Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Loma 2:1-29

2  Tela la, e seai eiloa sau fakamasakoga, e toku tagata, faitalia me ko oi a koe. Me e fakamasei ne koe a koe eiloa i mea kolā e fakamasino ne koe ki ei te suā tino, me e fai foki ne koe a mea kolā e fai ne ia.  Ko iloa nei ne tatou i te fakamasinoga a te Atua, e fetaui eiloa mo te munatonu e uiga ki a latou kolā e fai ne latou a mea penā.  Kae e mata, e isi sou manatu, e toku tagata, me kafai e fakamasino ne koe a tino penā kae e fai foki ne koe a mea konā, e a, e mafai o sao koe i te fakamasinoga a te Atua?  Io me e takalialia koe ki te lasi o tena alofa kaimalie, tena fa‵ki, te lasi o tena kufaki me e se iloa ne koe i te Atua e taumafai o takitaki koe ke salamō ona ko tena alofa kaimalie?  Kae ona ko tou loto ‵fika kae sē salamō, e fakaputu fua ne koe te kaitaua mō koe eiloa i te aso o tena kaitaua mo te taimi e fakaasi mai ei te fakamasinoga amiotonu a te Atua.  Kae ka tuku atu ne ia te taui ki tino taki tokotasi e ‵tusa mo olotou galuega ne fai:  ko te ola se-gata-mai ki a latou kolā e ‵sala atu ki te ‵malu mo te fakaaloalo mo mea e se mafai o ‵pala, mai te kufaki i te faiga o galuega ‵lei.  Kae ko latou kolā e fakatau kinau kae se faka‵logo ki te munatonu kae e faka‵logo ki mea ma‵sei, ka fe‵paki eiloa latou mo te kaitaua mo te ita o te Atua.  Ka oko atu eiloa a puapuaga mo te loto mafatia ki luga i tino kolā e fai ne latou a galuega fakapa‵kia tino, e muamua ki tino Iutaia, e pelā foki mo tino Eleni. 10  Kae ko te ‵malu mo te fakaaloalo mo te filemu mō tino katoa kolā e ga‵lue ke maua a mea ‵lei, e muamua ki tino Iutaia, e pelā foki mo tino Eleni. 11  Me i te Atua e se fakailoga tino. 12  A tino katoa kolā ne agasala e aunoa mo te tulafono ka fakaseai atu foki e aunoa mo te tulafono. Kae ko tino katoa kolā ne agasala mai lalo i te tulafono ka fakamasinogina mai lalo i te tulafono. 13  Me e se ko tino kolā e fakalogo‵logo ki te tulafono e amio‵tonu i mua o te Atua, kae ko tino kolā e ola e ‵tusa mo te tulafono ka fai mo fai a tino amio‵tonu. 14  Me kafai e fai ne tino o fenua fakaa‵tea kolā e se ‵nofo mo te tulafono a galuega o te tulafono ona ko lagonaga masani, a te mea tenā se tulafono eiloa ki a latou e tiga eiloa e seai se lotou tulafono. 15  Konā eiloa a tino kolā e fakaasi mai me i akoakoga e uiga ki te tulafono e tusi i olotou loto, kae e molimau mai olotou loto lagona e uiga ki ei, kae i olotou mafaufau, e faka‵se io me e faka‵sao ne latou a latou eiloa. 16  Ka fai eiloa te mea tenei i te aso e fakamasino ei ne te Atua a mea ‵funa a tāgata e auala i a Keliso Iesu, e ‵tusa mo te tala ‵lei telā e folafola atu ne au. 17  Kafai koe e taku se tino Iutaia, kae e fakalagolago ki te tulafono kae e fakamatamata i tou fesokotakiga mo te Atua, 18  kae e iloa ne koe tena loto kae e talia ne koe a mea e sili atu i te ‵lei ona ko te mea ne maua ne koe a akoakoga* mai te Tulafono; 19  kae e talitonu koe i a koe ko fai mo takitaki ki tino ‵kivi, se mainaga mō tino kolā e ‵nofo i te pouliga, 20  e fakatonutonu ne koe a tino va‵lea, e fai koe mo faiakoga o tamā tama‵liki, kae ko maua foki ne koe te fakavae o te poto mo te munatonu i te Tulafono— 21  kae ko koe telā e akoako ne koe te suā tino, e a, e se akoako ne koe a koe eiloa? Kae ko koe telā e talai atu “Sa kaisoa,” e a, a koe e se kaisoa? 22  A ko koe telā e fai atu “Sa mulilua,” e a, e mulilua koe? A ko koe telā e fakaasi atu tou takalialia ki tupua, e a, e kaisoa ne koe a mea i loto i faletapu? 23  A ko koe telā e fakamatamata ki te tulafono, e mata, e se āva koe ki te Atua mai te soli ne koe o te Tulafono? 24  Me “i te igoa o te Atua ko taku fakamaseigina i fenua fakaa‵tea ona ko koutou,” e pelā eiloa mo muna i te tusi. 25  E tonu, e mafai fua o aoga te pilitome māfai e faka‵logo koutou ki te tulafono. Kae kafai e soli ne koe a te tulafono ko fai ei koe e pelā me se tino e seki pilitome. 26  Kae kafai e tausi ne se tino seki pilitome a manakoga amio‵tonu o te Tulafono, e a, ka se fai a ia mo fai se tino telā ko oti ne pilitome? 27  Ka fakamasino ne te tino seki pilitome i te foitino, telā e fakalogo ki te Tulafono, a koe telā e nofo mo te tulafono tusia kae ko oti ne pilitome, kae e soli ne koe te tulafono. 28  Me i a ia e sē se tino Iutaia i ana foliga i tua io me ko te pilitome o te pa‵kili i tua. 29  A ko ia se tino Iutaia i ana foliga i loto, a ko tena pilitome ko te pilitome i tena loto ne te agaga, kae e se ko te tulafono tusia. A tavaega o te tino tenā, e se maua mai i tāgata, kae mai i te Atua.

Fakamatalaga mai lalo

 Io me ko “akoakoga fai gutu.”