Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 2:1-52

2  I aso konā ne oko atu ei se fakatonuga mai i a Kaisala Aokuso ki tino katoa i te lalolagi ke fai se tusiga igoa  (a te tusiga igoa muamua tenei ne fai a ko Kulenio ko te kovana o Sulia),  kae ne faima‵laga atu a tino katoa o fakamau olotou igoa i olotou fa‵kai.  Tela la, ne faimalaga atu foki a Iosefa mai te fa‵kai ko Nasaleta i Kalilaia ki Iuta, ki te fa‵kai o Tavita, telā e fakaigoa ki Petelema, ona ko ia se tino mai te kāiga o Tavita.  Ne fano a ia ke fakamau a lā igoa mo Malia, telā ko oti ne avaga lāua kae ko pili foki o fanau.  A koi ‵nofo atu lāua i konā kae ne oko atu ki te taimi ka fanau ei tou fafine.  Ne fanau mai ne ia se tamaliki tagata, ko tena uluaki, kae ne fakapulupulu ne ia ki laugatu kae fakamoe atu i se tali fagai manu me ko seai se avanoaga mō latou i te fale talimalo.  I te fenua eiloa tenā, e isi foki ne tausi mamoe e ‵nofo i tua o leoleo olotou lafu mamoe i te po.  Ne tu fakapoi atu te agelu a Ieova i olotou tafa, kae ne maina atu te ‵malu o Ieova ki luga i a latou, kae ne ma‵taku ‵ki latou. 10  Ne fai atu te agelu ki a latou: “Sa ma‵taku, me kiloke! ko folafola atu ne au ki a koutou te tala ‵lei kae fakafiafia telā ka maua ne tino katoa 11  me ko oti ne fanau mai ki a koutou i te aso tenei se Fakaola, telā ko Keliso te Aliki, i te fa‵kai o Tavita. 12  Kae tenei la te fakailoga mō koutou: Ka maua atu ne koutou se pepe e fakapulupulu ki laugatu kae e moe i se tali fagai manu.” 13  Ne oko fakavave atu ki tafa o te agelu a kautau o te lagi e se lausia, o tavae atu ki te Atua kae fai atu: 14  “Ke vikia te Atua telā e nofo i koga ma‵luga, kae ke i luga i tino kolā e fiafia a ia ki ei a te filemu i te lalolagi.” 15  I te tiakinaga ne agelu a latou o ‵foki ki te lagi, ne fai‵pati ei a tausi mamoe i a latou eiloa: “Tatou ka olo nei eiloa ki Petelema ke lavea ne tatou te mea telā ko oti ne tupu, kae telā ko oti ne fakailoa mai ne Ieova ki a tatou.” 16  Ne olo fakavave atu latou kae ne maua atu ne latou a Malia e pelā foki mo Iosefa, mo te tamaliki e takato i loto i te tali fagai manu. 17  I te laveaga ne latou, fakaasi atu ei ne latou a pati kolā ko oti ne fai atu ki a latou e uiga ki te tamaliki tenei. 18  Kae ko latou katoa kolā ne lagona ne latou ne ofo i mea kolā ne fai atu ne tausi mamoe konā, 19  kae ne tausi eiloa ne Malia a pati katoa konei, kae mafaufau faeloa ki ei i tena loto. 20  Ne ‵foki a tausi mamoe, kae ‵viki kae tavae atu ki te Atua ona ko mea katoa kolā ne lagona kae lavea ne latou, e pelā eiloa mo mea ne fakailoa atu ki a latou. 21  Mai tua o te valu o aso, ko te taimi ke pilitome ei a ia, ne fakaigoa eiloa a ia ki a Iesu, ko te igoa ne fai atu ne te agelu a koi tuai o tupu aka a Ia i loto i te moegatama o tena mātua. 22  I te okoga foki ki te taimi e faka‵ma ei lāua e ‵tusa mo te Tulafono a Mose, avatu ei ne lāua a ia ki Ielusalema ke tuku atu ki mua o Ieova, 23  e pelā eiloa mo te mea e tusi i te Tulafono a Ieova: “A uluaki tāgata katoa e ‵tau o fakatapu mō Ieova.” 24  Ne ofo atu ne latou te taulaga e ‵tusa mo te mea telā e fai mai i te Tulafono a Ieova: “se avā manu eva io me ne punuā lupe e lua.” 25  Kae kiloke! e isi se tagata i Ielusalema e igoa ki a Simeona, a ko te tagata tenei e amiotonu kae fakaaloalogina, e faka‵tali mō te fakamafanafanaga o Isalaelu, kae ne nofo i a ia te agaga tapu. 26  E se gata i ei, ko oti ne fakaasi atu ne te Atua ki a ia e auala i te agaga tapu me e se mafai o mate a ia seiloga ke lavea muamua ne ia a te Keliso a Ieova. 27  Ne ‵taki atu tou tagata ne te agaga tapu ki loto i te faletapu, kae i te avatuga ne ana mātua te tamaliki ko Iesu ke fai ki ei a faifaiga masani o te Tulafono, 28  ne sapai aka ne ia te tamaliki ki ana lima kae tavae atu ki te Atua, ana muna: 29  “Nei la, te Aliki Sili, ko fakasaoloto ne koe tau pologa ke fano mo te filemu e ‵tusa eiloa mo tau folafolaga 30  me ko oti ne lavea ki oku mata a te tino telā ka aumai ne ia te fakaolataga 31  kae ko oti ne fakatoka ne koe te tino tenā i mua o tino katoa, 32  se mainaga ke tapale ei keatea te pouliga mai atufenua katoa mo te ‵malu foki tenā mō ou tino Isalaelu.” 33  Kae ne mafau‵fau faeloa te tamana mo te mātua o te tamaliki ki mea kolā ne faipatigina e uiga ki te tamaliki. 34  Ne fakamanuia atu a Simeona ki a lāua, kae fai atu ki a Malia te mātua o te tamaliki: “Kiloke! Ka fai a te tamaliki tenei mo pogai e ‵siga kae toe ‵tu aka ei a tino e tokouke i Isalaelu, kae se fakailoga ke takalia‵lia ki ei 35  (e tonu, ka ‵suki a tou loto ki se pelu loa ‵ki), ko te mea ke fakaasi faka‵lei mai a mea i loto o tino e tokouke.” 36  Ne nofo foki i konā te pelofeta fafine ko Ana, te tama fafine a Fanuelu, mai te matakāiga o Asela (Ko matua ‵ki te fafine tenei. Ne ‵nofo fakatasi mo tena avaga i loto i se fitu tausaga mai tua o te lā fakaipoipoga, 37  kae ko mate tena avaga kae i te taimi nei ko valusefulu fa ana tausaga.) Ne seki galo lele a ia mai te faletapu, o tuku atu te taviniga tapu i te po mo te ao mai te fakalikiliki mo te faiga o ‵talo. 38  Ne fanatu a ia i te itula eiloa tenā kae kamata o siki tena fakafetai ki te Atua kae faipati atu e uiga ki te tamaliki ki tino katoa kolā e fakatali‵tali ki te fakasaolotoga o Ielusalema. 39  Tela la, i te otiga ne fai ne lāua a mea katoa e ‵tusa mo te Tulafono a Ieova, toe ‵foki ei latou ki Kalilaia ki te lotou fa‵kai, ko Nasaleta. 40  Kae ne gasolo aka faeloa o matua kae malosi te tamaliki, ne gasolo aka foki tena poto kae ne tumau eiloa i luga i a ia te alofa o te Atua. 41  Ne masani o olo sale ana mātua i tausaga takitasi ki Ielusalema ki te fakamanatuga o te Paseka. 42  Kae i te taimi ko sefululua ei ana tausaga, ne olo atu ei latou e ‵tusa loa mo faifaiga masani o te fakamanatuga. 43  I te otiga o aso konā, ne ‵foki ei latou, kae ko Iesu ne nofo eiloa i Ielusalema kae e se iloa ne ana mātua. 44  Ne faima‵laga atu latou i te aso e tasi mo te manatu me kāti e ‵milo fakatasi a ia mo te lotou kau malaga kae ne kamata ei o ‵sala atu ki a ia i olotou kāiga mo taugasoa. 45  Kae ne seki maua eiloa a ia, toe ‵foki ei lāua ki Ielusalema, o ‵sala faka‵lei atu a ia i ei. 46  Mai tua o aso e tolu kae maua atu ne lāua a ia i te faletapu, e sagasaga i te kogaloto o faiakoga o fakalogologo kae fesilisili atu ki a latou. 47  Kae ne ofo faeloa a latou kolā ne fakalogo‵logo ki a ia i te lasi o tena malamalama, e pelā foki mo ana tali. 48  Ne ‵poi lāua i te laveaga ne lāua a ia, kae ne fai atu tena mātua ki a ia: “Taku tama, kaia ne fai ei ne koe te mea tenei ki a māua? A māua mo tou tamana ne salasala ki a koe mo te manavase.” 49  Kae ne fai atu a ia ki a lāua: “Kaia ne ‵sala ei koulua ki a au? E se iloa ne koulua me e ‵tau au o nofo i te fale o toku Tamana?” 50  Kae ne seki maina lāua i ana pati kolā ne fai atu ki a lāua. 51  Ne olo atu latou ki Nasaleta, kae ne tumau a ia i te fakalogo ki a lāua. Kae ne tausi faka‵lei foki ne tena mātua a pati konei i tena loto. 52  Ne gasolo aka faeloa a Iesu o poto kae malosi kae alofa ki ei te Atua, e pelā foki loa mo tino.

Fakamatalaga mai lalo