Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 4:1-44

4  Ne tiaki ne Iesu te Iolitana, kae ko ‵fonu a ia i te agaga tapu. Ne takitaki atu a ia ne te agaga tapu i te koga lavaki  i aso e fasefulu ko te mea ke tofotofo ei a ia ne te Tiapolo. E se gata i ei, ne seki kai eiloa a ia ki se mea i aso konā, kae oti aka loa ne lagona ne ia te fiakai.  Ne fai atu te Tiapolo ki a ia: “Kafai a koe se tama a te Atua, fai ki fatu konei ke liu falaoa.”  Kae ne tali atu a Iesu ki a ia: “E tusi i te tusi: ‘E se ko meakai fua e ola ei te tino.’”  Ne ave a ia ki luga kae fakaasi atu ki a ia a malo katoa o te lalolagi nofoaki i se taimi toetoe.  Ne fai atu te Tiapolo ki a ia: “Ka avatu ne au ki a koe a te pule i luga i mea katoa konei mo olotou ‵malu, me ko oti ne tuku mai ki a au te pulega i luga i ei, kae e mafai o tuku atu ne au ki so se tino e manako au ki ei.  Tela la, kafai e tapuaki fakatasi mai fua koe ki a au, ka maua eiloa ne koe a mea katoa konei.”  Ne tali atu a Iesu ki a ia: “E tusi i te tusi: ‘E ‵tau o tapuaki koe ki a Ieova tou Atua kae ko ia fua e ‵tau o tavini koe ki ei.’”  Ne toe ave ne ia tou tagata ki Ielusalema kae fakatu ne ia i te ‵pui maluga o te faletapu kae fai atu ki a ia: “Kafai a koe se tama a te Atua, eva ki lalo mai konei, 10  me e tusi i te tusi: ‘Ka fakatonu ne ia ana agelu ke puipui ne latou a koe, 11  kae ka sapai ne latou koe i olotou lima, ko te mea ke se pakia sou vae i se fatu.’” 12  Ne tali atu a Iesu ki a ia: “Kae e tusi foki i te tusi: ‘E se ‵tau o tofotofo ne koe a Ieova tou Atua.’” 13  I te otiga o fakaosoosoga katoa konei, tiaki ei ne te Tiapolo a ia ke oko ki se isi taimi ‵lei. 14  Ne foki atu a Iesu ki Kalilaia e auala i te malosi o te agaga tapu. Kae ne salalau atu a tala ‵gali e uiga ki a ia i koga katoa i konā. 15  Ne kamata foki o akoako atu a ia i olotou sunako kae ne fakaaloalo a tino katoa ki a ia. 16  Ne foki atu a ia ki Nasaleta, ko te koga ne tupu aka ei a ia. Kae e ‵tusa mo tena masani i te Sapati, ne ulu atu a ia ki loto i te sunako, kae tu aka o faitau. 17  Ne tuku atu ki a ia te pelugā tusi a te pelofeta ko Isaia, kae ne ‵tala ne ia te pelugā tusi ki te koga telā e tusi ei a pati konei: 18  “Ko i luga i a au te agaga o Ieova, me ne fakaeke ne ia au o folafola atu te tala ‵lei ki tino ma‵tiva; ne uga ne ia au o talai atu te fakasaolotoga ki pagota mo te faka‵pulaga o mata o tino ‵kivi, o fakasaoloto a tino loto mafatia, 19  o talai atu te taimi o te loto ‵lei o Ieova.” 20  Ne pelu ne ia te pelugā tusi, tuku atu ki te tino tausi, kae sagasaga ki lalo. Ne faka‵toka atu a mata o tino katoa i te sunako ki a ia. 21  Fai atu ei a ia ki a latou: “Ko fakataunu i te aso nei a mea i te tusi telā ne fatoa fakalogo‵logo koutou ki ei.” 22  Kae ne kamata o avatu ne latou se molimau ‵lei e uiga ki a ia. Ne ofo masei latou i te ‵gali o pati kolā ne ‵to mai i tena gutu, kae fai aka ei olotou muna: “E se ko ia tenei te tama a Iosefa?” 23  Fai atu ei a ia ki a latou: “E seai se fakalotolotolua me ka fakauiga ne koutou a pati konei ki a au: ‘Te tokita, ke faka‵lei ne koe a koe eiloa. A mea kolā ne lagona ne matou e ‵tupu i Kapanaumi, ke fai foki ne koe i tou fa‵kai tonu.” 24  Kae ne fai atu a ia: “Au e fai ‵tonu atu ki a koutou me e seai se pelofeta e talia ne tena fenua tonu. 25  E fai ‵tonu atu au ki a koutou: E tokouke a fāfine ko ‵mate olotou avaga i Isalaelu i aso o Elia, i te taimi ne ‵pono ei te lagi i tausaga e tolu mo te ono masina, telā ne oko atu ei te oge lasi ki te fenua kātoa. 26  Kae ne seki uga atu a Elia ki se fafine e tokotasi i a latou konā. Ne uga atu ki se fafine ko mate tena avaga i Salefata i te fenua ko Saitonu. 27  E tokouke foki a lepela i Isalaelu i taimi o te pelofeta ko Elisaia; kae e seai se tino i a latou ne faka‵magina, kae na ko Namanu fua mai Sulia.” 28  A ko tino kolā ne ‵nofo i te sunako ne kaitaua i te lagonaga ne latou a mea konā. 29  Ne ‵tu aka ou tāgata ki luga kae ave fakavave ne latou a ia ki tua o te fa‵kai, kae ‵taki atu ki te feitu o te mauga telā e tu ei te lotou fa‵kai, ko te mea ke ‵pei ne latou a ia ki lalo. 30  Kae ne ulu atu a ia i va o latou, fano ei keatea. 31  Ne fanatu a ia ki Kapanaumi, se fa‵kai i Kalilaia, kae akoako atu ki a latou i te Sapati. 32  Ne ofo masei latou i te auala ne fai ei ana akoakoga, me ne akoako atu a ia e pelā me se tino e i a ia te pule. 33  Kae e isi se tagata i te sunako e nofo i a ia se agaga, se temoni masei, kae ne pakalaga atu ki luga i se leo lasi: 34  “Aaa! Se a tau fekau i a matou, e Iesu, te tino Nasaleta? E a, a koe ne vau o fakaseai matou? E iloa faka‵lei ne au a koe, ko te Tino Tapu a te Atua.” 35  Ne ‵liko ne Iesu a ia, ana muna: “Filemu, kae fano nei ki tua mai i a ia.” Kae i te otiga ne ‵pei ne te temoni a te tagata tenā ki lalo, fano ei ki tua te temoni mai i a ia e aunoa mo te fakalogo‵mae atu ki ei. 36  Ne ofo masei a tino katoa i te mea tenā, kae fai aka olotou pati i a latou eiloa: “Ne a vaegā pati konei, me e maua ne ia te pule mo te malosi ke fakatonu ne ia a agaga ma‵sei, kae e olo eiloa latou ki tua?” 37  Ne salalau atu faeloa i ei a tala e uiga ki a ia ki feitu e fa o te fenua kātoa. 38  I tena fanoga ki tua mo te sunako, ulu atu ei a ia ki loto i te fale o Simona. A te mātua o te avaga a Petelu e maluga tena fiva, kae ne fakamolemole atu latou ki a Iesu ke fesoasoani atu ki tou fafine. 39  Ne tu atu a ia i ana mua kae faka‵lei ne ia tena fiva, ko te mea eiloa ko ‵lei. Ne tu fakavave aka tou fafine ki luga kae fesoasoani atu ki a latou. 40  Kae i te ‵toga o te la, avatu ei ne tino katoa ki a ia a tino kolā e ma‵saki i masaki kese‵kese. Mai te fakaekeatuga o ana lima ki luga i a latou taki tokotasi, ‵lei ei latou. 41  Ne olo kea‵tea foki a temoni mai i tino e tokouke, kae paka‵laga atu, olotou muna: “A koe ko te Tama a te Atua.” Kae ne ‵liko atu a ia ki a latou kae seki talia ne ia a temoni konā ke fai‵pati, me ne iloa ne latou i a ia ko te Keliso. 42  I te okoga ki te ao, fano ei a ia ki tua ki se koga sē logoa. Kae ne kamata o ‵sala atu te vaitino ki a ia kae ne oko atu latou ki te koga telā e nofo ei a ia. Ne taumafai ei latou o taofi a ia ke mo a e fano keatea mai i a latou. 43  Ne fai atu a ia ki a latou: “E ‵tau foki o folafola atu ne au te tala ‵lei o te Malo o te Atua ki nisi fa‵kai, me tenā eiloa te mea ne uga mai ei au.” 44  Fano ei a ia o talai atu i sunako i Iuta.

Fakamatalaga mai lalo