Kolose 4:1-18

4  A koutou e matai, ke fai ne koutou a te mea tonu kae ‵tau ki otou pologa, me e iloa ne koutou me e isi foki se otou Matai telā i te lagi.  Tumau i te ‵talo malosi kae ke ala faeloa koutou mo te loto fakafetai.  Ke ‵talo foki koutou mō matou, ko te mea ke ‵tala mai te mataloa ne te Atua ke folafola atu ne matou a te muna e uiga ki mea ‵funa kae tapu a Keliso telā ko ala ei au o ‵pei ki te falepuipui;  ko te mea ke fakamatala atu ne au mo te manino ‵lei a mea konā e pelā eiloa mo te mea telā e ‵tau o fai ne au.  Tumau i te sa‵sale mo te poto e uiga ki tino i tua, kae fakaaoga faka‵lei otou taimi* ki toe mea aoga.  Ke fai faeloa otou pati ke ‵tagi ‵lei, ke faka‵kona ki te masima ko te mea ke mafai o tuku atu ne koutou se tali ‵lei ki tino taki tokotasi.  Ka fakailoa atu a mea katoa e uiga ki a au ne Tukasi, toku taina pele, se tavini fakamaoni kae e pologa fakatasi māua ki te Aliki.  Ko uga atu ne au a ia ki a koutou ko te mea ke iloa ne koutou a mea katoa e uiga ki a matou, kae ke fakamafanafana atu foki ki otou loto.  Ka olo atu lāua mo Onosemu, toku taina fakamaoni kae pele, telā se tino foki mai i a koutou, kae ka fakailoa atu ne lāua ki a koutou a mea katoa kolā e ‵tupu i konei. 10  Ko ‵moli atu alofaga o Alitako, toku taugasoa telā e ‵loka fakatasi māua i te falepuipui, e pelā foki mo Maleko te fakataina o Panapa (telā ne fakatonu atu ke talia ne koutou a ia i so se taimi e fanatu ei ki a koutou,) 11  mo Iesu telā e fakaigoa foki ki a Tiasitasi, mai tino pilitome. Ko latou fua konei e ga‵lue fakatasi matou mō te Malo o te Atua kae ne fai latou mo fai se fakamafanafanaga lasi ‵ki ki a au. 12  Ko ‵moli atu a alofaga o Epafala, se pologa a Keliso Iesu telā se tino foki mai i a koutou. E ‵talo atu faeloa a ia mō koutou, ko te mea ke tumau koutou ke oko eiloa ki te fakaotiga i te tali‵tonu fakamaoni ki mea katoa kolā e loto ki ei te Atua. 13  E molimau atu eiloa au e uiga ki a ia me e uke ana taumafaiga e fai mō koutou e pelā foki mo latou kolā i Laotikaia mo Hialapoli. 14  E ‵moli atu alofaga o Luka te tokita fagasele, e pelā foki mo Tema. 15  ‵Moli atu oku alofaga ki taina i Laotikaia penā foki loa mo Numefa mo te fakapotopotoga i tena fale. 16  Kae kafai ko oti ne faitau te tusi tenei i a koutou, fai ke faitau atu foki ki te fakapotopotoga i Laotikaia kae ke faitau atu foki te tusi mai Laotikaia ki a koutou. 17  Fai atu foki ki a Akepasi penei: “Ke onoono faka‵lei ke fakataunu ne koe te galuega telā ne talia ne koe mai te Aliki.” 18  Konei oku alofaga, ko alofaga o Paulo ne tusi ki toku lima eiloa. Ke masaua faeloa ne koutou oku pikifao i te falepuipui. Ke i luga i a koutou a te alofa tauanoa o te Atua.

Fakamatalaga mai lalo

Ko 4:5  I te ‵gana Eleni, “ke ‵togi mō te taimi tonu.”