Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 18:1-43

18  Ne fai atu ei ne Iesu ki a latou se tala fakatusa e uiga ki te manakoga ke ‵talo faeloa latou kae ke mo a ma ‵fiu,  ana muna: “Ne nofo atu i se fa‵kai e tasi se famasino telā ne seki mataku ki te Atua kae se āva foki ki tino.  Kae ne nofo foki i te fa‵kai tenā se fafine ko mate tena avaga telā ne fanatu ‵soko faeloa ki tou tagata kae fai atu, ‘Onoono faka‵lei ke maua ne au se fakamasinoga tonu mai toku fili.’  Ne seki fia saga atu sale a ia ki te fafine tenā, kae fakamuli ifo, ne fai aka penei ana muna, ‘E tiga eiloa e se mataku au ki te Atua io me e se āva ki se tino,  kae ona ko te tumau o te fafine tenei i te fakalavelave mai ki a au ka fai eiloa ne au se fakamasinoga tonu mō ia ko te mea ke se toe foki mai o fakafi‵ta au ki tena manakoga.’”  Ne fai atu ei te Aliki: “Faka‵logo ki pati ne fai atu ne te famasino, e tiga eiloa e se amiotonu a ia!  E tonu la, e mata, ka se fai eiloa ne te Atua se fakamasinoga tonu mō ana tino filifilia kolā e ka‵laga atu ki a ia i te ao mo te po, e tiga eiloa te lasi o tena loto kufaki mō latou?  Au e fai atu ki a koutou: Ka fai fakavave eiloa ne ia te fakamasinoga tonu mō latou. E ui i ei, kafai e oko mai te Tama a te tagata, e mata, ka maua eiloa ne ia te vaegā fakatuanaki penei i te lalolagi?”  Kae ne fai atu foki ne ia te tala fakatusa tenei ki nisi tino kolā ne tali‵tonu ki a latou eiloa me i a latou e amio‵tonu kae mafau‵fau me e seai se aoga o nisi tino: 10  “E tokolua tāgata ne olo atu ki te faletapu o ‵talo i ei, e tokotasi se Falesaio a ko te suā tino se tino ao lafoga. 11  Ne tu te Falesaio kae kamata o ‵talo kae fai atu a pati konei i tena loto, ‘Te Atua, au e fakafetai atu ki a koe i a au e se fai pelā mo nisi tino, ne tino ‵faomea, tino sē amio‵tonu, tino mulilua io me fai pelā mo te tino ao lafoga tenei. 12  Au e fakalikiliki fakalua i te vaiaso; kae e tuku atu ne au te tasi-vae-sefulu o aku mea katoa e maua.’ 13  Kae ne tu atu te tino ao lafoga i se koga tai ‵mao kae e se mafai o kilo aka ona mata ki te lagi, kae ne pāpā faeloa tena fatafata, ana muna, ‘Te Atua, alofa mai ki a au te tino agasala.’ 14  Au e fai atu ki a koutou: Ne foki atu te tagata tenei ki tena fale kae sili atu tena amiotonu i lō te suā tagata, me ko so se tino e fakamaluga ne ia a ia eiloa ka fakamalalogina, kae ko te tino telā e fakamalalo ne ia a ia ka fakamalugagina.” 15  Ne kamata o avatu ne tino olotou tama‵liki ke fakaeke atu ana lima ki luga i a latou, kae i te laveaga ne ana soko, kamata ei o ‵liko atu ki tama‵liki konā. 16  Kae ne kalaga atu a Iesu ke olo atu a tama‵liki ki a ia, ana muna: “Tuku a tama‵liki ke o‵mai ki a au, kae sa taofigina latou, me i te Malo o te Atua i o tino penā mo latou. 17  Au e fai ‵tonu atu ki a koutou: ‘So se tino e se talia ne ia te Malo o te Atua e pelā me se tamaliki, e se mafai eiloa o ulu ki loto i ei.” 18  Kae ne fesili atu se tino pule ki a ia, ana muna: “Te Faiakoga ‵lei, ne a mea e ‵tau o fai ne au ke maua ei te ola se-gata-mai?” 19  Ne fai atu a Iesu ki a ia: “Kaia e fai mai ei koe i a au e ‵lei? E seai se tino e ‵lei, e tokotasi fua te tino ‵lei, ko te Atua. 20  E iloa ne koe a tulafono: Sa tatino, sa mulilua, sa kaisoa, sa molimau ‵pelo, āva ki tou tamana mo tou mātua.’” 21  Ne fai atu a ia: “Ko oti ne tausi ne au a mea katoa konei talu mai te taimi koi talavou ei au.” 22  I te lagonaga ne Iesu te mea tenā, fai atu ei a ia ki te tagata tenā: “E toe tasi eiloa te mea e galo mai i a koe: Fakatau atu au mea katoa, ko tufa atu ei ki tino ma‵tiva, kae ka maua ne koe a koloa e uke i te lagi, ko vau ei koe o fai mo oku soko.” 23  I te lagonaga ne ia te mea tenei, ne fanoanoa malosi a ia, me ne maumea ‵ki eiloa a ia. 24  Ne kilo atu a Iesu ki a ia kae fai atu: “Ko oko eiloa i te faigata ke ulu atu a tino kolā e uke olotou tupe ki loto i te Malo o te Atua! 25  E tonu, e faigofie atu ke ulu se kamela ki loto i te pu o se nila i lō se tagata maumea ke ulu atu ki loto i te Malo o te Atua.” 26  Ne fai atu ei a tino kolā ne lagona ne latou te mea tenā: “Ko oi la te tino e mafai o sao?” 27  Ana muna: “A mea kolā e se mafai ne tāgata o fai e mafai fua o fai ne te Atua.” 28  Kae ne fai atu a Petelu: “Kiloke! Ko oti ne tiaki ne matou omotou mea kae tau‵tali atu i a koe.” 29  Ne fai atu a Iesu ki a latou: “Au e fai ‵tonu atu ki a koutou: So se tino telā ko oti ne tiaki ne ia tena fale, tena avaga, ana taina, ana mātua io me ko ana tama‵liki mō te Malo o te Atua 30  ka maua ne ia a mea e uke fakafia atu i te vaitaimi tenei e pelā foki mo taimi mai mua, a te ola se-gata-mai.” 31  Ne fakatafa aka ne ia te toko sefululua ki tua kae fai atu ki a latou: “Kiloke! A tatou e olo ki Ielusalema kae ka fakaoti i ei te fakataunuga o mea katoa kolā ne tusi e auala i pelofeta e uiga ki te Tama a te tagata. 32  Ka tuku atu a ia ki tino o fenua fakaa‵tea kae ka fakatauemu atu ki ei kae ta fakamasei kae popoki atu ki ei. 33  Kafai ko oti ne fakapuapuagatia ne latou, ko tamate atu ei; kae i te tolu o aso ka toe fakatu aka ei a ia.” 34  Kae ne seki malamalama latou i uiga o mea katoa konei, me ne ‵funa mai i a latou a pati konei, kae ne seki malamalama latou i pati kolā ne fai atu. 35  I tena piliatuga ki Ieliko e isi se tagata ‵kivi ne sagasaga i tafa o te auala kae e akai mea. 36  Ne lagona ne ia se vaitino e olo atu i konā, kae fesili atu me se a te mea e tupu. 37  Ne fai atu a tino ki a ia: “Ko Iesu te Nasaleta tenā e vau!” 38  Ne pakalaga atu ei a ia, ana muna: “Iesu, te Tama a Tavita, ke alofa* mai koe ki a au!” 39  Kae ne fai atu ki a ia a tino kolā ne olo atu i mua o Iesu ke se fakalogoa, kae ne pakalaga malosi atu faeloa tou tagata: “Te Tama a Tavita, ke alofa* mai koe ki a au!” 40  Ne tu a Iesu kae fakatonu atu ke ‵taki mai te tagata tenā ki a ia. I tena piliatuga, ne fesili atu a Iesu ki a ia: 41  “Se a te mea e manako koe ke fai ne au mō koe?” Ana muna: “Te Aliki, faka‵pula aka oku mata.” 42  Ne fai atu ei a Iesu ki a ia: “Ke ‵kite ou mata, ko tou fakatuanaki ko ‵lei ei koe.” 43  Ne ‵pula fakavave ana mata, tautali atu ei i a Iesu, kae tavae atu ki te Atua. Ne tavae atu foki a tino katoa ki te Atua i te laveaga ne latou a te mea telā ne tupu.

Fakamatalaga mai lalo

 Io me “alofa fakamagalo.”
 Io me “alofa fakamagalo.”