Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 11:1-54

11  I te taimi ne nofo atu ei a Iesu i se koga o ‵talo, kae i tena otiga, ne fai atu ei sena soko e tokotasi ki a ia, penei: “Te Aliki, akoako mai ki a matou te faiga o te ‵talo, e pelā eiloa mo te akoakoga ne Ioane o ana soko.”  Ana muna ki a latou: “I so se taimi e ‵talo ei koutou, fai atu penei: ‘Te Tamana, ke tapu tou igoa. Ke oko mai tou malo.  Tuku mai omotou meakai e ‵tau mō te aso e ‵tusa mo mea e manakogina mō te aso nei.  Kae fakamagalo mai omotou agasala, me e fakamagalo foki ne matou a tino kolā e ‵se* mai ki a matou, kae sa takitakigina matou ki tofotofoga.’”  E se gata i ei, ne fai atu foki a ia ki a latou: “Kāti e isi se tino i a koutou e isi sena taugasoa kae e fanatu ki a ia i te valuapo kae fai atu ki ei, ‘Toku taugasoa, ke kaitalafu aka ne au ne falaoa e tolu  me ne fatoa oko mai soku takaga mai se malaga ‵mao kae e seai ne aku mea ke tali ei a ia.’  Kae ne tali atu te tino i loto i te fale, ‘Sa fakalavelave mai ki a au. Ko oti ne ‵loka te mataloa, kae ko ‵moe matou mo aku tama‵liki. E se mafai ne au o tu ki luga o tuku atu ki a koe se mea.’  Au e fai atu ki a koutou: E tiga eiloa e se tu a ia ki luga o tuku atu se mea ki a ia ona ko lāua e taugasoa, kae ona ko tena loto toa o kinau atu faeloa ka tu eiloa a te tagata tenā ki luga o tuku atu a mea e manako a ia ki ei.  Tela la, au e fai atu ki a koutou: Ke tumau i te fakamolemole atu, kae ka tuku mai ki a koutou; ke tumau i te ‵sala atu, kae ka maua ne koutou; ke tumau i te tukituki atu, kae ka ‵tala mai ki a koutou. 10  Me ko so se tino e fakamolemole atu ka tuku atu ki a ia, kae ko so se tino e salasala atu, ka maua ne ia, kae ko so se tino e tukituki atu, ka ‵tala mai ki a ia. 11  E tonu, ko oi te tamana i a koutou telā e fakamolemole atu tena tama ki se ika, kae tuku atu ne ia se gata ki a ia i lō se ika? 12  Io me e fakamolemole atu mō se fuamoa, kae tuku atu ki ei se akalava? 13  Tela la, e tiga eiloa a koutou ne tino ma‵sei kae e iloa ne koutou o tuku atu a meaalofa ‵lei ki otou tama‵liki, e se sili atu la te otou Tamana i te lagi i te fia tuku atu ne ia o te agaga tapu ki a latou kolā e fakamolemole atu e uiga ki ei!” 14  Fakamuli ifo, ne afuli keatea ne ia se temoni gūgū. I te fanoga keatea o te temoni, faipati ei te tagata gūgū. Ne ofo masei i ei te vaitino. 15  Kae ne fai mai a nisi tino o latou: “E afuli keatea ne ia a temoni e auala i a Pelesepulo, te pule o te kau temoni.” 16  A ko nisi tino, ne tofotofo ne latou a ia mai i te ‵sala atu ki se fakailoga ke fai ne ia mai te lagi. 17  Ne iloa ne ia olotou mafaufauga, fai atu ei ki a latou: “So se malo e ‵nofo mavae‵vae e se mafai o tumau, kae ko te kāiga telā e ‵nofo mavae‵vae e malepe. 18  Tela la, kafai e nofo mavaevae foki a Satani i a ia eiloa, e mafai la pefea o tu tena malo? Me e fai mai koutou me e afuli ne au a temoni e auala i a Pelesepulo. 19  Kafai e afuli ne au a temoni e auala i a Pelesepulo, e auala i a ai e afuli ei ne otou tama a temoni? Ona ko te mea tenei ka fakamasino ei ne latou a koutou. 20  Kae kafai e afuli ne au a temoni e auala i te agaga* o te Atua, ko tena uiga ko oti ne oko mai te Malo o te Atua kae e se iloa ne koutou. 21  Kafai e puipui ne se tagata mafi telā e toka ‵lei ana meatau, a tena palesi, ka se mafai eiloa o ‵galo ana mea i ei. 22  Kae kafai e taua atu se tagata telā e mafi atu i a ia kae fakatakavale ne ia a ia, e puke ne te tagata tenā ana meatau katoa kolā e faka‵na a ia ki ei, kae tufatufa atu ne ia a kope kolā ne ‵fao ne ia mai i a ia. 23  A te tino telā e se kau ki a au e ‵teke ki a au, a ko te tino telā e se ga‵lue māua o fakamaopoopo mai a tino, e faka‵kalo ne ia a tino. 24  “Kafai e fano ki tua se agaga masei mai se tino, e ui atu a ia i loto i koga ‵vela o ‵sala se koga mō ana malōlō, kae kafai e se maua, ko fai aka ei a ia penei, ‘Au ka toe foki ki toku fale telā ne vau au i ei.’ 25  Kae i tena okoatuga ki ei ne maua atu ne ia me ko ‵ma pakipaki kae teu fakagaligali te fale. 26  Ne toe fano a ia kae puke mai a nisi agaga e tokofitu kolā e ma‵sei atu i a ia, kae i te lotou uluatuga ki loto i te fale, ‵nofo ei latou i konā. Ka sili atu la te masei o te ikuga o te tagata tenā i lō te taimi muamua.” 27  A koi fai atu ne ia a pati konei ne kalaga mai se fafine mai te vaitino kae fai atu ki a ia: “E fiafia te moegatama telā ne tauave ne ia koe mo ū kolā ne mitimiti ei koe!” 28  Kae ne fai atu a Iesu: “Ikai, e se penā. Kae e fia‵fia a latou kolā e lagona ne latou te muna a te Atua kae tausi ki ei!” 29  I te taimi ne mumu fakatasi ei te vaitino, fai atu ei a ia: “A te kautama tenei se kautama matagā. Me e ‵sala faeloa latou ki se fakailoga. Kae ka seai se fakailoga e tuku ki a latou kae na ko te fakailoga e uiga ki a Iona. 30  Me e pelā eiloa mo Iona ne fai mo fakailoga ki tino Nineva, ka penā foki te Tama a te tagata ka fai mo fakailoga ki te kautama tenei. 31  Ka toe fakatu aka te tupu fafine mai saute i te taimi o te fakamasinoga fakatasi mo tino o te kautama tenei kae ka taku fakamasei ne ia a latou; me ne vau a ia mai kapakapalagi o te lalolagi o fakalogologo ki te poto o Solomona. Kae kiloke! e isi se mea e sili atu i a Solomona ko nofo i konei. 32  Ka toe faka‵tu aka a tino Nineva i te taimi o te fakamasinoga fakatasi mo te kautama tenei kae ka taku fakamasei ne tino konā a latou konei me ne sala‵mo latou i te talaiga a Iona. Kae kiloke! e isi se mea telā e sili atu i a Iona ko nofo i konei. 33  Kafai e oti ne faka‵ka ne se tino te moli, e se tuku ne ia i se koga sē lavea io me mai lalo i se kete,* kae e tuku atu ki luga i te tugamoli, ko te mea ke lavea ne tino kolā e ulu mai ki loto a te mainaga. 34  A te moli o te foitino ko ou mata. Kafai e faigofie tau kilo, ka maina foki ei tou foitino kātoa, kae kafai e masei, e pouli foki tou foitino. 35  Tela la, ke matapulapula koe, ko te mea ke se pouli a te mainaga telā i loto i a koe. 36  Kafai e maina tou foitino kātoa kae e seai se vaega i ei e pouli, ka maina atu eiloa e pelā me se moli telā e maina atu ki a koe.” 37  I te otiga o ana pati konei, ne ‵kami ei a ia ne se Falesaio ke ‵kai fakatasi lāua. Ne fano ei a ia ki loto kae sagasaga i te taipola. 38  Ne ofo te Falesaio i te laveaga ne ia me ne seki ‵fulu muamua ana lima. 39  Kae ne fai atu te Aliki ki a ia: “A koutou e Falesaio, e ‵fulu ne koutou te tua o te ipu mo te tifa, kae i loto i a koutou e ‵fonu i te fiafai mea mo mea ma‵sei. 40  Tino va‵lea! A te tino telā ne faite ne ia te tua o te ipu ne faite foki ne ia te koga i loto, e tonu au? 41  Tela la, tuku atu a mea i otou loto mo fai otou meaalofa, kae kiloke! ka ‵ma foki a mea katoa e uiga ki a koutou. 42  Kae kalofa eiloa i a koutou e Falesaio, me e tuku atu ne koutou te tasi-vae-sefulu o fuaga o te mili mo te pekano mo nisi fuaga lakau kaina katoa, kae e manatu ma‵ma koutou ki te amiotonu mo te alofa o te Atua! A mea konei e ‵tau eiloa o fai ne koutou, kae ke mo a foki ma manatu ma‵ma koutou ki nisi mea konā. 43  Kalofa eiloa i a koutou e Falesaio, me e fia saga‵saga koutou i nofoga tafa ki mua i sunako kae ke fakatalofa atu a tino ki a koutou i fale maketi! 44  Kalofa eiloa i a koutou, me i a koutou e ‵pau eiloa mo tanuga kolā e se mafai o lavea faka‵lei, e sa‵sale a tino i luga i ei e aunoa mo te iloa ne latou!” 45  Ne tali atu se tagata telā e poto i te Tulafono kae fai atu ki a ia: “Te Faiakoga, ko fakalogo‵mae ne koe matou i au pati konā.” 46  Fai atu ei a Iesu ki a ia: “Kalofa foki eiloa i a koutou kolā e ‵poto i te Tulafono, me e fakaeke ne koutou ki luga i tino a amoga kolā e faigata o amo, kae e se mafai o fakapatele atu ne koutou se matikao e tasi ki amoga konā! 47  Kalofa eiloa i a koutou, me e faite ne koutou a tanuga o pelofeta, kolā ne tamate ne otou tupuga! 48  A koutou ko molimau ki mea kolā ne fai ne otou tupuga kae ne talia foki ne koutou, me ne tamate ne latou a pelofeta kae e faite ne koutou olotou tanuga. 49  Ona ko te mea tenei, e fai mai foki te Atua i tena poto: ‘Ka uga atu ne au ki a latou a pelofeta mo apositolo, kae ka fakasaua kae tamate ne latou a nisi tino i a latou. 50  Ko i luga i te kautama tenei a toto o pelofeta katoa kolā ne ma‵ligi talu mai te kamataga o te lalolagi, 51  mai i te toto o Apelu ki te toto o Sakalia telā ne tamate i te va o te fatafaitaulaga mo te faletapu. E tonu, au e fai atu ki a koutou: Ko i luga i te kautama tenei a olotou toto. 52  “Kalofa eiloa i a koutou kolā e ‵poto i te Tulafono, me ne ave ne koutou keatea te kī o te malamalama. Me e se ulu koutou ki loto, kae e taofi foki ne koutou a latou kolā e fia ulu ki loto i ei!” 53  Tela la, i tena fanoga ki tua mai konā, kamata ei o fakalavelave malosi atu ki a ia a failautusi mo Falesaio kae fai atu olotou fesili e uke e uiga ki nisi mea, 54  ko te mea ke lamalama ne latou a ia i ana pati e fai.

Fakamatalaga mai lalo

 I te ‵gana Eleni, “se kaitalafu.”
 I te ‵gana Eleni, ko te “matikao o te Atua.”
 Io me “se kete e fua ei a mea.”