Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 15:1-32

15  Ne fakapili‵pili atu faeloa a tino ao lafoga mo tino agasala katoa ki tafa o Iesu ko te mea ke fakalogo‵logo latou ki a ia.  Kae ne musu‵musu faeloa a Falesaio mo failautusi, kae fai aka penei: “E talia ne te tagata tenei a tino agasala kae e ‵kai fakatasi foki mo latou.”  Kae ne fai atu ne ia te tala fakatusa tenei ki a latou, ana muna:  “Ko oi te tino i a koutou telā e selau ana mamoe, kafai e galo se mamoe e tasi, ka se tuku ne ia te ivasefulu-iva kae fano o ‵sala te mamoe telā ko galo ke oko ki te taimi e maua ei ne ia?  Kafai ko maua ne ia, e amo ne ia te mamoe tenā ki tena tuauma mo te fiafia.  Kae i te taimi e oko atu ei a ia ki tena fale, e ‵kami mai ne ia ana taugasoa mo ana tuakoi, kae fai atu ki a latou, ‘Ke fia‵fia fakatasi tatou me ko oti ne maua ne au taku mamoe telā ne galo.’  Au e fai atu ki a koutou me ka sili atu te fiafia e maua i te lagi māfai e salamō se tino agasala e tokotasi i lō te toko ivasefulu-iva o tino amio‵tonu kolā e se ‵tau o sala‵mo.  “Io me ko oi foki la se fafine e isi ne ana tupe siliva e sefulu, kafai e galo sena tupe siliva e tasi, e se faka‵ka ne ia se moli kae ‵teu tena fale kae salasala faka‵lei atu ki ei ke oko ki te taimi e maua ei ne ia?  Kafai ko maua ne ia, e ‵kami ne ia a fāfine kolā ko ana taugasoa mo ana tuakoi, kae fai atu, ‘Ke fia‵fia fakatasi tatou me ko oti ne maua ne au taku tupe siliva telā ne galo.’ 10  Tela la, au e fai atu ki a koutou, ka maua eiloa ne agelu a te Atua a te fiafia i se tino agasala e tokotasi ko salamō. 11  Ne fai atu ei a ia: “E tokotasi te tagata e isi ne ana tama ta‵gata e tokolua. 12  Kae ne fai atu te tamaliki foliki ki tena tamana, ‘Toku tamana, tuku mai toku vaega i au mea katoa. Ne ‵vae aka ei ne te tamana ana mea katoa i a lāua. 13  I nai aso mai tua ifo i ei, ne puke ne te tamaliki foliki ana mea katoa kae faimalaga atu ki se fenua ‵mao. Ne fakamāumāu ne ia i konā ana mea katoa mai te ola i se olaga matagā. 14  I te taimi ne oti ei ana mea katoa, ne poko se oge lasi i te fenua kātoa, kae ne mativa ei a ia. 15  Ne oko atu ki te taimi ne fano ei a ia o nofo i se tino tonu e tokotasi o te fenua tenā, kae ne uga atu a ia ke fagai puaka i te vao. 16  Kae ne fia kai sale tou tagata ki meakai a puaka, me e seai se tino e fia tuku atu ne mea ki a ia. 17  “I te taimi ne ala aka ei tena mafaufau, ana muna, ‘E tokofia a tino ga‵lue a toku tamana e ‵kai ki falaoa e uke, kae tenei au ka mate i te fiakai i te oge tenei! 18  Au ka tu ki luga o fano ki toku tamana kae fai atu ki ei: “Toku tamana, au ko oti ne agasala ki te lagi e pelā foki ki a koe. 19  Ko se ‵tau au o taku mo fai tau tama. Ke fai au mo fai se tokotasi o au tino galue.”’ 20  Ne tu aka tou tagata ki luga, fano ei ki tena tamana. A koi ‵mao ‵ki a ia kae lavea a ia ne tena tamana, kae ne ‵fonu te loto o tena tamana i te alofa, tele atu ei, ‵sai ki a ia kae sogi atu ki ei. 21  Ne fai atu ei te tama ki a ia, ‘Toku tamana, au ko oti ne agasala ki te lagi e pelā foki ki a koe. Ko se ‵tau au o taku mo fai tau tama. Ke fai au mo fai se tokotasi o au tino galue.’ 22  Kae ne fai atu te tamana ki ana pologa, ‘Fakavave! aumai se gatu, te ‵toe mea ‵lei eiloa, kae fakapei atu ki a ia. Faulu atu se mama ki tena lima kae fakapei atu ne taka ki ana vae. 23  Puke mai foki se tamā pulumakau putaputa, ta, ko te mea ke ‵kai kae fia‵fia tatou, 24  me i taku tama tenei ne mate a ko toe ola mai; ne galo a ko toe maua.’ Kamata ei o fia‵fia latou. 25  “Ne nofo atu tena tama matua i te fatoaga, kae i tena piliatuga ki te fale, lagona ei ne ia a te ‵tagi o pese mo tino e ‵saka. 26  Ne kalaga atu ei a ia ki se tavini e tokotasi kae fesili atu me se a te mea e fai. 27  Ne fai atu ei ki a ia, ‘Ko oti ne vau tou taina kae ko tou tamana ne ta ne ia se tamā pulumakau putaputa me ko foki mai tou tagata mo te malosi.’ 28  Kae ne kaitaua tou tagata kae sē manako o ulu atu ki loto. Ne vau ei tena tamana ki tua kae fakamolemole atu ki a ia ke fanatu ki loto. 29  Ne tali atu tou tagata ki tena tamana, ‘Ko oti au ne galue fakapologa mō koe i tausaga e uke kae ne seki soli aka eiloa ne au sau fakatonuga e tasi, kae ne seki tuku mai eiloa ne koe se tamā kouti ke fia‵fia fakatasi ei au mo oku taugasoa. 30  Kae i te taimi eiloa ne oko mai ei tau tama telā ne fakamāumāu ne ia a mea e ola ei koe fakatasi mo fafine talitagata, ta ei ne koe se tamā pulumakau putaputa mō ia.’ 31  Ne fai atu ei te tamana ki a ia, ‘Taku tama, a koe ne nofo faeloa i oku tafa, a ko aku mea katoa e a koe, 32  kae e ‵tau mo tatou o ‵lifu kae fia‵fia, i tou taina tenei ne mate a ko toe ola mai, ne galo a ko toe maua.’”

Fakamatalaga mai lalo