Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Loma 12:1-21

12  Tela la, e fakamalosi atu au ki a koutou e auala i te alofa atafai o te Atua, e oku taina, ke ofo atu otou foitino ke fai mo taulaga ola kae tapu, telā e talia ne te Atua, se taviniga tapu mai te fakaaogaga o te malosi o otou mafaufau.  Ke se toe fakaakoako ki te olaga masani tenei, kae ke ‵fuli otou mafaufau, ko te mea ke fakatalitonu aka ne koutou me se a te loto o te Atua telā e gali, e logomalie, kae e ‵lei katoatoa.  Me e auala i te alofa tauanoa telā ne tuku mai ki a au, ko fai atu ei au ki tino taki tokotasi katoa i a koutou ke mo a ma tō fakatāua ne se tino a ia eiloa, kae fai ke maua ne ia se mafaufau ‵lei, e ‵tusa mo te vaega o te fakatuanaki telā ne tufa atu ne te Atua ki a koutou taki tokotasi.  Me e pelā eiloa mo te uke o vaega kese‵kese i loto i te foitino e tasi, kae e se tasi fua te galuega e fai ne vaega katoa konei,  e tiga eiloa e tokouke tatou kae e tasi fua te foitino i te ‵kau fakatasi mo Keliso, kae e fakalagolago te suā tino ki te suā tino.  Tela la, ona ko te kese‵kese o meaalofa ne maua ne tatou e ‵tusa mo te alofa tauanoa ne tuku mai ki a tatou, kafai ko valoaga, ke na ‵valo atu tatou e ‵tusa mo te vaega o te fakatuanaki telā ne tuku mai ki a tatou.  Io me kafai ko te galuega talai, ke na ga‵lue tatou i ei, io me ko te tino telā e akoako, ke na akoako atu eiloa a ia;  io me ko te tino telā e fakamalosi ke na fakamalosi atu eiloa a ia; a ko te tino telā e tufa atu ana mea, ke na fai ne ia te mea tenā mo te kaimalie; a ko te tino telā e takitaki, ke na takitaki atu faka‵lei; a ko te tino telā e fakaasi atu te alofa fakamagalo, ke na fai eiloa ne ia te mea tenā mo te fiafia.  Ke se a‵lofa fakaloi‵loi koutou. Takalia‵lia ki mea ma‵sei, kae puke ‵mau ki mea ‵lei. 10  Ke fakatau a‵lofa koutou i te alofa fakataina te suā tino ki te suā tino. Ke mua o fakaasi atu te āva o te suā tino ki te suā tino. 11  Ke ga‵lue mo te loto finafinau, kae sa paie. Ke faka‵fonu koutou ki te agaga tapu. Ke pologa mō Ieova. 12  Ke fia‵fia ki te otou fakamoemoega. Ke kufaki i puapuaga. ‵Talo faeloa. 13  Fesoasoani ki tino tapu e ‵tusa mo mea e ma‵nako latou ki ei. Fakatumau te uiga talimalo. 14  Fakamanuia atu faeloa ki a latou kolā e fakasaua mai; fakamanuia atu kae sa fetūgina latou. 15  Ke fia‵fia fakatasi mo latou kolā e fia‵fia, kae ‵tagi fakatasi mo latou kolā e ‵tagi. 16  Ke mafau‵fau ki nisi tino e pelā eiloa mo koutou ki a koutou; sa ‵toki ne koutou ne manatu fia ‵poto, kae ke maua ne koutou te loto maulalo. Sa fia ‵poto koutou. 17  Sa taui atu te masei ki te masei. Taumafai o fai a mea ‵lei i te kilokiloga a tino katoa. 18  Fai te mea e mafai o fai ne koutou ke tausi te filemu i te va o koutou mo tino katoa. 19  Aku fagasele, sa taui ma sui, kae tuku atu eiloa ki te kaitaua o te Atua, me ne tusi mai penei: “I a aku te taui ma sui. Ka toe ‵togi atu ne au, ko muna a Ieova.” 20  Kae “kafai e fiakai tou fili, fagai atu a ia. Kafai e fiainu, fainu atu a ia. Me i te faiga o mea konā ka ‵luku atu ei ne koe a malala ‵ka ki luga i tena ulu.” 21  Ke se fakatakavale koutou ne te masei, kae ke fakatakavale faeloa ne koutou a te masei ki te ‵lei.

Fakamatalaga mai lalo