Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Loma 6:1-23

6  Ne a la ‵tou pati ka fai atu? E mata, ka tumau tatou i te agasala ko te mea ke fakalasi aka ei te alofa tauanoa?  E se mafai lele eiloa o fai penā! Kafai ko oti ne ‵mate tatou e uiga ki te agasala, e mafai pefea o tumau tatou i te ola i loto i ei?  Io me e se iloa ne koutou i a tatou katoa kolā ne papatiso ke ‵kau fakatasi mo Keliso Iesu ne papatiso foki ke ‵mate e pelā mo ia?  Tela la, a tatou ne tanu fakatasi mo ia e auala i te ‵tou papatisoga ke ‵mate e pelā mo ia, me e pelā eiloa mo te ‵toe fakatuakaga o Keliso mai te mate e auala i te ‵mana o te Tamana, e ‵tau foki mo tatou o sa‵sale i se olaga fou.  Me kafai e ‵kau fakatasi tatou mo ia i te mate e pelā mo tena mate, ka ‵kau fakatasi foki tatou mo ia i te toetu e pelā mo tena toetu.  Me e iloa ne tatou me ko oti ne ‵tuki a ‵tou uiga mua ki luga i te lakau fakasaua fakatasi mo ia, ke fai ei ‵tou foitino agasala ke ‵mate, ko te mea ke se toe fai tatou mo fai a pologa a te agasala.  Me ko te tino telā ko oti ne mate ko fakasaoloto mai i ana agasala.  E se gata i ei, kafai tatou ko oti ne ‵mate fakatasi mo Keliso, e tali‵tonu tatou me ka ola fakatasi foki tatou mo ia.  Me e iloa ne tatou i a Keliso ko oti ne toetu aka mai te mate, ko se toe mafai o mate a ia, ko se toe fai te mate e pelā me se matai i luga i a ia. 10  Me i te mate telā ne mate ei a ia, ko te mate telā e fakatasi fua kae ka aoga i taimi katoa ke fakaseai atu ei te agasala, kae nei la ko ola a ia mō te Atua. 11  E penā foki koutou kolā e tali‵tonu i a koutou ko oti ne ‵mate e uiga ki te agasala kae ko ola nei koutou mō te Atua e auala i a Keliso Iesu. 12  Tela la, ke se talia ne koutou ke pule atu faeloa te agasala e pelā me se tupu ki otou foitino i te otou faka‵logo ki olotou manakoga. 13  Ke mo a foki e tuku atu faeloa otou foitino ki te agasala e pelā me ne meatau o faifaiga sē ‵tonu, kae ke tuku atu koutou ki te Atua e pelā me ne tino ne toe ola mai te mate, kae ke tuku atu foki otou foitino ki te Atua e pelā me ne meatau o te amiotonu. 14  Me e se ‵tau o fai te agasala mo fai te matai ki luga i a koutou, ona ko koutou ko se ‵nofo mai lalo i te tulafono kae mai lalo i te alofa tauanoa o te Atua. 15  Se a la te uiga o te mea tenei? E mata, ka fai ne tatou se agasala ona ko te mea ko se ‵nofo tatou mai lalo i te tulafono kae mai lalo i tena alofa tauanoa? E se mafai lele eiloa o fai penā! 16  E a, e se iloa ne koutou me kafai e tuku atu faeloa ne koutou a koutou ki se tino e pelā me ne pologa mai te faka‵logo ki a ia, a koutou ne pologa eiloa a te tino telā e faka‵logo koutou ki ei, me ko te agasala telā e iku atu ki te mate, io me ko te fakalogo telā e iku atu ki te amiotonu. 17  Kae ke fakafetai atu ki te Atua i a koutou ne fai mo pologa a te agasala kae ko oti ne faka‵logo koutou mo te loto kātoa ki akoakoga kolā ne tuku atu ki a koutou. 18  E tonu, ona ko koutou ko oti ne fakasaoloto mai te agasala, ko fai nei koutou mo pologa a te amiotonu. 19  Ona ko te vāi‵vai o otou foitino, ko faipati atu ei au i pati e masani ki ei a tino: me e pelā eiloa mo te tuku sale atu otou foitino mo fai a pologa ki amioga lai‵lai mo amioga solitulafono kolā e iku atu ki te solitulafono, nei la, ke tuku atu otou foitino e pelā me ne pologa a te amiotonu telā ka iku atu ei ki te mauaga o se tulaga tapu. 20  I te taimi ne fai ei koutou mo pologa a te agasala, a koutou ne saoloto mai te amiotonu. 21  Ne a la fuataga kolā ne tau sāle ne koutou i te taimi tenā? Ko mea kolā ko fakamasiasi atu ki a koutou i te taimi nei. Me i te ikuga o mea konā ko te mate. 22  Kae ona ko koutou ko saoloto mai te agasala kae ko pologa nei koutou ki te Atua, ko tau eiloa ne koutou te fuataga ‵ma i se auala tapu, kae i te fakaotiga, ko te ola se-gata-mai. 23  Me i te ‵togi o te agasala ko te mate, a ko te meaalofa telā e tuku mai ne te Atua ko te ola se-gata-mai i a Keliso Iesu te ‵tou Aliki.

Fakamatalaga mai lalo