Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 23:1-56

23  Ne ‵tu aka ei latou katoa ki luga kae ‵taki atu ne latou a ia ki a Pilato.  Ne kamata ei o ‵losi atu latou ki a ia, olotou muna: “Ne maua ne matou te tagata tenei e takitaki ‵se ne ia te motou fenua kae fakatapu ne ia te ‵togiga o lafoga ki a Kaisala kae fai mai foki i a ia ko te Keliso, te tupu.”  Ne fesili atu a Pilato ki a ia: “A koe ko te Tupu o tino Iutaia?” Ne tali atu a Iesu: “Tenā eiloa e fai mai ne koe.”  Ne fai atu ei a Pilato ki faitaulaga pule mo te vaitino: “E se iloa ne au se mea e ‵se ei te tino tenei.”  Kae ne kinau atu faeloa latou, olotou muna: “Ko fakamakosu ne ia a tino i ana akoakoga ne fai i Iuta kātoa, ne kamata mai i Kalilaia ke oko mai eiloa ki konei.”  I te lagonaga ne Pilato te mea tenā, fesili atu ei a ia me ko te tagata tenā se tino Kalilaia.  Kae i te otiga ne fakamautinoa aka me i a ia se tino mai lalo i te pulega a Helota, uga atu ei ne ia ki a Helota, telā ne nofo atu foki i Ielusalema i aso konā.  I te laveaga ne Helota a Iesu, ne fiafia malosi a ia, me ko leva ne fia lavea ne ia a ia ona ko mea e uke kolā ko oti ne lagona ne ia e uiga ki a Iesu, kae ne fia lavea foki ne Helota ne fakailoga e fai ne ia.  Ne kamata ei o ‵sili atu ne ia a fesili e uke ki a ia; kae e seai eiloa sena tali ne fai atu ki ei. 10  Kae ne ‵tu atu faeloa a faitaulaga pule mo failautusi o ‵losi mālō atu ki a ia. 11  Ne fakatauemu atu a Helota mo ana sotia ki a ia, fakapei atu ki a ia se gatu malapulapu kae toe uga atu ki a Pilato. 12  I te aso eiloa tenā ne toe ‵lei ei te va o Helota mo Pilato, me mai mua atu i ei ne fai fili faeloa lāua. 13  Ne fakamaopoopo mai ei ne Pilato a faitaulaga pule mo tino pule mo tino katoa 14  kae fai atu ki a latou: “Ne aumai ne koutou te tagata tenei ki a au me ne fakamalosi ne ia a tino ke ‵teke ki a koutou, kae kiloke! ko oti ne sukesuke ne au a ia i otou mua kae e seai eiloa sena ‵se i agasala katoa kolā ne ‵losi atu ne koutou ki a ia. 15  E penā foki a Helota, ne toe uga mai ne ia tou tagata ki a tatou, kae kiloke! e seai sena mea ‵se ne fai e ‵tau ei o tamate. 16  Tela la, ka fakasala ne au a ia, ko fakasaoloto atu ei.” 17  * —— 18  Kae ne ka‵laga atu te vaitino, olotou muna: “Fakaseai atu a ia, kae ‵tala mai a Palapa ki a matou!” 19  (A te tagata tenei ne ‵pei ki te falepuipui ona ko te ‵teke atu ki te malo, kae se tino tatino foki.) 20  Ne toe kalaga atu a Pilato ki a latou, me ne manako a ia o ‵tala atu a Iesu. 21  Ne kamata ei o paka‵laga atu latou, olotou muna: “‵Tuki atu ki te lakau! ‵Tuki atu a ia ki te lakau!” 22  Ne fai atu a ia i te tolu o taimi ki a latou: “Kaia, se a te mea masei ne fai ne te tagata tenei? E seai se mea ne maua ne au e ‵tau ei o tamate a ia; tela la, ka fakasala ne au a ia ko ‵tala atu ei.” 23  Ne paka‵laga malosi atu ei latou, kae kinau atu ke ‵tuki a ia ki te lakau, kae ne manumalo eiloa latou. 24  Ne fai ei ne Pilato te ikuga e ‵tusa mo te lotou manakoga. 25  Ne ‵tala atu ne ia te tagata telā ne ‵pei ki te falepuipui ona ko te ‵teke atu ki te malo mo te tatino, kae tuku atu ne ia a Iesu e ‵tusa eiloa mo te lotou manakoga. 26  I te ‵takiga ne latou a ia keatea, ne taofi ei ne latou a Simona, se tino mai Kulene, telā ne vau mai te vao, kae nā atu ne latou te lakau fakasaua ki luga i a ia ko te mea ke amo ne ia mai tua o Iesu. 27  Kae ne tau‵tali atu i a ia se vaitino e tokouke mo fāfine i ei, kolā ne pāpā olotou fatafata i te fanoa‵noa kae ‵tagi mautuutu ona ko ia. 28  Ne mafuli atu a Iesu ki fāfine kae fai atu: “Tama fa‵fine o Ielusalema, sa ‵tagi mai ki a au. I lō te fai penā, ‵tagi mō koutou eiloa mo otou tama‵liki 29  kae kiloke! ka oko mai eiloa a aso ka fai aka ei a tino penei, ‘Ka fia‵fia eiloa a fāfine sē āfu mo fāfine kolā e seki fa‵nau mo ū kolā e seki faū ki ei se pepe!’ 30  Kae ka kamata o fai atu latou ki mauga, ‘Ma‵toli mai ki luga i a matou!’ kae ki tamā mauga ‘‵Funa aka matou!’ 31  Me kafai e fai ne latou a mea konei ki te lakau telā e ola ‵lei, se a la te mea ka tupu māfai ko magemage te lakau?” 32  Ne ‵taki atu foki a nisi tāgata e tokolua, ne tino solitulafono, ke tamate fakatasi mo ia. 33  I te lotou okoatuga ki te koga e igoa ki a Gatiulupoko, ne ‵tuki ei ne latou a ia fakatasi mo tino ma‵sei konā ki lakau, e tokotasi i tena feitu fakaatamai kae e tokotasi i tena feitu fakamaui. 34  [[Kae ne fai aka a Iesu, penei: “Toku Tamana, fakamagalo atu latou, me e se iloa ne latou te lotou mea tenei e fai.”]] E se gata i ei, ne tufa ne latou ana gatu i te faiga o se vili. 35  Ne ‵tu atu a tino o onoono ki ei. Kae ne fakatauemu atu a tino pule, olotou muna: “Ne faka‵sao ne ia a nisi tino; tuku atu la ke fakasao ne ia a ia eiloa, māfai a ia ko te Keliso a te Atua, telā ko te Tino Filifilia.” 36  Ne fakatauemu atu foki a sotia ki a ia, ne fakapili‵pili atu kae ofo atu a uaina ‵vi ki a ia 37  kae fai atu: “Kafai koe ko te Tupu o tino Iutaia, fakasao aka la koe.” 38  E isi foki ne pati e tusi mai i luga i tena ulu: “Tenei te Tupu o tino Iutaia.” 39  Ne fai atu ne se tokotasi o tino solitulafono telā ne fakatau‵tau fakatasi mo ia, a pati sē ‵lei ki a ia: “E a, e se ko koe te Keliso? Faka‵sao aka la ne koe a koe eiloa mo māua foki.” 40  Ne ‵liko atu te suā tino ki a ia kae fai atu: “E a, e se mataku koe ki te Atua, me ko fakasala foki koe e pelā mo ia? 41  Me e tonu eiloa te ‵ta fakasalaga ona ko mea kolā ne fai ne tāua; a ko te tagata tenei e seai eiloa sena mea ‵se ne fai.” 42  Fai atu ei a ia: “Iesu, masaua mai au māfai e oko koe ki tou Malo.” 43  Kae ne fai atu a Iesu ki a ia: “Au e fai ‵tonu atu ki a koe i te aso nei,* Ka ‵nofo fakatasi eiloa tāua i te Palataiso.* 44  I te taimi tenā kāti ko nofo pelā ki te ono* o itula kae ne pouli ei te lalolagi kātoa ke oko eiloa ki te iva* o itula 45  me ne seki ‵kasa mai te la; kae ne masaelua ei te ‵pui laugatu i te koga tapu mai luga ki lalo. 46  Kae ne pakalaga aka a Iesu i se leo lasi, ana muna: “Toku Tamana, ko tuku atu ne au toku ola* ki ou lima.” I te otiga o ana pati konei ko te mea eiloa ko mate. 47  I te laveaga ne te ofisa o te kautau a mea kolā ne ‵tupu, tavae atu ei a ia ki te Atua, ana muna: “A te tagata tenei se tino amiotonu eiloa.” 48  Kae i te laveaga ne te vaitino katoa kolā ne mumu atu ki konā o maimoa ki mea kolā ne ‵tupu, ne ‵foki atu latou kae pāpā olotou fatafata i te fanoa‵noa. 49  E se gata i ei, a latou katoa kolā ne masani mo Iesu ne ‵tu mai i se koga tai ‵mao. Kae ne ‵tu atu foki a fāfine kolā ne tau‵tali i a ia mai Kalilaia o onoono ki mea katoa konei. 50  Kae kiloke! e isi se tagata e igoa ki a Iosefa, se tino o te Kaupule, se tagata ‵lei kae amiotonu. 51  Ne seki palota te tagata tenei o ‵lago atu ki olotou togafiti mo galuega ma‵sei. A ia se tino mai Alimataia, se fa‵kai o tino Iutaia, kae ne nofo fakatalitali foki ki te Malo o te Atua. 52  Ne fanatu te tagata tenei ki a Pilato kae fakamolemole atu ke tuku atu te foitino o Iesu. 53  Ne tuku ifo ne ia ki lalo, ne kofukofu tena foitino ki laugatu lino ‵gali, kae fakatakato ne ia i se tanuga telā ne tuki ne ia i te papa, telā e seai eiloa se tino kai tanu i ei. 54  Ne oko atu ki te Aso Fakatoka, kae ko pili o kamata te Sapati i te afiafi. 55  Kae ko fāfine kolā ne olo atu i a ia mai Kalilaia, ne tau‵tali atu ke onoono latou i te tanuga mo te koga e takato ei tena foitino, 56  kae ne toe ‵foki ei latou o fakatoka a mea fakama‵nogi mo sinu ma‵nogi. Kae ne malo‵lo eiloa latou i te Sapati e ‵tusa mo te tulafono.

Fakamatalaga mai lalo

 Ke onoono ki te fakamatalaga mai lalo i te Mat 17:21.
 Ne seki fakaaoga a te koma i te ‵fuliga i te ‵gana Eleni. Ne faulu i te ‵fuliga tenei a te koma mai tua o pati ‘aso nei’ me e ‵lago atu ki nisi manatu i te Tusi Tapu e pelā mo te Ioa 20:17; Ga 1:1-3, 9; 10:40; 1Ko 15:20; Ko 1:18.
 I te ‵gana Eleni, pa·ra·deiʹsos. E fakauiga ki ‘se fatoaga gali.’
 A te “ono o itula” ko te sefululua i te tutonu.
 A te “iva o itula” ko te tolu i te fakaafiafi.
 Io me ko te “malosi ola.” I te ‵gana Eleni, pneuʹma. Ke onoono ki te Mataupu Fakaopoopo e 8.