Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 19:1-48

19  Ne ui atu a Iesu i loto i Ieliko.  E isi se tagata i konā e igoa ki a Sakaio. A ia se pule o tino ao lafoga, kae e maumea foki.  Ne fia lavea ne ia te tino e igoa ki a Iesu, kae ne seki mafai ne ia ona ko te vaitino, me i a ia se tino toetoe.  Ne tele a ia ke tai ‵mao atu kae kake aka i te lakau ko te sukamolo ko te mea ke lavea ne ia a Iesu me ko pili o oko atu ki te koga tenā.  I te okoatuga a Iesu ki te koga tenā, ne kilo aka ki luga kae fai atu ki a ia: “Sakaio, fanaifo fakavave, me e ‵tau au o nofo i tou fale i te aso nei.”  Ne fanaifo fakavave a ia ki lalo kae talimalo atu ki a Iesu mo te fiafia.  Kae i te laveaga ne latou te mea tenā, ne musu‵musu ei latou katoa, olotou muna: “Ne fai a ia e pelā me se mālō i te fale o te tino agasala.”  Kae ne tu aka a Sakaio kae fai atu ki te Aliki: “Kiloke! Ka tuku atu ne au te āfa o aku mea ki tino ma‵tiva, e te Aliki, a ko so se mea ne maua ne au mai so se tino i se auala sē tonu, ka toe fakafoki atu ne au ki ei e fakafa taimi.”  Ne fai atu ei a Iesu ki a ia: “Ko oti ne oko mai te fakaolataga ki te fale tenei i te aso nei, me i a ia foki se tama a Apelaamo. 10  Me i te Tama a te tagata ne vau o ‵sala kae faka‵sao a tino kolā ne ‵galo.” 11  A koi fakalogo‵logo latou ki mea konei, ne toe fai atu ne ia se tala fakatusa, me ko pili atu a ia ki Ielusalema kae ne mafau‵fau latou me ka fakatu fakavave aka te Malo o te Atua. 12  Ne fai atu ei a ia: “E isi se tagata mai se kaigā aliki ne faimalaga atu ki se fenua ‵mao ke fakamautinoa aka i ei tena pulega fakatupu, ko toe foki mai ei. 13  Ne kalaga atu a ia ki ana tavini e tokosefulu, tuku atu ki a latou e sefulu a mina* kae fai atu, ‘Fakagalue ke oko ki te taimi e toe foki mai ei au.’ 14  Kae ne seki fia‵fia a tino o te fenua ki a ia, uga atu ei ne latou se potukau o sui ke fai atu ki a ia penei, ‘A matou e se ma‵nako ke fai te tagata tenei mo tupu i luga i a matou.’ 15  “I tena fokiatuga i te otiga ne maua tena pule fakatupu, ne kalaga atu ei a ia ki tavini kolā ne tuku atu ki ei a tupe siliva, ke iloa aka me ne a olotou mea ne fakagalue. 16  Ne fanatu te tino muamua, ana muna, ‘Te Aliki, e sefulu a mina ne maua mai i tau mina.’ 17  Fai atu ei ki a ia, ‘Te tavini ‵lei, ko nofogamalie! Ona ko tou fakamaoni i se mea foliki ‵ki, ka pule ne koe a fa‵kai e sefulu.’ 18  Ne vau te tokolua kae fai atu, ‘Ne maua a mina e lima mai i tau mina, e te Aliki.’ 19  Ne fai atu foki a ia ki te tino tenei, ‘A koe foki ka pule ki fa‵kai e lima.’ 20  Kae ne fanatu te suā tino, ana muna, ‘Te Aliki, tenei tau mina ne afifi faka‵lei ne au ki se laugatu. 21  E iloa ne koe, au ne mataku i a koe, i a koe se tino saua; e tata ne koe a tupe kolā ne seki faulu ne koe kae e tau ne koe a fuaga kolā ne seki ‵toki ne koe.’ 22  Ne fai atu ei a ia ki te tavini tenā, ‘Ko fakamasino ne au a koe i au pati eiloa konā ne ‵to mai i tou gutu, te tavini matagā. Ne iloa ne koe i a au se tino saua, e tata ne au a tupe kolā e seki faulu ne au kae tau ne au a fuaga kolā e seki ‵toki ne au, e tonu au? 23  Kaia la ne seki faulu ei ne koe taku tupe siliva ki te page? Kafai e oko mai au, ko tapale ei ne au te tupe fakatasi mo tena pasene.’ 24  “Ne fai atu ei a ia ki tino e takatu‵tu i konā, ‘Puke te mina tenā mai i a ia kae tuku atu ki te tino telā e sefulu ana mina.’ 25  Kae ne fai atu latou ki a ia, ‘Te Aliki, e sefulu ana mina!’— 26  ‘Au e fai atu ki a koutou: So se tino telā e isi ne ana mea ka tuku atu ki ei a mea e uke atu, kae ko te tino telā e seai ne ana mea, ka tapale foki mai i a ia a nai mea kolā e i a ia. 27  E se gata i ei, aumai ki konei oku fili kolā ne seki ma‵nako ke fai au mo olotou tupu ke tamate latou i oku mua.’” 28  I te otiga ne fai atu ne ia a pati konā, mua atu ei a ia i a latou o fano ki Ielusalema. 29  I tena piliatuga ki Petefake mo Petania i te mauga e igoa ki te Mauga o Olive, uga atu ei ne ia a soko e tokolua, 30  kae fai atu ki a lāua: “Olo ki te fa‵kai foliki tenā i lu mua, kae kafai e oko atu koulua ki ei, ka lavea ne koulua se tamā asini e ‵sai i ei, telā e seki sopo aka eiloa se tino i ei. ‵Tala ko aumai ei. 31  Kae kafai e fesili atu se tino ki a koulua, ‘Kaia e ‵tala ei ne koulua te asini?’ Fai atu penei: ‘E manako ki ei te Aliki.’” 32  Ne olo ei a lāua kolā ne uga atu kae ne maua atu ne lāua te asini e pelā eiloa mo ana pati ki a lāua. 33  A koi ‵tala ne lāua te tamā asini kae fai atu a tino i a latou te asini ki a lāua: “Kaia e ‵tala ei ne koulua te tamā asini?” 34  Ne fai atu lāua: “E manako ki ei te Aliki.” 35  Ne ‵taki atu ei ne lāua te asini ki a Iesu, kae ne ‵fola atu ne latou olotou gatu ki luga i te tua o te tamā asini kae fakasopo atu a Iesu ki luga i ei. 36  I tena auala o fano, ne ‵fola faeloa ne latou olotou gatu i te auala. 37  I tena okoatuga eiloa ki te auala i lalo o te Mauga o Olive, ne kamata ei o fia‵fia a soko katoa kae paka‵laga kae tavae atu ki te Atua e uiga eiloa mo galuega ‵mana kolā ko oti ne lavea ne latou, 38  olotou muna: “Ke manuia a Ia telā e vau e pelā me se Tupu i te igoa o Ieova! Ke maua te filemu i te lagi mo te ‵malu i koga tafasili i te ma‵luga!” 39  Kae ne fai atu a nisi Falesaio mai te vaitino ki a ia: “Te Faiakoga, ‵liko atu ou soko.” 40  Ne tali atu a ia: “Au e fai atu ki a koutou: Kafai e se ka‵laga latou, ko fatu konei ka ka‵laga.” 41  I tena piliatuga, ne kilo atu a ia ki te fa‵kai kae tagi i ei ona ko ia, 42  ana muna: “Moi fai ne iloa ne koe i te aso tenei a mea e uiga ki te filemu—kae nei la ko oti ne ‵funa mai i a koe. 43  Me ka oko mai eiloa a aso ka nikoi ei koe ne ou fili ki lakau ko oti ne fakamakai‵kai kae ka fakapuapuagatia ne latou a koe mai ou feitu katoa, 44  kae ka tolo ne latou a koe mo au tama‵liki ki lalo i te laukele, kae ka se tiaki ne latou se fatu i luga i te suā fatu me ne seki iloa ne koe te taimi e fakamasino ei koe.” 45  Ne ulu atu a ia ki loto i te faletapu kae afuli ne ia ki tua a tino kolā e fakatau olotou mea i ei, 46  ana muna ki a latou: “E tusi i te tusi: ‘A toku fale se fale e fai i ei a ‵talo, kae ko fai ne koutou mo fai se ana o tino kai‵soa.” 47  E se gata i ei, ne akoako atu faeloa a ia i loto i te faletapu i aso takitasi. Kae ne ‵sala atu faeloa a faitaulaga pule mo failautusi mo tino ma‵luga o te fenua ke tamate a ia, 48  kae ne seki maua ne latou se auala ke fai ei ne latou te mea tenei, me ne mumu atu faeloa a tino katoa o fakalogo‵logo ki a ia.

Fakamatalaga mai lalo

 E fakasino a mina i konei ki tupe.