Fanatu ki te fakasologa

Fanatu ki te fakasologa o mataupu

Molimau a Ieova

Fili se `gana Tuvalu

Loma 16:1-27

16  E fakailoa atu ne au ki a koutou e uiga ki te ‵tou tuagane ko Fipe, telā se tavini e tokotasi i te fakapotopotoga i Kenikelea,  ko te mea ke talia ne koutou a ia i te Aliki i se auala telā e fetaui mo tino tapu, kae ke fesoasoani atu koutou i so se mea e manako a ia ki ei, me e puipui foki ne ia a tino e tokouke, e pelā foki mo au.  Ke ‵moli atu oku alofaga ki a Piseka* mo Akuila, ko oku taina ga‵lue i a Keliso Iesu,  kolā ne toka o ‵mate mō oku, e se gata fua taku fakafetai ki a lāua kae e pelā foki mo fakapotopotoga katoa o fenua fakaa‵tea.  Ke fakatalofa atu foki ki te fakapotopotoga telā e maopoopo sale i te lā fale. Ke fakatalofa atu ki taku fagasele ko Epaineto, telā se tokotasi o fuataga muamua mai i Asia mō Keliso.  Fakatalofa atu ki a Malia telā ne fai ne ia a galuega e uke mō koutou.  Fakatalofa atu ki a Aneloniko mo Iunia, ko oku kāiga kolā ne falepuipui fakatasi matou, ne tāgata kolā e iloa ‵lei ne te kau apositolo kae ko leva ne ‵kau fakatasi mo Keliso i lō au.  Ke ‵moli atu oku alofaga ki a Amepelia taku fagasele i te Aliki.  Fakatalofa atu ki a Upano te ‵tou taina galue i a Keliso, mo taku fagasele ko Sataku. 10  Fakatalofa atu ki a Apele, telā se tino toaga i a Keliso. Fakatalofa atu ki a latou kolā i te kaufale o Alisopulo. 11  Fakatalofa atu ki a Helotiona toku kāiga. Fakatalofa atu ki a latou kolā i te kaufale o Nakiso kae kolā e tau‵tali i te Aliki. 12  Fakatalofa atu ki a Tufaina mo Tufosa, ko fāfine kolā e ga‵lue malosi i te Aliki. Fakatalofa atu ki a Peseti te ‵tou fagasele, me ne fai ne ia a galuega e uke i te Aliki. 13  Fakatalofa atu ki a Lufo te tino filifilia i te Aliki, mo tena mātua telā ko toku mātua foki. 14  Fakatalofa atu ki a Asugelito, Patelopa, Helama, Fegona, Helemea mo taina kolā e fakatasi mo latou. 15  Fakatalofa atu ki a Filoloko mo Iulia, Neleu mo tena tuagane, mo Olumepa, mo tino tapu katoa kolā e fakatasi mo latou. 16  Ke fakatau fakatalofa atu koutou te suā tino ki te suā tino i te sogi tapu. Ko fakatalofa atu ki a koutou a fakapotopotoga katoa a Keliso. 17  Nei la, ko fakamalosi atu au ki a koutou, e oku taina, ke fakaeteete koutou i a latou kolā e faka‵tupu ne latou a mavae‵vaega mo mea e vāi‵vai ei a tino kae kolā e ‵teke atu ki akoakoga ko oti ne iloa ne koutou, kae ‵kalo foki keatea mai i a latou. 18  Me i tāgata penā e se ne tavini a te ‵tou Aliki ko Keliso, kae e pologa eiloa ki olotou manava; kae e auala i olotou pati takolekole mo pati fakamālō fakaloi‵loi e faka‵segofie ei ne latou a tino loto ‵ma. 19  Ko oti ne iloa ne tino katoa te otou faka‵logo muna tela la, ko fiafia ei au ona ko koutou. Kae e manako au ke ‵poto koutou e uiga ki te mea telā e ‵lei, kae ke va‵lea koutou e uiga ki te mea masei. 20  Me ko pili o tuki pala ne te Atua o te filemu a Satani mai lalo i otou vae. Ke i luga i a koutou a te alofa tauanoa o te ‵tou Aliki ko Iesu. 21  E fakatalofa atu foki ki a koutou a toku taina galue ko Timoteo penā foki mo Lukio, Iasona mo Sosepatelo oku kāiga. 22  E fakatalofa atu foki a Tesio, telā ne tusi ne ia te tusi tenei ki a koutou i te Aliki. 23  E fakatalofa atu a Kaio, telā e nofo au i ei, mo te fakapotopotoga kātoa ki a koutou. E fakatalofa atu a Elata te pule o te fa‵kai, e pelā foki mo tena taina ko Kuata. 24*  —— 25  Ke i luga i a ia telā e faka‵mautakitaki ne ia koutou i te tala ‵lei telā e folafola atu ne au mo te talaiga e uiga ki a Iesu Keliso, e ‵tusa mo te fakaasimaiga o te mea ‵funa kae tapu telā ne ‵funa aka i taimi e uke ko ‵teka 26  kae tenei ko oti ne fakaasi mai; kae ko oti ne fakailoa atu ki fenua katoa e auala i valoaga i tusitusiga tapu e ‵tusa mo te fakatonuga a te Atua telā e seai sena gataga, ke fakamalosi aka ei te fakalogo ona ko te fakatuanaki; 27  Ke vikia te Atua, telā ko ia fua e poto, e auala i a Iesu Keliso ki te se-gata-mai. Amene.

Fakamatalaga mai lalo

 Io me ko “Pisila.”
 E se aofia i tusitusiga faka-Eleni i aso mua a pati konei ‘Ke i luga i a koutou te alofa tauanoa o te ‵tou Aliki ko Iesu. Amene,’ kolā e tai ‵pau mo pati i te fakaotiga o te fuaiupu e 20.