Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Loma 11:1-36

11  Ko fesili atu ei au, E mata, ne tiaki ne te Atua ana tino? Ikai loa! Me i a au foki se tino Isalaelu mai i te fanau a Apelaamo, i te matakāiga o Peniamina.  Ne seki tiaki ne te Atua ana tino, kolā ne saga muamua atu a ia ki ei. Kaia? E a, e se iloa ne koutou a pati i Tusitusiga Tapu e uiga ki a Elia, i tena fameo ki te Atua e uiga ki tino Isalaelu?  “Ieova, ko oti ne tamate ne latou au pelofeta, ko oti ne ofa ne latou au fatafaitaulaga, kae ko au fua tenei e ‵toe, kae nei la ko salasala foki ke tamate ne latou au.”  Kae ne a pati a te Atua ki a ia? “Ko oti ne faka‵toe ne au mō oku a tāgata e toko 7,000 kolā e seki ifo eiloa ki a Paala.”  E penā foki i te taimi tenei me ko oti ne sae mai se ‵toega telā ko oti ne filifiligina e auala i te alofa tauanoa.  Tela la, kafai e fai te mea tenei ona ko tena alofa tauanoa, ko se toe fai ei te mea tenei e auala i galuega; me moi sē fai penā, ko se fai ei te alofa tauanoa mo fai se alofa tauanoa.  E a la? A te mea eiloa telā e kausaki malosi ki ei a Isalaelu ne seki maua ne ia, kae ne maua ne tino filifilia. Kae ko nisi tino i a latou katoa ne vāi‵vai olotou mafaufau.  E pelā eiloa mo pati i te tusi: “Ko oti ne tuku atu ne te Atua ki a latou te agaga o te moe palapala. Ko mata kolā e se ‵kite mo taliga kolā e se ‵logo, ke oko mai eiloa ki te aso tenei.”  E penā foki a pati a Tavita: “Ke na fai te lotou taipola mo fai se matasele, se malei, se fatu faka‵siga tino, mo se fakasalaga ki a latou. 10  Ke fai olotou mata ke pouli ko te mea ke se ‵kite latou, kae fai atu ke ‵piko faeloa olotou tua.” 11  Tela la, fesili atu ei au penei, ‘E mata, ne ‵siga kae pa‵ku latou ki lalo? Ikai loa! Kae ona ko te ‵se o te lotou auala ne maua ei ne tino o fenua fakaa‵tea a te fakaolataga, ko te mea ko latou ke loto ma‵sei. 12  Kae kafai ko te ‵se o te lotou auala ne fai ei ke maumea te lalolagi, a ko te lotou gasolo ifo o mu‵tana ne fai ei ke mau‵mea a tino o fenua fakaa‵tea, e pefea la te lasi o te maumea māfai ko kātoa ‵lei te lotou aofaki! 13  Nei la, ko faipati atu au ki a koutou kolā ko tino o fenua fakaa‵tea. Ona ko au ko te apositolo mō fenua fakaa‵tea, e fakatāua ne au taku galuega, 14  ko te mea ke mafai o fakaloto ma‵sei ne au oku tino i so se auala kae faka‵sao foki a nisi tino mai i a latou. 15  Me kafai ko te ‵peiga o latou keatea ne faka‵lei aka ei a te va o te lalolagi mo te Atua, ka pefea la māfai e toe maua mai latou ke fai pelā me ne tino kolā ne toe faka‵tu mai te mate? 16  E se gata i ei, kafai e tapu a te vaega o te paluga telā ne ofo atu e pelā me ko fuataga muamua, ka penā foki te paluga kātoa; kae kafai e tapu a aka o te lakau, ka penā foki a kaula. 17  Kae kafai ne ‵kati keatea a nisi kaula kae faka‵piki atu koutou ki a latou, e tiga eiloa a koutou ne kaula o te olive mai te vao, ke maua fakatasi i ei ne koutou te maumea o te olive mai i ana aka, 18  ke se fakamata‵mata koutou ki kaula konā. Kae kafai e fakamata‵mata koutou ki a latou, ke masaua me e se fakaola ne koutou a aka a ko aka e fakaola ne latou a koutou. 19  Kae ka fai mai koe: “Ne ‵kati keatea a kaula ko te mea ke faka‵piki atu au ki ei.” 20  E tonu te mea tenā! Ne ‵kati latou keatea ona ko te seai o se lotou fakatuanaki, a ko koe e tu mai ona ko te fakatuanaki. Sa fakamatamata kae fai ke mataku koe. 21  Me kafai ne seki ‵sao i te Atua a kaula ‵tonu o te olive, ka se ‵sao foki koutou i a ia. 22  Tela la, fai ke lavea atu a te alofa atafai o te Atua mo te fakamataku o tena kaitaua. Ne kaitaua a ia ki a latou kolā ne ‵siga, kae ne alofa atafai a te Atua ki a koe, māfai e tumau koe i loto i tena alofa atafai; me kafai e se fai penā, ka ‵kati foki koe keatea. 23  E pelā foki mo latou, kafai e se tumau te lotou sē fakatuanaki, ka toe faka‵piki atu foki latou, me e faigofie ke toe faka‵piki latou ne te Atua. 24  Me kafai a koe ne ‵kati keatea mai te olive telā e tu i te vao kae faka‵piki atu ki te olive telā e tu i loto i te fatoaga, e pefea la te faigofie ke faka‵piki atu a latou kolā ko kaula ‵tonu o te olive i loto i te fatoaga ki ei! 25  Me e se manako au ke se iloa ne koutou a te mea tapu kae ‵funa tenei, e oku taina, ko te mea ke mo a koutou ma sona fia ‵poto: ko oti ne fai ke tai vāivāi a mafaufau o nisi tino Isalaelu ke oko ki te taimi e kātoa ei a te aofaki o tino mai fenua fakaa‵tea, 26  kae ka faka‵sao ei a Isalaelu kātoa i te auala tenei. E pelā eiloa mo pati i te tusi: “A te fakaola ka vau mai Siona kae ka ave ne ia keatea a amioga ma‵sei mai i a Iakopo. 27  Kae tenei eiloa taku feagaiga mō latou, i te taimi ka ave ei ne au keatea olotou agasala.” 28  E tonu, ona ko te tala ‵lei ko fai ei latou mo fili mō te ‵lei o koutou, kae e uiga ki te filifiliga a te Atua ne alofagina latou ona ko olotou tupuga. 29  Me e se mafai o salamo te Atua i ana meaalofa mō tino kolā e kalagagina ne ia. 30  Me e pelā eiloa mo koutou ne seki faka‵logo ki te Atua kae nei ko maua ne koutou te alofa fakamagalo ona ko te lotou sē faka‵logo, 31  ka penā foki a latou kolā ko se faka‵logo nei ne iku atu ei ki te mauaga ne koutou a te alofa fakamagalo, ko te mea ke maua foki ne latou te alofa fakamagalo. 32  Me ne talia ne te Atua a latou katoa ke fai mo pagota o te sē fakalogo, ko te mea ke fakaasi atu ne ia ki a latou katoa a te alofa fakamagalo. 33  Ko tafaga la te ‵poko o te maumea mo te poto mo te iloa o te Atua! Ko oko eiloa te faigata ke malamalama i ana fakamasinoga kae e se mafai o iloa ana auala! 34  Me “ko oi e iloa ne ia a te mafaufau o Ieova, io me e fai mo fai tena tino fakatonutonu?” 35  Io me “ko oi ne tuku muamua atu ne ia se mea ki a ia, ko te mea ke toe ‵togi mai ki a ia?” 36  Me e maua mai i a ia kae e auala i a ia kae mō ia foki a mea katoa. Ke i a ia te ‵malu mo vikiga ki te se-gata-mai. Amene.

Fakamatalaga mai lalo