Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Luka 13:1-35

13  Ko te taimi foki eiloa tenā, ne fakailoa atu ei ne nisi tino kolā ne ‵nofo i konā, ki a Iesu, e uiga ki tino Kalilaia kolā ne tamate ne Pilato kae palu fakatasi olotou toto mo toto o olotou taulaga.  Ne tali atu a ia ki a latou: “I te otou faka‵tau me i tino Kalilaia konei e uke atu olotou agasala i lō tino Kalilaia katoa ona ko te mea ne ‵tupu ki a latou a mea konei?  Ikai loa, au e fai atu ki a koutou, ka fakaseai atu foki a koutou katoa penā seiloga ke sala‵mo koutou.  Io me i te otou faka‵tau, me e sili atu te uke o agasala a te toko sefuluvalu kolā ne siga ki luga i ei te taoa i Siloama, kae ‵mate atu ei, i lō tino katoa kolā ne ‵nofo i Ielusalema?  Ikai loa, au e fai atu ki a koutou, ka fakaseai atu foki a koutou katoa penā seiloga ke sala‵mo koutou.”  Ne fai atu ei ne ia te tala fakatusa tenei: “Ne ‵toki ne se tagata a te lakau ko te mati i tena togavine, fanatu ei o onoono me e isi ne fuaga i luga i ei, kae e seai ne ana mea ne maua.  Ne fai atu ei a ia ki te tino galue i te togavine, ‘Ko tolu nei tausaga ne vau ei au o onoono me e isi ne fuaga i luga i te mati tenei, kae e seai eiloa. ‵Kati ki lalo! Kaia e fakamāumāu ei ne ia te laukele?’  Ne tali atu ei a ia: ‘Te Matai, tuku penā i te tausaga tenei ke keli fakatamilo ne au se lua i ei kae ‵fao atu ki kaiao.  Kafai e fua mai i se taimi mai mua ko ‵lei ei, kae kafai e se fua mai, ko ‵kati ei ne koe ki lalo.’” 10  Ne akoako atu a ia i se sunako e tasi i te Sapati. 11  Kae kiloke! e isi se fafine ne masaki i tausaga e sefuluvalu ona ko te agaga masei. Ko makau faka eiloa, kae ko se mafai o tu ‵tonu ki luga. 12  I te laveaga ne Iesu a tou fafine, faipati atu ei ki a ia, ana muna: “Te fafine, ko fakasaoloto koe mai tou masaki.” 13  Ne tuku atu ana lima ki luga i a ia kae ne tu ‵tonu fakavave tou fafine ki luga, kamata ei o tavae atu ki te Atua. 14  Ne kaitaua te ofisa tausi o te sunako me ne fai ne Iesu te faka‵leiga tenā i te Sapati, fai atu ei a ia ki te vaitino: “E ono aso e ‵tau o fai i ei a galuega, tela la, o‵mai ke faka‵lei koutou i aso konā kae e se ko te Sapati.” 15  Kae ne tali atu te Aliki ki a ia, kae fai atu: “A koutou ne tino ‵loi, e a, e se ‵tala ne koutou te otou pulumakau io me se asini kae ‵taki atu latou o fainu i te Sapati? 16  E a, e se tenei te taimi o te fafine tenei, te tama fafine a Apelaamo telā ne saisai ne Satani i tausaga e sefuluvalu, ke fakasaoloto mai te saisaiga tenei i te Sapati?” 17  I te faiatuga ne ia o pati konei, ne masiasi ei a tino ‵teke, kae ne kamata o fia‵fia te vaitino i mea fakaofoofogia kolā ne fai ne ia. 18  Tela la, ne fai aka ei ana muna penei: “Ka fai pefea a te Malo o te Atua, kae se a te mea ka faka‵tusa ne au ki ei? 19  E pelā me se fuaga o te sinapi telā ne puke ne se tino kae tuku atu ki tena fatoaga, ne ola aka ke fai mo fai se lakau lasi, kae ne fai a ofaga o manu eva o te lagi i luga i ana kaula.” 20  Ne toe fai aka a ia penei: “Se a te mea ka faka‵tusa ne au ki ei a te Malo o te Atua? 21  E pelā mo te mea faka‵fete telā ne puke ne se fafine kae ‵funa ne ia i loto i paluga falaoa ‵lasi e tolu ke oko ki te taimi ne ‵fete ei te paluga kātoa.” 22  Kae ne faimalaga atu a ia mai te fa‵kai lasi ki te suā fa‵kai lasi mo te tamā fa‵kai ki te suā tamā fa‵kai, kae akoako atu i tena auala ki Ielusalema. 23  Ne fai atu se tagata ki a ia: “Te Aliki, e a, e mu‵tana fua a tino kolā ka ‵sao?” Ne fai atu a ia ki a latou: 24  “Fakapalele otou mafi ke ulu atu koutou i te mataloa mataliki. Au e fai atu ki a koutou me e tokouke a tino ka taumafai o ulu ki loto i ei kae e se mafai. 25  Kafai ko tu aka te tino i o ia te fale o ‵loka te mataloa, ‵tu koutou i tua o tukituki atu kae fai atu, ‘Te Aliki, ‵tala mai ki a matou. Kae ka tali atu a ia ki a koutou: ‘E se iloa ne au koutou.’ 26  Ka fai aka ei koutou, ‘A matou ne ‵kai kae inu i ou mua, a ko koe ne akoako atu i omotou auala.’ 27  Kae ka fai atu a ia ki a koutou, ‘E se iloa ne au koutou. Olo keatea mai i a au, koutou tino sē amio‵tonu!” 28  Tenā te koga ka ‵tagi mautuutu ei koutou kae fai otou lili i ei. Ka lavea i ei ne koutou a Apelaamo, Isaako, Iakopo mo pelofeta katoa i te Malo o te Atua, a ko koutou e ‵pei ki tua. 29  E se gata i ei, ka o‵mai a tino mai koga i te saegala mo te togala mo mātū mo saute kae ka saga‵saga i te taipola i te Malo o te Atua. 30  Kae kiloke! a latou kolā ne fakamuli ka ‵mua, a ko latou kolā ne ‵mua ka fakamuli.” 31  Ko te itula eiloa tenā, ne olo atu ei a nisi Falesaio ki a ia, kae fai atu: “Fano keatea mai konei, me i a Helota e manako o tamate koe.” 32  Kae ne fai atu a ia ki a latou: “Olo o fai ki te alope tenā, me ko afuli ne au a temoni, ka faka‵lei ne au a tino i te aso nei mo te aso ma taeao, kae ka oti au i te tolu o aso.’ 33  E tiga te feitu tenā, au ka fano eiloa keatea i te aso nei, te aso ma taeao, mo te aso mai tua ifo i ei me e seai se pelofeta e talia ke tamate i tua o Ielusalema. 34  Ielusalema, Ielusalema, ne tamate ne koe a pelofeta kae peipei ki fatu a tino kolā ne uga atu ki a koe—e pefea te uke o taimi ne manako ei au o fakamaopoopo mai au tama‵liki e pelā me se moa fafine e fakamaopoopo ne ia ana punua moa mai lalo i ana kapakau, a ko koutou ne seki ma‵nako ki ei! 35  Kiloke! A koutou ka afuli keatea mai te otou fale. Au e fai atu ki a koutou, ka se toe mafai o lavea ne koutou au ke oko ki te taimi e fai aka ei koutou penei: ‘Ke manuia a ia telā e vau i te igoa o Ieova!’”

Fakamatalaga mai lalo