Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 20:1-47

20  I te aso e tasi a koi akoako atu ne ia a tino i te faletapu kae folafola atu foki te tala ‵lei, ne fakapili‵pili atu ki ana tafa a faitaulaga pule mo failautusi mo toeaina.  Ne fai atu latou ki a ia: “Fai mai ki a matou, i o oi te malosi e fai ei ne koe a mea konei? Kae ko oi foki ne tuku atu ne ia te malosi tenā ki a koe?”  Ne tali atu a ia ki a latou: “E isi foki saku fesili ki a koutou, kae ke tali mai ne koutou ki a au:  E mata, a te papatisoga a Ioane ne aumai mai te lagi io me mai i tāgata?”  Ne fai olotou fakaikuga i a latou eiloa, olotou muna: “Kafai e fai atu tatou, ‘Mai te lagi,’ kae ka fai mai a ia, ‘Kaia la ne seki tali‵tonu ei koutou ki a ia?’  Kae kafai e fai atu tatou, ‘Mai i tāgata,’ ka peipei eiloa tatou ne tino katoa ki fatu, me ne tali‵tonu eiloa latou i a Ioane se pelofeta.”  Ne tali atu ei latou me e se iloa ne latou.  Ne fai atu a Iesu ki a latou: “E se fakaasi atu foki ne au me ne mafua mai i fea te malosi e fai ei ne au a mea konei.”  Ne fai atu ei ne ia te tala fakatusa tenei ki tino: “E isi se tagata ne ‵toki tena togavine kae ne lisi ne ia ki tino fai fatoaga, fano ei a ia ki se isi fenua i se taimi leva ‵ki. 10  I te okoga ki te ‵tau e tau ei a fuagā vine, uga atu ei ne ia tena pologa ki tino fai fatoaga ke tuku atu ne latou ki a ia ne fuagā vine mai te togavine. Kae ne uga atu ne tino fai fatoaga a ia ke fano e aunoa mo se mea i te otiga ne ta ne latou. 11  Kae ne toe uga atu ne ia se isi pologa. Ne ta foki ne latou te pologa tenā, fakamasiasi atu, kae uga atu ke fano e aunoa mo se mea. 12  Ne toe uga atu foki ne ia te tokotolu. Ne ta foki ne latou te tino tenei ke pakia kae ‵pei atu ki tua. 13  Ne fai aka ei te tino i o ia te togavine, ‘Se a taku mea ka fai? Ka uga atu ne au taku tama, telā e pele i a au. Kāti ka āva eiloa latou ki a ia.’ 14  I te laveaga ne tino fai fatoaga a ia, ne fakatau tītī ei olotou mafaufauga, kae fai aka, ‘Tenei eiloa tena sui; ke na tamate ne tatou a ia, ko te mea ke puke ma tatou tena tofi.’ 15  Ne ‵pei ei ne latou a ia ki tua mo te togavine kae tamate atu. Se a la te mea ka fai ne te tino i o ia te togavine ki a latou? 16  Ka fanatu eiloa a ia o tamate a tino fai fatoaga konā kae tuku atu te togavine ki nisi tino.” I te lagonaga ne latou te mea tenei fai aka ei olotou muna: “Ke mo a eiloa e tupu te mea tenā!” 17  Kae ne kilo atu a ia ki a latou kae fai atu: “Se a la te uiga o te mea telā ne tusi: ‘A te fatu telā ne tiakina ne tufuga fai fale ko ia telā ko oti ne fai mo fai te fatu tulimanu tafasili i te aoga’? 18  So se tino telā e siga ki luga i te fatu tenei ka malukuluku valevale. A ko te tino telā e siga ki luga i ei te fatu tenei ka palapala valevale.” 19  Ne ‵sala ei a failautusi mo faitaulaga pule ki auala ke puke olotou lima ki tou tagata i te itula eiloa tenā, kae ne ma‵taku latou i tino, me ne iloa ne latou me ne fai atu ne Iesu te tala fakatusa e uiga ki a latou. 20  I te otiga ne iloilo faka‵lei ne latou a ia, ne ‵togi ‵funa ne latou a tino kae uga atu e pelā me ne tino amio‵tonu, ko te mea ke mafai o ‵po ne latou a ia i ana pati ko te mea ke ave ei a ia ki te malo mo te kovana. 21  Kae ne fesili atu latou ki a ia, olotou muna: “Te Faiakoga, e iloa ne matou me e faipati kae akoako ne koe te mea tonu kae e se fakailoga tino foki koe, kae akoako foki ne koe te mea tonu e uiga ki auala o te Atua: 22  E mata, e saoloto i te tulafono ke ‵togi atu te lafoga foitino ki a Kaisala io me ikai?” 23  Ne iloa ne Iesu te lotou togafiti kae fai atu ei ki a latou: 24  “Fakaasi mai ki a au se tenali. I o oi te ata mo te igoa tenei?” Ne fai atu latou: “I o Kaisala.” 25  Ne fai atu ei a ia ki a latou: “Tela la, ke toe ‵togi atu a mea a Kaisala ki a Kaisala a ko mea a te Atua ki te Atua.” 26  Ne seki mafai ne latou o ‵po aka a ia i mua o tino i ana pati konei, kae ne seki ai ne olotou pati ne fai ona ko te lotou ofo i tena tali. 27  A ko nisi Satukaio, kolā e fai mai me e seai se toetu, ne olo atu kae fesili atu ki a ia, 28  olotou muna: “Te Faiakoga, ne tusi mai a Mose ki a matou: ‘Kafai e mate se tagata avaga kae e seai ne ana tama‵liki, e ‵tau o avaga tena taina mo tena avaga ko te mea ke maua ne tama‵liki ma tena taina.’ 29  E isi ne tautaina e tokofitu, ne avaga te toekimua kae i te taimi ne mate ei kae seai sena tamaliki. 30  E penā foki te tokolua 31  kae ne avaga a ia mo te tokotolu. E penā foki te tokofitu; ne seki ai katoa ne olotou tama‵liki kae ne ‵mate katoa latou. 32  Fakamuli ifo ne mate ei te fafine. 33  Tela la, i te taimi o te toetu, ko oi te tino mai te tokofitu konei ka fai mo fai te avaga a tou fafine? Me ne a‵vaga katoa a latou mo ia.” 34  Ne tali atu a Iesu ki a latou: “E a‵vaga a tama‵liki o te olaga masani tenei kae tuku atu foki ke a‵vaga, 35  kae ko tino kolā e ‵tau o maua ne latou te olaga i aso mai mua mo te toetuga mai te mate e se a‵vaga io me e se tuku atu ke a‵vaga. 36  E tonu, ka se toe ‵mate foki latou, me ka fai latou e pelā mo agelu, kae ko latou ko tama a te Atua me ne toe faka‵tu mai latou.* 37  Kae ne fakaasi mai eiloa ne Mose me ka toe faka‵tu mai a tino ‵mate, i te tala e uiga ki te lakau ‵ka, kae taku ne ia a Ieova ko ‘te Atua o Apelaamo, te Atua o Isaako, mo te Atua o Iakopo.’ 38  A ia e se ko te Atua o tino ‵mate, a ko te Atua o tino ola, me i a latou e ola katoa i tena kilokiloga.” 39  Ne fai atu a nisi failautusi: “Te Faiakoga, ko oko eiloa i te ‵lei o au pati.” 40  Me ne seki maua ne latou te loto toa ke toe ‵sili atu se isi fesili ki a ia. 41  Ana muna ki a latou: “Kaia e fai mai ei latou me i a Keliso ko te tama a Tavita? 42  Me ne fai mai a Tavita i te tusi ko Salamo: ‘Ne fai atu a Ieova ki toku Aliki: “Nofo i toku feitu fakaatamai 43  ke oko ki te taimi e tuku ei ne au ou fili mo fai te mea e tuku ei ou vae.”’ 44  Ne taku ne Tavita a ia ki te Aliki; kae e fai la pefea a ia mo fai tena tama?” 45  A koi fakalogo‵logo atu a tino katoa kae ne fai atu a ia ki ana soko: 46  “Ke fakaeteete koutou i failautusi kolā e ma‵nako ke olo sale latou mo olotou gatu ‵loa kae ke fakatalofa atu a tino ki a latou i maketi kae ke ‵nofo latou i nofoga tafa ki mua i sunako mo toe koga ma‵luga i ‵kaiga i afiafi 47  kae ko latou kolā e ‵faomalo ne latou a fale o fāfine ko ‵mate olotou avaga kae ma‵nako ke onoono atu a tino ki olotou ‵talo ‵loa. Ka maua eiloa ne latou konei se fakasalaga telā e ‵mafa atu.”

Fakamatalaga mai lalo

 I te ‵gana Eleni, “me i a latou ko fanau o te toetu.”