Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Loma 15:1-33

15  A ko tatou kolā e ma‵losi e ‵tau o amo ne tatou a vāivāiga o latou kolā e se ma‵losi kae ke se fakafiafia ifo ki a tatou eiloa.  Ke fakafiafia atu a tino taki tokotasi ki olotou tuakoi mō te lotou ‵lei mo te lotou faiga ke ga‵solo ki mua.  Me ne seki fakafiafia foki ne Keliso a ia eiloa; kae e pelā eiloa mo pati i te tusi: “A fakamaseiga a latou kolā ne fakamasei atu ki a koe ko pa‵ku mai ki luga i a au.”  Me i mea katoa kolā ne tusi i aso mua ne tusi ke akoako ei tatou, me e auala i te ‵tou kufaki mo fakamafanafanaga mai i Tusitusiga Tapu, ko mafai ei o maua ne tatou a te fakamoemoega.  Ke tuku atu ki a koutou ne te Atua telā e tuku mai ne ia te kufaki mo fakamafanafanaga a te kilokiloga telā ne maua foki ne Keliso Iesu,  ko te mea ke ‵viki fakatasi atu koutou i otou gutu ki te Atua mo te Tamana o te ‵tou Aliki ko Iesu Keliso.  Tela la, ke fakatau talia ne koutou te suā tino mo te suā tino e pelā eiloa mo tatou e talia ne Keliso, mō te vikiga o te Atua.  Me e fai atu au ki a koe i a Keliso ne fai eiloa mo fai te tavini a latou kolā ne pilitome mō te fai mea tonu o te Atua, ke fakatalitonu aka ei Ana folafolaga kolā ne fai ki olotou tupuga.  Kae ke ‵viki atu foki a fenua fakaa‵tea ki te Atua ona ko tena alofa fakamagalo. E pelā eiloa mo pati i te tusi: “Tenā te pogai ka fakaasi atu ei ne au a koe ki fenua fakaa‵tea kae ka usu atu ne au a pese o vikiga ki tou igoa.” 10  Kae ne toe fai mai foki a ia: “Ke fia‵fia, a koutou e fenua katoa, fakatasi mo ana tino.” 11  Kae ne toe fai mai foki, penei: “Ke ‵viki atu ki a Ieova, a koutou e fenua katoa, kae ke tavae atu a tino katoa ki a ia.” 12  Kae e fai mai foki a Isaia: “Tenā ka vau te aka o Iese kae ka sae mai i ei se tino ke pule atu ki fenua katoa; kae ka fakamoe‵moe eiloa ki a ia a fenua katoa.” 13  Ke faka‵fonu koutou ne te Atua, telā e tuku mai ne ia te fakamoemoega, ki te fiafia mo te filemu ona ko te otou tali‵tonu ki a ia, ko te mea ke ‵fonu koutou i te fakamoemoega i te ‵mana o te agaga tapu. 14  E talitonu foki au e uiga ki a koutou, e oku taina, me ko ‵fonu foki koutou i te aga‵lei, ona ko koutou ko lasi te otou iloa, kae ko mafai foki ne koutou o fakatau fakamalosi atu te suā tino ki te suā tino. 15  Kae ko tusi atu au ki a koutou mo te loto toa ke fakamaina atu a nisi manatu, e pelā me se isi fakamasauaga ki a koutou. Ko fai ne au a te mea tenei ona ko te alofa tauanoa ne tuku mai ne te Atua ki a au 16  ke fai au mo tavini a Keliso Iesu ki tino o fenua fakaa‵tea. Au e galue i te galuega tapu o te tala ‵lei a te Atua, ko te mea ke talia ne te Atua te ofoatuga o fenua konei e pelā me se taulaga telā e fakatapugina ki te agaga tapu. 17  Tela la, e isi se pogai e fiafia ei au i a Keliso Iesu e ‵tusa mo mea e uiga ki te Atua. 18  Me ka se faipati au e uiga ki se isi mea kae na ko mea fua kolā ko oti ne fai ne Keliso e auala i a au ko te mea ke mafai o faka‵logo a fenua fakaa‵tea, e auala i aku pati mo aku faiga, 19  i te ‵mana o fakailoga mo mea fakaofoofogia, i te ‵mana o te agaga tapu; me ko oti ne talai fakamaea atu ne au te tala ‵lei e uiga ki te Keliso mai i Ielusalema ke oko atu eiloa ki Iluliko. 20  E tonu, ne fai ne au taku fuafuaga ke se folafola atu ne au te tala ‵lei i koga kolā ko oti ne ‵logo i ei e uiga ki te igoa o Keliso, ko te mea ke se fakavae aku galuega ki luga i galuega a te suā tino; 21  kae e pelā eiloa mo pati i te tusi: “Ka lavea ne latou kolā e seki maua ne latou se ‵tala e uiga ki a ia, a ko latou kolā e seki lagona ne latou se mea ka malamalama.” 22  Tenei te pogai ne ‵lave ei au i taimi e uke ke fanatu ki a koutou. 23  Kae nei la, ko seai eiloa ne koga e seki talai au i ei, kae ko leva ne fia fanatu au ki a koutou i tausaga ko ‵teka. 24  Tela la, au e fakamoemoe ke fetaui tatou i taku malaga o fano ki Sepania, kae ke olo tasi tatou mō se taimi toetoe i te auala māfai ko malie toku loto i te ‵kau fakatasi mo koutou i se taimi toetoe. 25  Kae nei la ko pili o faimalaga atu au ki Ielusalema ke tavini atu ki tino tapu i konā. 26  Me ko oti ne fia‵fia a latou kolā i Maketonia mo Akaia ke tuku atu olotou mea e pelā me ne meaalofa mō tino tapu kolā e ma‵tiva i Ielusalema. 27  E tonu, ne fia‵fia eiloa a latou o fai te mea tenā, a ko latou foki e ‵nofo kaitalafu i tino konā. Me kafai ko oti ne maua ne tino o fenua fakaa‵tea a meaalofa faka-te-agaga mai i tino konā, e ‵tau foki o tavini atu latou ki tino konā i mea faka-te-foitino. 28  Tela la, kafai ko oti ne fai ne au te mea tenei, ko te tukuatuga faka‵lei o te meaalofa tenei ki a latou, ko fanatu ei au ki Sepania kae ka mua atu au i a koutou. 29  E se gata i ei, e iloa ne au me kafai e fanatu au ki a koutou e fanatu eiloa au mo fakamanuiaga katoa mai i a Keliso. 30  Nei la, ko fakamalosi atu au ki a koutou, e oku taina, e auala i te ‵tou Aliki ko Iesu Keliso mo te alofa o te agaga, ke ‵talo malosi fakatasi tatou ki te Atua, 31  ko te mea ke fakasao au mai tino sē tali‵tonu i Iuta kae ke talia taku galuega talai ne tino tapu i Ielusalema, 32  ko te mea ke fanatu au ki a koutou mo te fiafia e ‵tusa mo te loto o te Atua, ke fakafou aka ei toku malosi e pelā foki mo koutou. 33  Ke i luga i a koutou katoa a te Atua o te filemu. Amene.

Fakamatalaga mai lalo