia telā e lagona ne ia kae se fai se mea, e fai pelā me se tagata e faite tena fale i luga i te laukele e aunoa mo se fakavae. Ne ‵tafe atu ki ei te vaitafe, kae ne siga fakavave ei kae ne lasi ‵ki te fakamaseiga ki te fale tenā.”

Fakamatalaga mai lalo