Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Loma 7:1-25

7  E mata, e se iloa ne koutou, e oku taina, (au e faipati atu ki a latou kolā e iloa ne latou te tulafono,) me i te Tulafono ko te matai o te tagata i tena olaga kātoa?  E pelā mo te mea tenei, a te fafine avaga e ligina ne te tulafono ki tena avaga i te taimi e ola ei a ia. Kae kafai ko mate tena avaga, ko saoloto ei a ia mai te tulafono a tena avaga.  Tela la, kafai koi ola tena avaga kae toe avaga ki se isi tagata, ko fai ei a ia mo fai se fafine mulilua. Kae kafai ko mate tena avaga, ko saoloto ei a ia mai tena tulafono kae ko se fai foki a ia mo fai se fafine mulilua māfai e toe avaga a ia ki se isi tagata.  Tela la, e oku taina, a koutou ko oti ne fai ke ‵mate ki te Tulafono e auala i te foitino o Keliso, ko te mea ke fai koutou mō ia, ko te tino telā ne toe fakatu aka mai te mate, ko te mea ke tuku atu ne tatou ne fuataga ‵lei ki te Atua.  Me i te taimi koi ola ei tatou faka-te-foitino, ne ga‵lue i loto i a tatou a manakoga agasala kolā ne fakamalosi aka ne te Tulafono ko te mea ke ‵fua mai i a tatou a fuataga o te mate.  Kae nei la ko oti ne fakasaoloto tatou mai te Tulafono, me ko oti ne ‵mate tatou ki mea kolā ne ‵sai ne ia tatou, ko te mea ke fai tatou mo pologa e auala i te agaga i se auala fou, kae e se ko te auala mua e auala i te tulafono tusia.  Ne a la ‵tou pati ka fai atu? E mata, a te Tulafono ko te agasala? Ikai loa! Me moi ne seai se Tulafono penei e se iloa ne au te uiga o te agasala; e pelā mo te mea tenei: “Sa kaimanako,” penei e se iloa lele ne au te kaimanako.  Kae e auala i te fakatonuga tenā ko maua ei ne te agasala a te avanoaga ke fakagalue i loto i a au a vaega kese‵kese o te kaimanako, me e mate te agasala māfai e seai se tulafono.  E tonu, au ne ola mua e aunoa mo te tulafono, kae i te taimi ne oko mai ei a te fakatonuga, ne toe ola mai ei te agasala, a ko au ko mate. 10  Ne iloa ne au me i te fakatonuga telā e ‵tau o iku atu ki te ola, e iku atu fua ki te mate. 11  Me e auala i te fakatonuga ko maua ei ne te agasala a te avanoaga ke malei kae tamate ne ia au. 12  Tela la, a te Tulafono e tapu, a te fakatonuga e tapu, e amiotonu, kae ‵lei. 13  Tela la, e mata, ne iku atu a te mea ‵lei ki toku mate? Ikai loa! Kae ne aumai ne te agasala te mate ki a au, ko te mea ke matea faka‵lei atu te agasala mai te fakaaogaga o te tulafono ‵lei ke fakalasi aka ei te masei o te agasala. 14  Me e iloa ne tatou i te Tulafono se mea faka-te-agaga; a ko au se tagata faka-te-foitino, telā ne fakatau atu mo fai te pologa a te agasala. 15  Me e se malamalama au i aku mea e fai. Me e se fai ne au a te mea telā e manako au o fai; kae e fai ne au a te mea telā e takalialia au ki ei. 16  Kae kafai e fai ne au a te mea telā e se manako au o fai, e talitonu au i te Tulafono e ‵lei faeloa. 17  Kae nei la, ko se toe fai ne au a te mea tenā, kae ko te agasala telā e nofo i loto i a au e fai ne ia. 18  E iloa ne au me e seai se mea ‵lei e nofo i loto i toku foitino tenei. Kae e isi se manakoga i loto i a au ke fai a te mea ‵lei kae e se mafai ne au o fai. 19  Me ko te mea ‵lei telā e manako au ki ei e se fai ne au, kae ko te mea masei telā e se manako au o fai e fai ne au. 20  Kafai la e fai ne au a te mea telā e se manako au o fai, e se ko au e fai ne au te mea tenā, kae ko te agasala telā e nofo i loto i a au. 21  Ko iloa ei ne au a te tulafono tenei e uiga ki a au: me e se fai ne au a te mea tonu telā e manako au o fai, ona ko te masei telā e nofo i loto i a au. 22  Kae ko toku ‵kanoloto tonu eiloa e fiafia ki te tulafono a te Atua, 23  kae e lagona foki ne au i toku foitino se isi tulafono telā e taua atu ki te tulafono i toku mafaufau kae e takitaki ne ia au ke pologa ki te tulafono o te agasala telā e nofo i toku foitino. 24  Ko oko eiloa i toku fakaalofa! Ko oi la ka fakasao ne ia au mai te foitino telā e takitaki ne ia au ki te mate tenei? 25  Ke fakafetai ki te Atua e auala i a Iesu Keliso te ‵tou Aliki! Tela la, i toku mafaufau au se pologa ki te tulafono a te Atua, kae i toku foitino e pologa au ki te tulafono o te agasala.

Fakamatalaga mai lalo