Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Kalatia 5:1-26

5  Me ko te saolotoga eiloa tenei ne fakasaoloto ei tatou ne Keliso. Tela la, tu ‵mautakitaki i ei, kae sa talia ne koutou ke toe fai koutou mo pologa.  Kiloke! Au ko Paulo, ko fai atu ki a koutou me kafai koutou e pilitome ko seai ei se aoga o Keliso ki a koutou.  E se gata i ei, e toe fai au mo molimau ki tino katoa kolā e fia pilitome me ko ‵tau o tausi ne latou te Tulafono kātoa.  Faitalia me ko oi koutou, a koutou ko ‵vae keatea mai i a Keliso, i te taimi e taumafai ei ke taku amiotonugina koutou e auala i te tulafono; ko ‵to keatea koutou mai tena alofa tauanoa.  Me i a matou, e ‵nofo fakatali‵tali eiloa, e auala i te agaga, ki te amiotonu telā e iku mai i te fakatuanaki.  Me e seai se aoga o te pilitome io me ko te sē pilitome ki a latou kolā e ‵kau fakatasi mo Keliso Iesu, kae e aoga te fakatuanaki telā e ga‵lue fakatasi mo te alofa.  A koutou ne tele‵tele ‵lei faeloa i aso mua. Kae ko oi ne faka‵lave ne ia koutou mai te faka‵logo faeloa ki te munatonu?  A fakamalosiga ma‵sei konei ne seki aumai ne te Tino telā ne kalaga ne ia koutou.  E faka‵fete ne mu mea faka‵fete a te paluga falaoa kātoa. 10  E talitonu au me i a koutou kolā e ‵kau fakatasi mo te Aliki e se mafau‵fau penā. Kae ko te tino telā e faka‵tupu ne ia a fakalavelave ki a koutou ka maua eiloa ne ia te fakasalaga e ‵tau o maua ne ia, faitalia me ko oi a ia. 11  Kae e pelā mo au, e oku taina, kafai koi talai atu eiloa ne au te pilitome, kaia la koi fakasauagina ei au? Kafai e penā loa, ko tena uiga ko oti ne fakaseai te lakau fakasaua* telā e ‵siga ei a tino. 12  Aku muna eiloa ke ‵pena a tāgata kolā e taumafai o kosu ne latou a koutou. 13  Oku taina, a koutou ne kalagagina ki te saolotoga. Kae ke mo a la ma fakaaoga ne koutou te saolotoga tenei e pelā me se avanoaga ke kausaki atu ki manakoga faka-te-foitino, kae ke fakatau tavini atu koutou e auala i te alofa. 14  Me i te Tulafono kātoa e fakavae ki luga i te tulafono e tasi tenei: “E ‵tau mo koe o alofa ki tou tuakoi e pelā mo koe ki a koe eiloa.” 15  Kae kafai e tumau koutou i te fakatau kinau mo te fakatau taua, ke fakaeteete la i a koutou ma fakatau tamate ne koutou a koutou eiloa. 16  Kae e fai atu au, Tumau i te sa‵sale i te agaga kae ka se fai lele eiloa ne koutou a manakoga faka-te-foitino. 17  Me i te foitino mo ana manakoga e ‵teke ki te agaga, a ko te agaga e ‵teke ki te foitino. E fakatau ‵teke a te avā mea konei, ko te mea ke se fai ne koutou a mea eiloa kolā e ma‵nako koutou o fai. 18  E se gata i ei, kafai e takitaki koutou ne te agaga, ko se ‵nofo koutou mai lalo i te tulafono. 19  Me e matea faka‵lei atu a galuega o te foitino, kolā ko amioga fakatauavaga sē ‵tau, amioga lai‵lai, te amio matafatu mo te sē āva, 20  ifo ki tupua, te faivailakau, te fai fili, fai taua, te loto masei, te kaitaua, te fakatau kinau, ko mavae‵vaega, te fai potukau, 21  te kaisanosano, te konā, fakafiafiaga sonafai valevale, mo nisi mea aka penā. Ko polopoloki atu au ki a koutou e uiga ki mea konei e pelā eiloa mo aku polopolokiga mua ki a koutou, me i tino kolā e fai faeloa ne latou a mea konei ka se mafai o maua ne latou te Malo o te Atua. 22  I te suā feitu la, a fuataga o te agaga ko te alofa, te fiafia, te filemu, te kufaki, te atafai, te aga‵lei, te fakatuanaki, 23  te agamalu, te loto pulea. E seai se tulafono e ‵teke ki mea konei. 24  E se gata i ei, a latou kolā ko oti ne fai mo fai a tino o Keliso Iesu ko oti ne ‵tuki ne latou ki te lakau fakasaua a te foitino fakatasi mo ana manakoga mo mea kolā e fina ki ei. 25  Kafai e ola tatou i te agaga, ke na sa‵sale ‵tonu faeloa tatou i te takitakiga a te agaga. 26  Ke se fia takutakua tatou, ke seai se uiga fakatau‵fai i a tatou, kae ke se kaisanosano a te suā tino ki te suā tino.

Fakamatalaga mai lalo

 Ke onoono ki te Mataupu Fakaopoopo e 7.