Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Kolose 1:1-29

1  Au ko Paulo, se apositolo a Keliso Iesu ona ko te loto o te Atua, mo Timoteo te ‵tou taina  ki tino tapu mo taina fakamaoni i te ‵kau fakatasi mo Keliso i Kolose: Ke i luga i a koutou a te alofa tauanoa mo te filemu o te Atua te ‵tou Tamana.  E fakafetai atu faeloa matou ki te Atua te Tamana o te ‵tou Aliki ko Iesu Keliso i omotou talosaga mō koutou,  me ko oti ne ‵logo matou i te otou fakatuanaki ki a Keliso Iesu mo te a‵lofa o koutou ki tino tapu katoa  ona ko te fakamoemoega telā e tausi mō koutou i te lagi. Ne lagona muamua ne koutou a te fakamoemoega tenei e auala i te fekau o te munatonu e uiga ki te tala ‵lei  telā ne oko atu ki a koutou. E pelā eiloa mo te fua mai mo te gasolo ki mua o te tala ‵lei i te lalolagi kātoa, e penā foki eiloa mo te mea e fai i a koutou, talu mai te aso ne lagona kae iloa tonu ei ne koutou a te munatonu e uiga ki te alofa tauanoa o te Atua.  Tenā eiloa te mea ne tauloto ne koutou mai i a Epafala te ‵tou taina pele telā e pologa fakatasi tatou, se tavini fakamaoni a Keliso telā e sui ne ia matou.  Ne fakailoa mai foki ne ia ki a matou a te otou a‵lofa i te feitu faka-te-agaga.  Tenei foki eiloa te pogai e se gata ei te motou ‵talo mō koutou, talu mai te aso ne lagona ei ne matou, kae fakatagi atu ko te mea ke faka‵fonu koutou ki te iloa tonu e uiga ki tena loto i poto katoa mo te malamalama i mea faka-te-agaga, 10  ko te mea ke sa‵sale koutou i se auala telā e talia ne Ieova kae ke fakafiafia katoatoa atu ki a ia e auala i fua o otou galuega ‵lei katoa kolā e fai faeloa ne koutou mo te gasolo ki mua o te otou iloa tonu e uiga ki te Atua. 11  Ke na fakama‵losi aka koutou ki te malosi lasi o te Atua e ‵tusa eiloa mo tena ‵mana sē fuafuagina ko te mea ke mafai ne koutou o tumau i te kufaki mo te fia‵fia. 12  Kae ke fakafetai atu koutou ki te Tamana telā ne fai ne ia ke mafai o maua otou tusaga i te tofi o tino tapu kolā e sa‵sale i te mainaga. 13  Ne faka‵sao ne ia tatou mai te malosi o te pouliga kae avatu ne ia tatou ki loto i te Malo o tena Tama fagasele, 14  e auala i a ia ko fakasaoloto ei tatou e alatu i te togiola, ko te fakamagaloga tenā o ‵tou agasala. 15  A ia ko te fakatusa o te Atua telā e se lavea, ko te uluaki o mea katoa ne faite; 16  me ne faite a nisi mea katoa i te lagi mo te lalolagi e auala i a ia, ko mea e lavea mo mea e se lavea, faitalia me ne nofogaaliki io me ne aliki io me ne malo io me ne pulega. Ne faite a nisi mea katoa e alatu i a ia kae mō ia foki. 17  E se gata foki i ei, ko ia ne mua i mea katoa kae e auala i a ia ne faite ei a nisi mea katoa. 18  Ko ia ko te ulu o te foitino, telā ko te fakapotopotoga. A ia ko te kamataga, ko te tino muamua ne toe fakatu aka mai i te mate, ko te mea ke fai a ia mo fai te tino muamua i mea katoa. 19  Me ne fiafia eiloa te Atua o fai ke katoatoa i a ia a mea katoa, 20  kae e auala i a ia ke toe faka‵lei aka ei te fesokotakiga o nisi mea katoa ki a ia, mai te faiga ke maua te filemu e alatu i tena toto telā ne ‵ligi i luga i te lakau fakasaua,* faitalia me ko mea i te lalolagi io me ko mea i te lagi. 21  E tonu, a koutou kolā ne ‵vae keatea kae ne fai muamua mo fai ana fili ona ko koutou ne mafau‵fau faeloa ki galuega kolā e ma‵sei, 22  kae nei la ko oti ne faka‵lei aka ne ia koutou mo ia e alatu i te foitino o te tino tenā e auala i tena mate, ko te mea ke tuku atu koutou ki a ia e pelā me ne tino ‵ma, e seai ne pona, kae e seai foki ne ‵losiga ki a koutou. 23  E mafai fua o fai penā māfai e tumau koutou i te fakatuanaki, telā ne fakatu i luga i te fakavae kae ke ‵tu ‵mautakitaki koutou kae ke mo a ma ‵to keatea mai te fakamoemoega o te tala ‵lei telā ne lagona ne koutou kae telā ko oti ne talai atu ki tino katoa mai lalo o te lagi. Au ko Paulo, ko te tavini o te tala ‵lei tenei. 24  Ko fiafia au i oku logo‵maega mō koutou, kae nei e seki katoatoa a puapuaga o toku foitino ke pelā mo puapuaga o te foitino o Keliso, telā ko tena fakapotopotoga. 25  Ne fai au mo fai te tavini a te fakapotopotoga tenei e ‵tusa mo te galuega fakasituati mai te Atua telā ne tuku mai ki a au mō koutou ke talai katoatoa atu te muna a te Atua— 26  ko te mea ‵funa kae tapu telā ne ‵funa aka i aso mua mo kautama ko ‵teka. Kae tenei ko fakaasi mai ki ana tino tapu, 27  ki tino kolā ko oti ne fiafia te Atua ke fakaasi atu ki ei te koloa gali o te mea ‵funa kae tapu tenei ki fenua katoa. Ko te ‵kau fakatasi tenā o koutou mo Keliso, mo te fakamoemoega o tena ‵malu sili. 28  Ko ia eiloa tenei e folafola atu ne matou, o fakamalosi atu ki tino katoa kae akoako atu ki tino katoa a poto katoa, ko te mea ke mafai o tuku atu ne matou a tino katoa ki te Atua e pelā me ne tino kolā ko ma‵tua ‵lei i te feitu faka-te-agaga. 29  Tenei eiloa te pogai e galue malosi ei au, e fakapalele oku mafi e ‵tusa eiloa mo tena ‵lago malosi mai, telā e galue mo te ‵mana i loto i a au.

Fakamatalaga mai lalo

 Ke onoono ki te Mataupu Fakaopoopo e 7.