Loma 10:1-21

10  Oku taina, a te mea telā e manako au ki ei mo toku loto kātoa kae e ‵talo malosi au ki te Atua e uiga ki ei ko te mea ke maua ne te kau Isalaelu te fakaolataga.  E molimau atu au me e lasi te lotou toaga ki te Atua, kae e se fakavae te toaga tenā ki akoakoga ‵tonu;  ona ko te sē iloa ne latou a te amiotonu o te Atua, kae kausaki atu fua ke fakatumau te lotou amiotonu, ne seki faka‵logo ei latou ki te amiotonu o te Atua.  Me i a Keliso ko te fakagataga o te Tulafono, ko te mea ke maua ne tino katoa kolā e fakatuanaki a te amiotonu.  Me ne tusi mai a Mose i te tino telā ne tautali i fakatonuga amio‵tonu o te Tulafono ka ola eiloa i ei.  Kae ne tusi mai penei e uiga ki te amiotonu telā e iku mai i te fakatuanaki: “Sa fai ifo penei i tou loto, ‘Ko oi ka fanaka ki te lagi’ o ave ifo a Keliso ki lalo?;  io, me ko oi ka fanaifo ki te lua ‵poko o avaka a Keliso mai tino ‵mate?”  Kae ne a ana pati? “Tenā eiloa e nofo i ou tafa te muna, tenā eiloa e maua i tou gutu mo tou loto”; ko tena uiga, ko te “muna” o te fakatuanaki, telā e talai atu ne tatou.  Me kafai e folafola atu ne koe ki tino katoa a te ‘muna i tou gutu,’ i a Iesu ko te Aliki, kae e fakatuanaki i tou loto me ne toe fakatu aka ne te Atua a ia mai te mate, ka sao eiloa koe. 10  Me i te loto e fakagalue ei ne te tino a tena fakatuanaki ke maua ne ia te amiotonu, kae ko te gutu telā e folafola atu ne ia i mua o tino katoa ke maua ei te fakaolataga. 11  Me e fai mai penei i Tusitusiga Tapu: “E seai se tino e fakatuanaki ki a ia ka fanoanoa.” 12  Me e seai se ‵kese o te tino Iutaia mo te tino Eleni, me e tokotasi fua te Aliki mō tino katoa, telā e fakamanuia ne ia a latou katoa kolā e ka‵laga atu ki a ia. 13  Me “ko tino katoa kolā e ka‵laga ki te igoa o Ieova ka ‵sao.” 14  E tiga te feitu tenā, ka ka‵laga atu pefea ki a ia a tino kolā e seki fakatuanaki? Kae ka fakatuanaki pefea a tino ki a ia māfai e seki lagona ne latou? Kae ka lagona pefea ne latou e aunoa mo se tino ke talai atu ki a latou? 15  Ka talai atu pefea latou seiloga ke uga atu latou? E pelā eiloa mo pati i te tusi: “Ko tafaga la te ‵gali o vae o latou kolā e folafola atu ne latou te tala ‵lei e uiga ki mea ‵lei!” 16  E tiga te feitu tenā, ne seki faka‵logo katoa latou ki te tala ‵lei. Me e fai mai penei a Isaia: “Ieova, ko oi e fakatuanaki ki mea kolā ne lagona ne latou mai i a matou?” 17  Tela la, e maua te fakatuanaki mai mea kolā e lagona, kae e maua a mea kolā e lagona e auala i te muna e uiga ki a Keliso. 18  E ui i ei, e fesili atu au penei, ‘E a, e seki lagona ne latou? Se mea tonu me “ne oko atu olotou leo ki te lalolagi kātoa, kae ne oko atu foki te lotou fekau ki feitu e fa o te lalolagi nofoaki.” 19  Kae e fesili atu au, penei ‘E mata, ne seki iloa ne Isalaelu?’ Muamua la, e fai mai a Mose: “Ka fai ne au a koutou ke loto ma‵sei e auala i te mea telā e sē se fenua; ka fai ne au koutou ke kaitaua e auala i se fenua valea.” 20  Kae ne lasi te loto toa o Isaia o fai mai penei: “Ko maua au ne latou kolā ne seki ‵sala mai ki a au; ko iloa au ne latou kolā ne seki fakatagi mai ke iloa ne latou au.” 21  Kae ne fai mai a ia e uiga ki tino Isalaelu: “Ne ‵fola atu oku lima i te aso kātoa ki tino sē faka‵logo kolā ne faipati ‵teke mai ki a au.”

Fakamatalaga mai lalo