Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Luka 10:1-42

10  I te otiga o mea konei, ne fili aka ei ne te Aliki a nisi tino e toko fitusefulu kae uga atu ne ia taki tokolua ke ‵mua atu i a ia ki fa‵kai katoa mo koga kolā ka fanatu foki a ia ki ei.  Ne fai atu ei a ia ki a latou: “Ko oko eiloa i te uke o fuataga e ‵tau o tau, kae e mu‵tana a tino ga‵lue. Tela la, fakatagi atu ki te Matai o te galuega ke uga mai a tino faigaluega o tau a fuataga.  Olo la. Kiloke! E uga atu ne au koutou e pelā me ne tamā mamoe i va o luko.  Sa ave ne otou taga tupe, io me ne taga meakai, io me ne taka, kae sa fakafeiloai atu ki so se tino i te auala.  I so se fale e ulu koutou ki ei, fai atu muamua penei: ‘Ke i te fale tenei a te filemu.’  Kae kafai e nofo i konā se taugasoa o te filemu, ka maua ei ne ia te otou filemu. Kae kafai e seai, ko toe fakafoki mai ei te otou filemu ki a koutou.  ‵Nofo i te fale tenā, ‵kai kae inu a mea kolā e avatu ne latou ki a koutou, me e ‵tau o maua te ‵togi o te tino galue. Sa ‵fuli te otou koga ‵nofo mai se fale e tasi ki te suā fale.  “E se gata i ei, i so se fa‵kai e oko atu koutou ki ei kae talia ne latou koutou, ‵kai ki mea kolā e tuku atu ki a koutou,  faka‵lei a tino ma‵saki, kae fai atu ki a latou: ‘A te Malo o te Atua ko pili atu ki a koutou.’ 10  Kae i so se fa‵kai e oko koutou ki ei kae e se talia ne latou a koutou, olo la i loto i ana auala ‵lasi kae fai atu penei: 11  ‘A ‵pefu mai te otou fa‵kai kolā ne ‵piki ki omotou vae ka tuetue atu ne matou ki a koutou. E ui i ei, ke masaua te mea tenei, me i te Malo o te Atua ko pili mai.’ 12  Au e fai atu ki a koutou me ka feoloolo atu a Sotoma i te aso tenā i lō te fa‵kai tenā. 13  Kalofa eiloa i a koe e Koasini! Kalofa eiloa i a koe e Petesaita! Moi ne fai a galuega ‵mana kolā ko oti ne fai i a koutou i Tulo mo Saitonu, penei ko leva ne sala‵mo latou mai te saga‵saga i luga i ‵pefu mo gatu lautaga. 14  Ka feoloolo atu foki a Tulo mo Saitonu i te fakamasinoga i lō koutou. 15  A ko koe e Kapanaumi, e mata, ka fakamaluga aka koe ke oko ki te lagi? A koe ka ‵pei ‵tuki ki lalo i te Tanuga!* 16  “Ko te tino telā e fakalogo ki a koutou e fakalogo foki ki a au. Kae ko ia telā e se fia saga atu ki a koutou e se fia saga mai foki ki a au. E se gata i ei, a ia telā e se fia saga mai ki a au e se fia saga foki ki a ia telā ne uga mai ne ia au.” 17  Ne toe ‵foki atu te toko fitusefulu mo te fia‵fia, olotou muna: “Te Aliki, ne faka‵logo mai foki a temoni ki a matou mai te fakaaogaga o tou igoa.” 18  Ne fai atu ei a ia ki a latou: “Ne lavea ne au a Satani ko tō ifo mai te lagi e pelā me se uila. 19  Kiloke! ko oti ne tuku atu ne au ki a koutou a te pule ke lakalaka a gata mo akalava, e pelā foki mo malosi katoa o te fili, kae ka seai eiloa se mea ka fakalogo‵mae atu ki a koutou. 20  E tiga te feitu tenā, sa fia‵fia me i agaga ma‵sei ko faka‵logo ki a koutou, kae ke na fia‵fia me ko oti ne tusi otou igoa i te lagi.” 21  I te itula eiloa tenā, ne ‵fonu a ia i te fiafia ona ko te agaga tapu kae fai atu: “E tavae koe ne au i mua o tino katoa e toku Tamana, te Aliki o te lagi mo te lalolagi, me ko oti ne ‵funa faka‵lei ne koe a mea konei mai i tino ‵poto mo tino ne akoakogina, kae fakaasi atu ne koe ki pepe. E tonu, e toku Tamana, me tenā loa te faiga ne talia ne koe. 22  Ko oti ne tuku mai a mea katoa ne toku Tamana ki a au, kae e seai se tino e iloa ne ia te Tama kae na ko te Tamana. E seai se tino e iloa ne ia te Tamana kae na ko te Tama mo tino ei kolā e manako te Tama o fakaasi atu ki a latou.” 23  Ne mafuli atu a ia ki ana soko i a latou eiloa kae fai atu: “E fia‵fia a mata kolā e lavea ne latou a mea kolā e lavea ne koutou. 24  Me e fai atu au ki a koutou: E tokouke a pelofeta mo tupu ne fia lavea ne latou a mea kolā ko lavea nei ne koutou kae e seki lavea ne latou, kae ne fia lagona ne latou a mea kolā ko lagona nei ne koutou kae e seki lagona ne latou.” 25  Ne tu aka se tino telā e poto i te Tulafono o tofotofo a ia kae fai atu: “Te Faiakoga, se a te mea e ‵tau o fai ne au ke maua ei te ola se-gata-mai?” 26  Muna a Iesu ki a ia: “Se a te mea e tusi i te Tulafono? Se a te mea ne faitau ne koe?” 27  Ne tali atu a ia: “E ‵tau mo koe o alofa ki a Ieova tou Atua mo tou loto kātoa, tou foitino kātoa, tou malosi kātoa, mo tou mafaufau kātoa’ kae ke alofa foki ki ‘tou tuakoi e pelā mo koe ki a koe eiloa.’” 28  Muna a Iesu ki a ia: “E tonu tau tali. ‘Ke na fai faeloa te mea tenā kae ka maua ei ne koe te ola.’” 29  Kae ne manako tou tagata ke fakatalitonu atu i a ia e tonu, fai atu ei ki a Iesu: “Ko oi la toku tuakoi?” 30  Ne tali atu a Iesu: “E isi se tagata ne fanaifo mai i Ielusalema ki Ieliko kae fetaui mo tino ‵faomea kolā ne ta ne latou kae tapale ana gatu, puke ana mea katoa, kae tiakina atu me ko tai mate. 31  Ne fanatu foki i te auala tenā se faitaulaga, kae i te laveaga ne ia tou tagata, ne fakasili a ia i te suā feitu o te auala o fano. 32  E penā foki te tino Levi, i te okoatuga ki te koga tenā kae lavea ne ia te tagata tenā, fakasili aka foki i te suā feitu o te auala o fano. 33  Kae ne fanatu foki se tino Samalia i te auala tenā kae oko atu ki te tagata tenā, kae i te laveaga ne ia, fanaka ei tena alofa ki a ia. 34  Ne fanatu tou tagata ki ei, saisai ana pa‵kiaga, kae ‵ligi atu a sinu mo uaina ki luga i ei. Ne fakasopo ne ia te tagata tenā ki tena manu kae avatu ki se fale talimalo kae tausi atu ki a ia. 35  I te suā aso, ne puke ne ia a tenali e lua, tuku atu ki te tausi o te fale talimalo, kae fai atu, ‘Tausi aka ne koe te tagata tenei, kae ka toe ‵togi atu ne au so se aofaki e sili atu i tupe konei māfai e toe foki mai au.’ 36  Ko oi la i a latou tokotolu konei ne fai mo fai se tuakoi o te tagata telā ne ta ne tino ‵faomea?” 37  Ana muna: “Ko te tino telā ne fai ne ia a faiga a‵lofa ki a ia.” Fai atu ei a Iesu ki a ia: “Fano la, kae fai faeloa ne koe te mea tenā.” 38  I te taimi ne olo ei latou, ne oko atu a ia ki se fa‵kai. Ne talimalo ei a ia ne se fafine e igoa ki a Maleta i tena fale. 39  E isi foki sena taina e igoa ki a Malia, telā ne sagasaga i lalo i vae o te Aliki kae fakalogologo atu faeloa ki ana pati. 40  Kae ko Maleta, ne fakalavelave faeloa i te uke o ana tiute e fai. Ne fanatu ei tou fafine kae fai atu: “Te Aliki, e a, e ‵lei ki a koe ke tiaki mai au ne toku taina ke fai katoa ne au a mea konei? Fai atu la ki ei ke tu mai o fesoasoani mai ki a au.” 41  Ne tali atu te Aliki ki a ia: “Maleta, Maleta, a koe e manavase faeloa ki mea e uke. 42  Kae ne nai mea fua io me e tasi fua te mea e manakogina ke fai. Ne filifili ne Malia te vaega ‵lei, kae ka se mafai o ave keatea mai i a ia.”

Fakamatalaga mai lalo

 Ke onoono ki te Mataupu Fakaopoopo e 9.