Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 21:1-38

21  I tena kiloakaga lavea ei ne Iesu a tino mau‵mea e lafo olotou meaalofa ki loto i pusa tupe.  Kae ne lavea ne ia se fafine mativa ko mate tena avaga e lafo ne ia ki ei a tupe fo‵liki e lua kolā e se taulia malosi,  kae ne fai atu a ia: “Au e fai ‵tonu atu ki a koutou: A te fafine tenei ko mate tena avaga, e tiga eiloa e mativa, kae e uke atu ana tupe ne lafo i lō tupe a tino katoa kolā ne lafo.  Ne lafo atu ne latou katoa konei olotou meaalofa mai i olotou tupe ‵toe, a ko te fafine tenei ne lafo atu ne ia ana mea katoa e ola ei a ia.”  Fakamuli ifo, i te taimi ne fai‵pati ei a nisi tino e uiga ki te faletapu, ki te auala ne teu ei ki fatu ‵gali mo mea kolā ne ofo atu ki te Atua,  fai atu ei a ia: “E pelā mo mea konei e lavea ne koutou, ka oko mai eiloa a aso ka se toe ai ei se fatu ka moe i luga i te suā fatu kae e se ‵pei ki lalo.”  Ne fesili atu ei latou ki a ia, olotou muna: “Te Faiakoga, ka ‵tupu mafea a mea konei, kae se a te fakailoga e iloa ei me ka ‵tupu a mea konei?”  Ne fai atu a ia: “Fakaeteete ke se faka‵segina koutou, me e tokouke a tino ka o‵mai i toku igoa kae fai mai, ‘Au ko ia,’ kae ‘Ko oti ne oko mai te taimi tonu.’ Sa tau‵tali i a latou.  E se gata i ei, kafai e lagona ne koutou a tala o taua mo fakalavelave, ke mo a e ma‵taku koutou. Me e ‵tau o ‵tupu muamua a mea konei, kae e seki oko mai te gataga.” 10  Ne fai atu ei a ia ki a latou: “Ka fai taua te suā atufenua ki te suā atufenua, mo te suā malo ki te suā malo, 11  ka ‵poko a mafuie fakama‵taku, ka oko atu a famai mo oge meakai ki koga katoa, kae ka lavea atu a mea fakama‵taku mo fakailoga ‵lasi i te lagi. 12  “A koi tuai o oko mai a mea katoa konei, ka puke koutou ne tino kae fakasaua atu ki a koutou, ka tuku atu koutou ki sunako mo falepuipui. Ka avatu koutou ki mua o tupu mo kovana ona ko toku igoa. 13  Ka fai a mea konā mo fai ne avanoaga ke molimau atu ei koutou. 14  Tela la, ke mo a e mafau‵fau muamua koutou ki otou pati ka fai atu ke ‵pulu ei koutou, 15  me ka tuku atu ne au ki a koutou a pati mo te poto, kolā ka se mafai ne tino ‵teke katoa o ‵teke io me faka‵se ne latou. 16  E se gata i ei, ka tuku atu foki koutou ne otou mātua, taina, kāiga, mo taugasoa, kae ka tamate ne latou a nisi tino i a koutou. 17  Ka takalia‵lia a fenua katoa ki a koutou ona ko toku igoa. 18  Kae ka seai eiloa se laulu i otou ulu ka galo atu. 19  Kae ona ko te otou lotomau ka ola ei koutou. 20  “E se gata i ei, kafai e lavea ne koutou a Ielusalema e nikoi ne kautau, ka iloa ei ne koutou me ko pili mai tena fakamaseiga. 21  Ke na ‵tele atu la latou kolā e ‵nofo i Iuta ki luga i mauga, ke na ‵tele foki ki tua a tino kolā e ‵nofo i Ielusalema, a ko latou kolā i tua ke se toe olo atu ki loto i ei, 22  me konei eiloa a aso ka fakaoko atu ei te fakasalaga ko te mea ke fakataunu a mea katoa kolā ne tusi. 23  Kalofa eiloa i fāfine fai‵tama mo fāfine kolā koi faū olotou pepe māfai ko oko mai a aso konā! Me ka lasi ‵ki eiloa te tulaga fakaalofa o te fenua mo te fakasalaga o tino konei. 24  Ka ‵mate latou i te pelu kae ka ave fakapagota foki ki fenua fakaa‵tea. Ka lakalaka a Ielusalema ne fenua fakaa‵tea ke oko eiloa ki te fakataunuga o taimi ne fuafuagina mō fenua fakaa‵tea. 25  “Ka isi foki ne fakailoga i te la, te masina, mo fetu kae ka manava‵se a atufenua i te lalolagi me ka se iloa ne latou o fai se mea ona ko te logoa mo te sou o te tai. 26  Ka mata‵po a tino ona ko te ma‵taku mo te ‵nofo fakatali‵tali ki mea kolā ka oko mai ki luga i te lalolagi nofoaki kātoa, me ka ga‵lulu a mea ma‵losi o te lagi. 27  Kae ka lavea ne latou te Tama a te tagata e vau i se kaumana mo tena ‵mana mo tena ‵malu sili. 28  A koi kamata o ‵tupu a mea konei, ‵tu faka‵lei kae ‵kilo ki luga me ko pili mai te taimi ka faka‵sao ei koutou.” 29  Ne fai atu ei ne ia se tala fakatusa ki a latou: “Onoono ki te lakau ko te mati mo nisi lakau katoa. 30  Kafai ko lavea ne koe me ko ‵somo aka olotou lau ko iloa ei ne koutou me ko pili mai te ‵tau vela. 31  E penā foki koutou, kafai ko lavea ne koutou a mea katoa konei ko ‵tupu, ko iloa ei ne koutou me ko pili mai te Malo o te Atua. 32  Au e fai ‵tonu atu ki a koutou: Ka se palele atu te kautama tenei seiloga ke oti ne fakataunu a mea katoa konei. 33  Ka ‵galo atu a te lagi mo te lalolagi, kae ka se mafai o ‵galo aku muna. 34  “‵Saga tonu ki a koutou eiloa ke mo a e faka‵mafa otou loto ki te ‵kai malosi, te inu malosi ki te kava, mo te manavase ki te olaga nei, i te mea mana oko fakapoi atu te aso tenā ki a koutou 35  e pelā me se malei. Me ka oko atu eiloa te aso tenā ki tino katoa kolā e ‵nofo i luga i te lalolagi. 36  Tela la, ke matapula‵pula faeloa kae ‵talo i taimi katoa ko te mea ke mafai o ‵sao koutou mai i mea katoa kolā e ‵tau o ‵tupu, ko ‵tu atu ei koutou i mua o te Tama a te tagata.” 37  Tela la, ne akoako atu faeloa a ia i loto i te faletapu i te ao kae i te po e fano sale a ia o nofo i luga i te Mauga o Olive. 38  Kae ne olo sale atu a tino katoa a koi ‵malu i aso takitasi o fakalogo‵logo ki a ia i te faletapu.

Fakamatalaga mai lalo