Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Luka 22:1-71

22  Ko pili mai te Fakamanatuga o Falaoa sē Faka‵fete, telā e fakaigoa ki te Paseka.  Ne ‵sala atu foki a faitaulaga pule mo failautusi ki se auala magoi ke tamate ei a ia, kae ne ma‵taku latou i tino.  Kae ne ulu atu a Satani ki loto i a Iuta te Isikaliota, se tokotasi o te toko sefululua.  Ne fano a ia kae faipati atu ki faitaulaga pule mo tino pule o te faletapu e uiga ki se togafiti ke puke ei ne latou a ia.  Ne fia‵fia malosi latou kae lotoma‵lie ke tuku atu ki a ia ne tupe siliva.  Ne talia ne ia ke fai penā kae ne kamata o ‵sala atu ki se avanoaga ‵lei ke fakatogafiti ei a Iesu i se koga telā e seai ne tino i ei.  Ne oko atu ki te aso o te ‵kaiga o falaoa sē faka‵fete, telā e ‵tau o ofo atu i ei a te manu o te Paseka;  kae ne uga atu ne ia a Petelu mo Ioane, ana muna: “Olo o fakatoka te Paseka ke ‵kai ei tatou.”  Ne fai atu lāua: “Tefea te koga e manako koe ki ei, ke fakatoka ne māua?” 10  Ana muna ki a lāua: “Kiloke! Kafai e oko atu koulua ki te fa‵kai ka fetaui koulua mo se tagata e amo ne ia se fagu kele e ‵fonu i vai. Tau‵tali i a ia ki loto i te fale telā e ulu a ia ki ei. 11  Ko fai atu ei koulua ki te tino i o ia te fale, ‘Muna a te Faiakoga, “Tefea te potu talimalo telā ka ‵kai ei matou mo oku soko i te Paseka?”’ 12  Kae ka fakaasi atu ne te tagata tenā ki a koulua se potu lasi i luga telā e toka a mea katoa i ei. Ko fakatoka atu ei ne koulua.” 13  Ne olo ei lāua kae maua atu ne lāua a mea katoa kolā ne fai atu ne ia, fakatoka ei ne lāua te Paseka. 14  I te okoatuga ki te taimi tonu, ne sagasaga ei a ia i te taipola, fakatasi mo ana apositolo. 15  Kae ne fai atu a ia ki a latou: “Ne manako malosi au ke ‵kai fakatasi tatou i te Paseka tenei a koi tuai au o puapuaga, 16  me e fai atu au ki a koutou: ka se toe kai eiloa au ki ei ke oko ki te taimi e fakataunu ei te mea tenā mai lalo i te Malo o te Atua.” 17  Ne puke a ia ki se ipu, fai te fakafetai kae fai atu: “Puke te ipu tenei kae fakasolo o inu i ei , 18  me e fai atu au ki a koutou: Ka se toe inu eiloa au ki te sua o te vine ke oko ki te taimi e oko mai ei te Malo o te Atua.” 19  Ne puke foki ne ia te falaoa, fai te fakafetai, tofitofi, kae tufatufa atu ki a latou, ana muna: “E fakauiga te mea tenei ki toku foitino telā ka tuku atu mō koutou. Ke fai faeloa te mea tenei mo fai se fakamasauaga ki a au.” 20  E penā foki te ipu, i te otiga a latou ne ‵kai i te ‵kaiga i te afiafi, fai atu ei a ia: “E fakauiga a te ipu tenei ki te feagaiga fou e auala i toku toto, telā ka ‵ligi ki tua mō koutou. 21  “Kae kiloke! ko ‵nofo fakatasi māua i te taipola mo te tino telā ka fakatogafiti ne ia au. 22  Me ka fano eiloa keatea te Tama a te tagata e pelā mo te mea ne ‵valo mai; kae kalofa eiloa i te tagata telā e fakatogafiti ne ia a ia!” 23  Ne kamata ei o sau‵tala latou i a latou eiloa me ko oi te tino i a latou telā ko pili o fai ne ia te mea tenei. 24  E ui i ei, ne sae aka foki se kinauga lasi i a latou me ko oi te ‵toe tino sili i a latou. 25  Kae ne fai atu a ia ki a latou: “A tupu o atufenua e pule atu ki luga i a latou e pelā me ne aliki, a ko tino kolā e isi se lotou pule ki luga i a latou e fakaigoa ki Tino Kaima‵lie. 26  A ko koutou e se ‵tau o fai penā. Kae ke fai te tino telā e sili i a koutou e pelā mo te ‵toe tamaliki foliki, a ko te tino telā e fia fai pelā me se aliki ke fai mo fai se tavini. 27  Ko oi te tino e sili atu, ko te tino telā e sagasaga i te taipola o kai io me ko te tino telā e tavini atu? E mata, e se ko te tino telā e sagasaga i te taipola? Kae ko au tenei e ‵nofo mo koutou kae tavini atu ki a koutou. 28  “E tiga te feitu tenā, ko koutou eiloa kolā ne ‵piki ‵mau ki a au i oku tofotofoga; 29  kae ka fai ne au se feagaiga mo koutou e pelā eiloa mo te feagaiga ko oti ne fai ne toku Tamana ki a au, mō se Malo, 30  ke mafai o ‵kai kae inu koutou i taku taipola i toku Malo, kae ka saga‵saga foki koutou i nofogaaliki o fakamasino a matakāiga e sefululua o Isalaelu. 31  “Simona, Simona, kiloke! ko manako a Satani ke faka‵ma a koutou e pelā me ne saito. 32  Kae ko oti ne ‵talo malosi au mō koe ko te mea ke se galo tou fakatuanaki, a ko koe, kafai e toe ‵fuli mai, ke fakamalosi atu la ou taina.” 33  Fai atu ei a Petelu ki a ia: “Te Aliki, au e toka ke olo tasi tāua ki loto i te falepuipui ke oko foki eiloa ki te mate.” 34  Kae ne fai atu a Iesu: “Au e fai atu ki a koe, e Petelu, a koi tuai o tagi te moa kae ko oti ne fakafiti fakatolu ne koe au.” 35  Ne fai atu foki a ia ki a latou: “I te taimi ne uga atu ei ne au koutou e aunoa mo se pausi tupe, taga meakai mo taka, e a, ne ma‵nako la koutou ki se mea? Olotou muna: “Ikai!” 36  Fai atu ei a ia ki a latou: “Kae nei la, a ia telā e isi sena pausi tupe ke ave ne ia, e penā foki te taga meakai, kae ke na fakatau atu ne te tino tena gatu ke ‵togi ki ei sena pelu māfai e seai. 37  Au e fai atu ki a koutou me ka fakataunu eiloa a mea kolā ne tusi e auala i a au, penei, ‘Kae ne lau fakatasi a ia mo tino solitulafono.’ Me ko mea katoa kolā ne tusi e uiga ki a au, ka fakataunu eiloa.” 38  Ne fai atu latou ki a ia: “Te Aliki, kiloke! e lua a pelu konei.” Ana muna ki a latou: “Ko lava i konā.” 39  I tena fanoga ki tua, fanatu ei ki te Mauga o Olive e pelā mo tena masani, kae ne tau‵tali atu foki ana soko i a ia. 40  I tena okoatuga ki te koga tenā, fai atu ei ki a latou: “‵Talo faeloa ko te mea ke se fakaosoosogina koutou.” 41  Ne tai faka‵mao atu a ia keatea mai i a latou,* totuli ifo ei ki lalo kae kamata o ‵talo, 42  ana muna: “Toku Tamana, kafai e tonu mo tou loto, ave keatea te ipu tenei mai i a au. Kae ke se fai la toku loto, kae ko tou loto.” 43  Ne fakasae atu ei ki a ia se agelu mai te lagi o fakamalosi atu a ia. 44  Ne fi‵ta tena mafaufau kae ne tumau faeloa i te ‵talo malosi atu, kae ne ‵sali ifo tena tauta e pelā me ne toto ki lalo i te laukele. 45  Ne tu aka a ia mai tena ‵talo, fanatu ki ana soko kae maua atu ne ia latou e ‵moe ona ko te lotou fanoa‵noa, 46  Ne fai atu a ia ki a latou: “Kaia e ‵moe ei koutou? ‵Tu ki luga kae ‵talo faeloa ko te mea ke se fakaosoosogina koutou.” 47  A koi faipati atu a ia kae oko mai se potukau o tino kolā ne ‵taki atu ne te tagata e igoa ki a Iuta, se tokotasi o te toko sefululua, kae ne fanatu a ia ki a Iesu o sogi atu ki a ia. 48  Ne fai atu a Iesu ki a ia: “Iuta, e a, e fakatogafiti ne koe te Tama a te tagata ki se sogi?” 49  I te laveaga ne tino i ana tafa a te mea telā ko pili o tupu, fai atu ei latou ki a ia: “Te Aliki, e a, ka fakaaoga ne matou a pelu?” 50  E tokotasi te tino i a latou ne ‵kati eiloa ne ia te taliga fakaatamai o te pologa a te faitaulaga sili ke tō keatea. 51  Kae ne tali atu a Iesu: “Ko lava i konā.” Ne puke ei a ia ki te taliga kae faka‵piki atu. 52  Ne fai atu ei a Iesu ki faitaulaga pule mo tino pule i te faletapu mo toeaina kolā ne olo atu o puke a ia: “A koutou na e o‵mai mo otou pelu mo pago o puke au e pelā me se tagata ‵faomea? 53  I aso takitasi ne nofo faeloa au i te faletapu fakatasi mo koutou kae ne seki puke aka eiloa au ne koutou. Kae tenei eiloa te otou taimi mo te taimi o te malosi pule o te pouliga.” 54  Ne puke ne latou a Iesu, ‵taki atu keatea kae avatu ki te fale o te faitaulaga sili; kae ne tautali atu a Petelu mai se koga tai ‵mao. 55  I te taimi ne faka‵ka ei ne latou te afi i te koga ateatea o te fale kae saga‵saga ei a latou katoa ki lalo, ne sagasaga foki a Petelu i konā. 56  Kae e isi se tavini tamafine ne lavea ne ia tou tagata e sagasaga i tafa o te afi, ne kilo atu tou fafine ki a ia, kae fai atu: “A te tagata foki tenei ne ‵nofo mo Iesu.” 57  Kae ne fakafiti a ia, ana muna: “Toku fafine, e se iloa ne au a ia.” 58  Mai tua malie ifo i ei, ne lavea a ia ne se isi tino kae fai atu: “A koe foki se tokotasi o latou.” Kae ne fai atu a Petelu: “Toku tagata, e se ko au.” 59  Kae kāti i se itula mai tua ifo i ei, ne kamata o kinau malosi atu se isi tagata: “E mautinoa eiloa me i te tagata tenei ne ‵nofo foki mo ia, me i a ia se tino Kalilaia!” 60  Kae ne fai atu a Petelu: “Toku tagata, e se iloa ne au a te mea e faipati koe ki ei.” I konā eiloa, e seki palele ana pati kae tagi te moa. 61  Ne mafuli atu te Aliki kae kilo atu ki a Petelu, kae ne masaua ne Petelu a pati a te Aliki ki a ia: “A koi tuai o tagi te moa i te po nei kae ko oti ne fakafiti fakatolu ne koe au.” 62  Fano ei a ia ki tua kae tagi mautuutu i ei. 63  Ne kamata o fakatauemu atu ki a Iesu a tāgata kolā ne puke fakapagota ne latou a ia, kae fusufusu foki ne latou. 64  Ne ‵pono ne latou ana mata kae fai atu: “‵Valo mai, ko oi ne fusu ne ia koe?” 65  E uke foki olotou pati fakatauemu ne fai ki a ia. 66  I te aoakega, ne maopoopo ei a toeaina katoa o te fono, ko faitaulaga pule mo failautusi, kae ne avatu ne latou a Iesu ki loto i te fale fono o te Sanetulini, kae fai atu: 67  “Kafai koe ko te Keliso, taku mai ki a matou.” Kae ne fai atu a ia ki a latou: “Kafai foki loa e fakaasi atu ne au ki a koutou, ka se mafai lele eiloa o tali‵tonu koutou. 68  E se gata i ei, kafai e fesili atu au ki a koutou, ka se tali lele mai eiloa koutou. 69  E ui i ei, mai te taimi tenei o fano ki mua, ka sagasaga eiloa te Tama a te tagata i te feitu malosi fakaatamai o te Atua.” 70  Ne fai atu ei latou: “Ko tena uiga, a koe ko te Tama a te Atua?” Ana muna ki a latou: “Tenā eiloa e fai mai ne koutou me ko au.” 71  Olotou muna: “Kaia e toe ‵sala ei tatou ki nisi molimau? Me ko oti ne lagona ne tatou a pati konā mai tena gutu eiloa.”

Fakamatalaga mai lalo

 I te ‵gana Eleni, “ne tai faka‵mao atu a ia keatea mai i a latou, ki te ‵mao o se fatu māfai e pei.”