Luka 24:1-53
24 I te aso muamua o te vaiaso, ne olo atu ei latou ki te tanuga a koi ‵malu mo mea fakama‵nogi kolā ne fakatoka ne latou.
2 Ne maua atu ei ne latou a te fatu ko oti ne fakateka keatea mai te tanuga,
3 kae i te lotou uluatuga ki loto ne seki maua ne latou i ei a te foitino o te Aliki ko Iesu.
4 A koi ‵numi latou i te mea tenei kae ne ‵tu atu i olotou tafa a tāgata e tokolua e ‵pei ki gatu malapu‵lapu.
5 Ne ma‵taku ou fāfine kae punou faeloa olotou mata ki lalo, telā ne fai atu ei a tāgata konā ki a latou: “Kaia e ‵sala ei ne koutou te Tino ola mai tino ‵mate?
6 [[A ia e se nofo i konei, me ko oti ne toe fakatu aka.]] Ke masaua ana pati kolā ne fai atu ki a koutou a koi nofo a ia i Kalilaia,
7 me e ‵tau eiloa o tuku atu te Tama a te tagata ki lima o tino agasala ke ‵tuki ki te lakau kae ka toetu aka a ia i te tolu o aso.”
8 Ne masaua ei ne latou ana pati,
9 kae ne toe ‵foki atu latou mai te tanuga kae fakailoa atu a mea katoa konā ki te toko sefulutasi mo nisi soko katoa.
10 A latou konā ko Malia te Makatala, mo Ioana, mo Malia te mātua o Iakopo. Ne fai atu foki ne nisi fāfine kolā ne olo mo latou, a mea konei ki apositolo.
11 Kae ne foliga atu olotou pati ki a latou me e se ne tala ‵tonu, kae ne seki tali‵tonu latou ki fāfine konā.
12 [[Kae ne tu aka a Petelu ki luga, tele atu ki te tanuga, kae i tena fatioatuga, ne lavea fua ne ia a litaga i ei. Fano ei a ia kae mafaufau me se a te mea ko oti ne tupu.]]
13 Ko te aso eiloa tenā ne faima‵laga atu ei se tokolua i a latou ki se tamā fa‵kai, e igoa ki a Emau, telā kāti e fitu maila tena ‵mao mai i Ielusalema,
14 kae ne sau‵tala ei lāua ki mea katoa kolā ko oti ne ‵tupu.
15 A koi sau‵tala lāua ki ei kae ne fakasae atu a Iesu ki a lāua, sa‵sale fakatasi ei latou;
16 kae e se iloa eiloa ne lāua me ko tou tagata.
17 Ana muna ki a lāua: “Ne a mea konā e sau‵tala koulua ki ei?” Ne ‵tu ei lāua mo te mata fanoa‵noa.
18 Ne tali atu te tino e igoa ki a Kaleopa kae fai atu ki a ia: “E a, ko koe fua tokotasi e nofo i Ielusalema kae e se iloa ne koe a mea kolā ko oti ne ‵tupu i ei i aso konei?”
19 Kae ne fai atu a ia ki a lāua: “Ne a mea konā?” A lā muna ki a ia: “Ko mea e uiga ki a Iesu te Nasaleta, telā ne fai mo fai se pelofeta kae ne ma‵losi ‵ki ana galuega mo ana pati i mua o te Atua mo tino katoa,
20 mo te auala ne tuku atu ei ne ‵tou faitaulaga pule mo tino pule ke fakasala a ia ki te mate kae ‵tuki ki te lakau.
21 Kae ne fakamoe‵moe matou me tenei eiloa te tagata telā ko oti ne fakatoka ke fakasao ne ia a Isalaelu; e tonu, kae i tafa o mea katoa konei, tenei fua te tolu o aso talu mai te taimi ne ‵tupu ei a mea konei.
22 E se gata i ei, ne ofo foki matou i omotou nisi fāfine, me ne olo atu latou ki te tanuga a koi ‵malu
23 kae ne seki maua ne latou tena foitino. Ne ‵foki mai kae fai mai me ne lavea foki ne latou a agelu kolā ne fai mai i a Iesu ko toe ola.
24 E se gata i ei, ne olo atu foki a nisi o omotou tino ki te tanuga, kae ne maua atu ne latou me e ‵tonu a mea kolā ne fai mai ne fāfine konā, kae ne seki lavea ne latou a ia.”
25 Fai atu ei a ia ki a lāua: “Ko oko eiloa koulua i te va‵lea kae fui tali‵tonu ki mea katoa kolā ne fai mai ne pelofeta!
26 E a, ne seki ‵tau o puapuaga a te Keliso i mea konei ko te mea ke ulu atu a ia ki loto i tena tulaga tafasili i te ‵malu?”
27 Ne fakamatala atu ei ne ia a mea e uiga ki a ia i Tusitusiga Tapu, e kamata mai i a Mose mo te kau Pelofeta katoa.
28 Ko tai pili atu latou ki te tamā fa‵kai telā ne faima‵laga atu lāua ki ei kae ko ia e pelā me e faimalaga atu ki se koga tai ‵mao atu.
29 Kae ne taumafai lāua o taofi a ia, a lā muna: “Vau ke ‵nofo tatou, me ko pili o po.” Fanatu ei a ia o ‵nofo mo lāua.
30 I te taimi ne saga‵saga ei latou i te taipola o ‵kai, ne puke ne ia te falaoa, fai te fakafetai, tofitofi kae tufa atu ki a lāua.
31 I konā eiloa iloa ‵lei ei ne lāua a ia, kae ne fakagalo ei a ia mai i a lāua.
32 Kae ne fai aka ei a lā pati i a lāua eiloa: “E a, e seki otia ‵ta loto i ana pati kolā ne fai mai ki a tāua i te auala, i te taimi ne fakamaina faka‵lei mai ei ne ia a Tusitusiga Tapu ki a tāua?”
33 I te itula eiloa tenā ne ‵tu aka ei lāua ki luga kae toe ‵foki atu ki Ielusalema, kae ne maua atu ne lāua te toko sefulutasi mo nisi soko e maopoopo mai,
34 a lā muna: “E tonu eiloa me ko oti ne toetu aka te Aliki kae ne fakasae atu ki a Simona!”
35 Ne fakaasi atu ei ne lāua ki a latou a mea kolā ne ‵tupu i te auala mo te iloaga ne lāua a ia i te tofitofiga o te falaoa.
36 A koi fai‵pati atu lāua ki mea konei kae tu atu a ia i olotou tafa [[kae fai atu ki a latou: “Ke i luga i a koutou te filemu.”]]
37 Ko oko eiloa i te lotou pole‵pole mo te ma‵taku, me ne mafau‵fau latou me ko lavea ne latou se agaga.
38 Fai atu ei a ia ki a latou: “Kaia e ma‵taku ei koutou, kae kaia e fakalotolotolua ei koutou?
39 Onoono ki oku lima mo oku vae me ko au eiloa tenei; puke mai ki a au kae onoono, me i te agaga e seai ne ana ‵kano mo ivi, e pelā mo te mea e lavea ne koutou i a au.”
40 [[Mai ana pati konā, ne fakaasi atu ei ne ia ki a latou ana lima mo ana vae.]]
41 Kae koi tuai o tali‵tonu latou ona ko te lasi o te lotou fia‵fia mo te lotou ofo, fai atu ei a ia ki a latou: “E isi ne otou meakai ke kai aka au?”
42 Ne tuku atu ei ne latou ki a ia ne mu ika ne tātā,
43 ne puke aka ne ia kae kai i mua o latou katoa.
44 Ne fai atu a ia ki a latou: “Konei la aku pati ne fai atu a koi ‵nofo fakatasi tatou, me i mea katoa kolā ne tusi i te tulafono a Mose mo tusi a Pelofeta mo Salamo e uiga ki a au, ka fakataunu eiloa.”
45 Ne fakamaina faka‵lei atu ne ia ki a latou te uiga o Tusitusiga Tapu ko te mea ke malamalama ‵lei latou i ei,
46 kae fai atu ki a latou: “Ko te auala tenei ne tusi mai ei me ka puapuaga eiloa te Keliso kae ka toetu aka mai te mate i te tolu o aso,
47 kae e auala i tena igoa, ka talai atu ei te salamō mō te fakamagaloga o agasala ki atufenua katoa—e kamata mai i Ielusalema.
48 Kae ka fai koutou mo molimau ki mea katoa konei.
49 Kae kiloke! ka uga mai ne au ki luga i a koutou te mea telā ne folafola mai ne toku Tamana. Kae ke ‵nofo eiloa koutou i te fa‵kai ke oko ki te taimi e faka‵pei ei koutou ki te ‵mana mai luga i te lagi.”
50 Ne ‵taki atu ne ia latou ke oko ki Petania, ne sisi aka ana lima ki luga kae fakamanuia atu ki a latou.
51 A koi fakamanuia atu a ia ki a latou kae ne masagi aka ki luga i tena auala o fano ki te lagi.
52 Ne ifo atu latou ki a ia kae ‵foki atu ei ki Ielusalema mo te fiafia lasi.
53 Kae ne ‵nofo atu faeloa latou i te faletapu o tavae atu ki te Atua.
