Kolose 3:1-25
3 Kae kafai la ne toe faka‵tu aka koutou fakatasi mo Keliso, ‵sala atu faeloa ki mea i te lagi, ko te koga telā e nofo i ei a Keliso i te feitu fakaatamai o te Atua.
2 Ke tuku tonu faeloa otou mafaufau ki mea i te lagi, kae e se ki mea i te lalolagi.
3 Me i a koutou ne ‵mate kae ko oti ne ‵funa aka otou ola i loto i a Keliso i te ‵kau fakatasi mo te Atua.
4 Kafai e fakaasi mai a Keliso, telā ko te ‵tou ola, ka fakaasi mai foki koutou fakatasi mo ia i te ‵malu katoatoa.
5 Tela la, ke tamate a vaega katoa o otou foitino i te lalolagi nei e uiga ki amioga fakatauavaga sē ‵tau, amioga lai‵lai, manakoga ma‵sei,* manakoga faka‵mae loto, mo te kaimanako telā ko te ifo ki tupua.
6 Ka oko mai eiloa te kaitaua o te Atua ona ko mea konā.
7 Ko mea eiloa konā ne fai sale ne koutou i otou olaga mua.
8 Kae nei la, e ‵tau o tapale keatea a mea katoa konā, ko te kaitaua, te loto ita, pati faka‵mae loto, mo pati ma‵sei mai i otou gutu.
9 Ke mo a ma loi te suā tino ki te suā tino. ‵Pei kea‵tea a uiga* mua mo olotou faifaiga ma‵sei,
10 kae ke fakapei ki luga i a koutou a uiga ‵fou, kolā ne faka‵fou e auala i te iloa tonu e ‵tusa mo foliga o te Tino telā ne faite ne ia.
11 E seai se tino Eleni io me se tino Iutaia i konei, se tino pilitome io me se tino seki pilitome, se tino fakaalofa, se tino Sekutia,* se pologa, se tino saoloto, kae ko te Keliso ko te katoaga o mea katoa kae iai foki a mea katoa i a ia.
12 Tela la, ona ko koutou ko tino filifilia a te Atua, ko tino tapu kae alofagina, ke fakapei ki luga i a koutou a te alofa atafai, te alofa kaimalie, te loto maulalo, te agamalu mo te kufaki.
13 Ke fakatau fa‵ki faeloa koutou i a koutou eiloa kae fakatau fakamagalo atu te suā tino ki te suā tino māfai e isi se pogai e fameo ei se tino ki te suā tino. E pelā eiloa mo te fakamagaloga o koutou ne Ieova, e ‵tau foki mo koutou o fai penā.
14 Kae i tafa o mea katoa konei, ke fakapei ki luga i a koutou a te alofa, me tenā eiloa te fusi ‵lei katoatoa telā e fai ei ke ‵kau fakatasi a tino.
15 E se gata i ei, ke talia ne koutou ke pule atu te filemu o Keliso ki otou loto, me ne kalagagina eiloa koutou ki te filemu tenā i te foitino e tasi. Kae ke fakaasi atu te otou loto fakafetai.
16 Ke nofo i a koutou a te muna a Keliso ko te mea ke kātoa i a koutou te poto. Tumau i te akoako kae fakamalosi atu te suā tino ki te suā tino i te usuga o salamo, vikiga ki te Atua, ko pese faka-te-agaga kolā e usu atu mo te loto alofa, kae ke usu atu mo te loto kātoa ki a Ieova.
17 Kae ko so se mea e fai ne koutou i otou pati io me ko otou faiga, ke fai a mea katoa i te igoa o te Aliki ko Iesu, o fakafetai atu ki te Atua te Tamana e auala i a ia.
18 A koutou e fāfine, ke faka‵logo koutou ki otou avaga me tenā te mea e ‵tau o fai ne soko o Keliso.
19 A koutou e tāgata, ke a‵lofa faeloa koutou ki otou avaga kae ke mo a eiloa e tō kaitaua malosi koutou ki a latou.
20 A koutou e tama‵liki, ke faka‵logo koutou ki otou mātua i mea katoa, me tenei eiloa te mea e fakafiafia malosi atu ki te Aliki.
21 A koutou e tamana, sa fakaitaitagina otou tama‵liki ko te mea ke se loto vāi‵vai latou.
22 A koutou e pologa, faka‵logo i mea katoa ki otou matai faka-te-foitino, e se i taimi fua kolā e onoono mai ei latou, ke fakafiafia atu fua ki tino, kae i te loto fakamaoni mo te mataku ki a Ieova.
23 I so se mea e fai ne koutou, fai mo te loto kātoa e pelā eiloa me fai ne koutou mō Ieova, kae e se mō tāgata,
24 me e iloa ne koutou me ka maua ne koutou mai i a Ieova te tofi telā ko te otou taui. Ke pologa koutou mō te Matai, telā ko Keliso.
25 Se mea tonu me i te tino telā e fai ne ia se mea ‵se ka toe maua eiloa ne ia te ‵togi o tena mea ‵se ne fai, me i te Atua e se fakailoga tino.
