Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 16:1-31

16  Ne fai atu foki a Iesu ki te kau soko: “E isi se tagata maumea telā e isi sena situati, kae ne ‵losi atu ki te situati tenei me ne fakamāumāu ne ia a mea a tena pule.  Ne ‵kami mai ei ne ia te situati tenā kae fai atu ki ei, ‘Se a te mea tenei ko logo au i ei e uiga ki a koe? A koe ko fakatea mai tau galuega me ko se mafai ne koe o tausi faka‵lei ki ei.’  Ne fai aka ei te situati tenā ki a ia eiloa, ‘Se a nei taku mea ka fai me ko oti au ne fakatea ne toku matai? E se lava toku malosi o galue ‵mafa, kae e mā foki au ma akai atu ke maua ne aku mea.  Aaa! Ko iloa ne au taku mea ka fai ko te mea kafai e fakatea au mai te galuega fakasituati, ka talia au ne tino ki loto i olotou fale.’  Ne kalaga atu a ia ki tino katoa kolā ne kaitalafu i tena matai kae fai atu ki te tino muamua, ‘E fia tau kaitalafu i toku matai?’  Ana muna, ‘E selau paelo* o sinu olive.’ Fai atu ei te situati ki a ia, ‘Puke tau feagaiga, nofo ki lalo kae tusi fakavave te aofaki e limasefulu.’  Ne fai atu foki a ia ki te suā tino, ‘Ka ko koe, e fia tau kaitalafu?’ Ana muna, ‘E selau fuaga saito.’ Fai atu ei ki a ia, ‘Puke tau feagaiga kae tusi ki lalo te valusefulu.’  Ne fakamālō atu ei te matai ki te situati, e tiga eiloa tena sē amiotonu, me ne gasuesue a ia mo te poto. Me i tama o te olaga tenei e ‵poto i te fakafesagai atu ki te lotou kautama eiloa i lō tama o te mainaga.  “E se gata i ei, au e fai atu ki a koutou: Ke fai ne otou taugasoa i koloa sē amio‵tonu me kafai ko se aoga a mea konā ka mafai ei ne lāua o faka‵lafi a koutou ki loto i fale se-gata-mai. 10  A te tino telā e fakamaoni i te ‵toe mea foliki eiloa e fakamaoni foki i mea e uke, a ko te tino telā e se amiotonu i te ‵toe mea foliki e se amiotonu foki i mea e uke. 11  Tela la, kafai e se fakamaoni koutou e uiga ki koloa sē amio‵tonu, ko oi la ka fia tuku atu ne ia ki a koutou a tinā mea ‵tonu? 12  Kae kafai e se fakamaoni koutou e uiga ki mea a te suā tino, ko oi la ka tuku atu ne ia ki a koutou a mea kolā ko oti ne fakatoka mō koutou? 13  E seai se tavini e mafai o pologa ki matai e tokolua, me ka takalialia a ia ki te tino e tokotasi kae ka alofa ki te suā tino io me ka ‵piki ‵mau a ia ki te tino e tokotasi kae fakaseaoga ne ia te suā tino. E se mafai o pologa koutou ki te Atua fakatasi mo koloa.” 14  Ne fakalogo‵logo foki a Falesaio, kolā ne tino matatupe, ki mea katoa konei, kae ne kamata o fakatauemu atu latou ki a ia. 15  Ne fai atu ei a ia ki a latou: “A koutou ko tino kolā e fia amio‵tonu i mua o tino, kae e iloa ne te Atua a mea i otou loto, me i te mea telā e fakatāua malosi ne tino se mea fakatakalialia i te kilokiloga a te Atua. 16  “Ne fakagalue te Tulafono mo tusitusiga a te kau pelofeta ke oko ki a Ioane. Mai te taimi tenā o fano ki mua ne folafola atu i ei a te tala ‵lei o te Malo o te Atua, kae e taofi ‵mau eiloa ki ei a tino kese‵kese katoa. 17  E tonu, e faigofie ke ‵galo atu te lagi mo te lalolagi i lō te galo atu o se mataimanu e tasi o te Tulafono kae seki fakataunu. 18  “So se tagata e ‵tala ne ia tena avaga kae e avaga ki se isi fafine e mulilua a ia, a ko te tagata e avaga ki se fafine telā ne ‵tala tena avaga e mulilua foki a ia. 19  “E isi se tagata maumea ne pei sale ki gatu violeta mo gatu lino, kae ne fiafia tou tagata i aso takitasi i se olaga gali. 20  E isi foki se tagata akai mea e igoa ki a Lasalo ne avatu sale o tuku i te mataloa o te ‵pui o tena fale, kae ko ‵fonu eiloa i foge 21  kae e manako o kai ki mea e matutu ifo mai te taipola a te tagata maumea. E tonu, ne olo sale atu foki a kuli o aleale ana foge. 22  Fakamuli ifo, ne mate a te tagata akai mea kae ne ave a ia ne agelu ke nofo i fatafata o Apelaamo. “Ne mate foki te tagata maumea kae ne tanu a ia. 23  Kae ne ‵ti aka ana mata ki luga mai te Tanuga,* a ia ko puapuaga, kae ne lavea ne ia Apelaamo i se koga ‵mao mo Lasalo e nofo i ana fatafata. 24  Ne kalaga atu ei a ia kae fai atu, ‘Toku tamana ko Apelaamo, alofa mai ki a au, kae uga mai a Lasalo ke ufi tena maikao ki te vai ke fakamokomoko aka toku alelo, i a au ko puapuaga i te ‵vela o te afi tenei.’ 25  Kae ne fai atu Apelaamo, ‘Taku tama, ke masaua me ne maua ne koe a mea ‵lei katoa i tou olaga kātoa, kae ne maua ne Lasalo a mea ma‵sei katoa. Kae nei la, ko maua ne ia se olaga fakamafanafana i konei a ko koe ko puapuaga. 26  Kae i tafa o mea katoa konei, ko oti ne fakatu se vanu lasi i te va o māua mo koutou, ko te mea ke se mafai o olo atu a tino kolā e fia olo atu mai konei ki a koutou, kae e se mafai foki o o‵mai a tino mai konā ki a māua.’ 27  Ne fai atu ei a te tagata maumea, ‘I te feitu tenā, e fakamolemole atu au, e te Tamana, ke uga atu a Lasalo ki te fale o toku tamana, 28  me e tokolima oku taina i ei, ko te mea ke tuku atu ne ia se molimau maea ki a latou ke se ‵to mai foki latou ki te koga o puapuaga tenei. 29  Kae ne fai atu Apelaamo, ‘A latou e ‵nofo mo Mose mo te kau Pelofeta; e ‵tau mo latou o faka‵logo ki a latou.’ 30  Kae ne fai atu a ia, ‘Ikai loa, e te Tamana ko Apelaamo, kafai e uga atu se tino mai i tino ‵mate ki a latou, ko sala‵mo ei latou.’ 31  Kae ne fai atu Apelaamo ki a ia, ‘Kafai e se faka‵logo latou ki a Mose mo te kau Pelofeta, ka se tali‵tonu foki latou māfai e fakatu aka se tino mai te mate.’”

Fakamatalaga mai lalo

 A te paelo e tasi e ‵tusa mo te 6 kalone.
 Ke onoono ki te Mataupu Fakaopoopo e 9.