Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Loma 5:1-21

5  Tela la, me ko oti ne takuamiotonugina tatou ona ko te fakatuanaki, ke na fakatumau la ne tatou te ‵tou va filemu mo te Atua e auala i te ‵tou Aliki ko Iesu Keliso.  Ko ia foki e mafai ei o maua ne tatou a te fakatuanaki e auala i te alofa tauanoa telā ko ‵mautakitaki i ei tatou. Kae ke na fakavae te ‵tou fia‵fia ki luga i te ‵tou fakamoemoega mai te ‵malu o te Atua.  E se gata i ei, ke na fia‵fia tatou i ‵tou puapuaga me e iloa ne tatou me e maua te kufaki e auala i puapuaga;  a te kufaki e maua i ei te taliaga a te Atua, a te taliaga a te Atua e maua mai i ei a te fakamoemoega,  kae e se iku atu a te fakamoemoega tenā ki te fanoanoa; me ko oti ne ‵ligi mai te alofa o te Atua ki ‵tou loto e auala i te agaga tapu telā ne tuku mai ki a tatou.  E tonu, ne mate a Keliso mō tino sē amioatua i te taimi tonu, a koi vāi‵vai ei tatou.  Me e faigata o mate se tino mō se tino amiotonu; kae kāti e mafai fua o mafaufau se tino ke mate a ia mō se tagata ‵lei.  Kae ne fakaasi mai ne te Atua tena alofa ki a tatou i te taimi koi agasala ei tatou, me ne mate a Keliso mō tatou.  Kae e sili atu i ei, ona ko te mea ko oti ne takuamiotonugina tatou i tena toto, ka ‵sao eiloa tatou mai te kaitaua o te Atua e auala i a ia. 10  Kafai ne toe faka‵lei tatou mo te Atua, a koi fai tatou mo ana fili, e auala i te mate o tena Tama, kae e sili atu eiloa nei, me ko oti ne faka‵lei tatou mo ia. Ka faka‵sao eiloa tatou e auala i te ola o Iesu. 11  E se gata i ei, e fia‵fia foki tatou ki te Atua e auala i te ‵tou Aliki ko Iesu Keliso telā ne maua ei ne tatou a te faka‵leiga. 12  Tenā eiloa te pogai ne oko mai ei te agasala ki te lalolagi e auala i te tagata e tokotasi, a ko te mate e auala i te agasala, kae ne faka‵solo atu a te mate ki tino katoa me ko agasala a latou katoa—. 13  Ko leva ne nofo te agasala i te lalolagi mai mua o te Tulafono, kae e seai se tino e fakasala māfai e seai se tulafono. 14  E tiga te feitu tenā, ne pule mai te mate e pelā me se tupu talu mai te taimi o Atamu ke oko eiloa ki a Mose, ke oko foki eiloa ki a latou kolā ne seki agasala e pelā mo te sē fakalogo o Atamu, ko ia telā ne foliga mai e pelā mo te tino telā ka vau fakamuli. 15  Kae e se ‵pau a te ikuga o te meaalofa mo te ikuga o te solitulafono. Me kafai ne ‵mate a tino e tokouke ona ko te solitulafono o te tagata e tokotasi, ka uke atu foki a mea e maua ne tino e tokouke mai te alofa tauanoa o te Atua mo tena meaalofa faivasaga e auala i te tino e tokotasi ko Iesu Keliso. 16  Kae ko mea aoga kolā e maua mai i te meaalofa faivasaga e se ‵pau foki mo mea kolā ne iku mai i te agasala a te tino e tokotasi. Me i te fakamasinoga i te otiga ne solitulafono te tino e tokotasi ko te fakasalaga, kae ko te meaalofa i te otiga ne solitulafono a tino e tokouke ko te takuamiotonugina o latou. 17  Me kafai ne pule mai te mate e pelā me se tupu ona ko te solitulafono o te tagata e tokotasi, e sili atu la te mautinoa i a tatou me i a latou kolā ne maua ne latou te alofa tauanoa mo te meaalofa faivasaga o te amiotonu ka pule atu e pelā me ne tupu e auala i te tagata e tokotasi, ko Iesu Keliso. 18  Tela la, e pelā eiloa mo te ikuga o te solitulafono i te taimi e tasi ko te fakasalaga o tino katoa, e penā foki te takuamiotonugina o tino katoa mō te ola i te faiga fua o se galuega amiotonu e tasi. 19  Me e pelā eiloa mo tino e tokouke ko fai mo tino agasala e auala i te sē fakalogo o te tagata e tokotasi, e penā foki te fai o tino e tokouke mo fai ne tino amio‵tonu e auala i te fakalogo o te tagata e tokotasi. 20  Fakamuli ifo ne oko mai a te Tulafono ko te mea ke mafai o fakauke aka ei a agasala. Kae kafai e uke a agasala kae ka silia atu la te lasi o te alofa tauanoa o te Atua. 21  Se a te pogai? Me e pelā eiloa mo te pule mai o te agasala e pelā me se tupu fakatasi mo te mate, e penā foki a te pule mai o te alofa tauanoa e pelā me se tupu e auala i te amiotonu mō te ola se-gata-mai e auala i a Iesu Keliso te ‵tou Aliki.

Fakamatalaga mai lalo