Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Kalatia 1:1-24

1  Au ko Paulo, se apositolo, e se mai i tāgata io me e auala i se tagata, kae e auala i a Iesu Keliso penā foki eiloa mo te Atua te Tamana, telā ne toe fakatu aka ne ia a Iesu mai te mate.  Ko tusi atu au fakatasi mo te kau taina katoa i konei, ki fakapotopotoga katoa i Kalatia:  Ke i luga i a koutou a te alofa tauanoa mo te filemu mai te Atua te ‵tou Tamana penā foki loa mo te Aliki ko Iesu Keliso.  Ne tuku mai ne ia a Iesu mō ‵tou agasala ko te mea ke faka‵sao ne ia tatou mai te olaga masei tenei e ‵tusa mo te mea e manako ki ei te ‵tou Atua mo te ‵tou Tamana,  telā i o ia te vikiga ki te se-gata-mai, ki te se-gata-mai eiloa. Amene.  Au e ofo i te vave o ‵fuli koutou keatea mai te Tino telā ne kalagagina ne ia koutou i te alofa tauanoa o Keliso, ki se isi tala ‵lei.  E seai aka foki se isi tala ‵lei; kae na ko nisi tino fua kolā e faka‵tupu ne latou a fakalavelave mō koutou, kae e ma‵nako o faka‵numi ne latou a te tala ‵lei e uiga ki te Keliso.  E tiga te feitu tenā, kafai foki loa e folafola atu ne matou io me se agelu mai te lagi se isi tala ‵lei i tafa o te tala ‵lei telā ne folafola atu ne matou, ka malaia eiloa a ia.  E pelā eiloa mo omotou pati i luga nei, ko toe fai atu foki au penei, ko so se tino e folafola atu ne ia ki a koutou se isi tala ‵lei i tafa o te mea telā ko oti ne talia ne koutou, ka malaia eiloa a ia. 10  E mata, ko te taliaga a tāgata e ‵sala au ki ei io me ko te taliaga a te Atua? Io me e mata, ko taumafai au o takolekole a tāgata? Kafai e takolekole ne au a tāgata, au e sē se pologa a Keliso. 11  Me e manako au ke iloa ne koutou, e oku taina, me i te tala ‵lei telā ne folafola atu ne au ki a koutou e sē se mea mai i tāgata; 12  me ne seki maua ne au mai i tāgata, io me ne akoako mai ne latou ki a au, kae se mea eiloa ne maua ne au e auala i se fakaasiga mai i a Iesu Keliso. 13  Ko oti eiloa ne ‵logo koutou i aku amioga a koi kau atu au ki te lotu Iutaia, me ne fai ne au a fakasauaga matagā ki te fakapotopotoga a te Atua kae ne taumafai foki o fakaseai atu ne au, 14  kae ne sili atu toku gasolo ki mua i te lotu Iutaia i lō oku kautama e tokouke i toku fenua, me ne silia atu foki toku loto finafinau ki tuu masani a oku tupuga. 15  Kae i te taimi ne ‵vae ei au keatea ne te Atua mai te moegatama o toku mātua kae kalaga ne ia a au e auala i tena alofa tauanoa, ne mafaufau a ia me se mea ‵lei 16  ke fakaasi mai tena Tama e auala i a au, ko te mea ke folafola atu ne au te tala ‵lei e uiga ki a ia ki fenua fakaa‵tea, kae ne seki ‵sala atu au ki manatu o se isi tino. 17  Ne seki fano foki au ki Ielusalema, ki a latou kolā ne mua atu i a au o fai mo apositolo, a ko au ne fano ki Alapi, kae toe foki atu fakamuli ki Tamaseko. 18  I te tolu o tausaga mai tua ifo i ei kae fano au o āsi ki a Kefa i Ielusalema, kae ne ‵nofo māua i konā i aso e sefululima. 19  Ne seki fetaui au mo nisi apositolo kae na ko Iakopo te taina o te Aliki. 20  Kae e pelā mo mea konei e tusi atu ne au ki a koutou, e fakapa‵tonu atu au ki a koutou i mua o te Atua i a au e se loi. 21  Mai tua i konā, fano ei au ki kogā fenua i Sulia mo Kilikia. 22  Ne seki iloa au ne fakapotopotoga i Iuta kolā e ‵kau fakatasi mo Keliso. 23  Ne lagona sale fua ne latou a te mea tenei: “A te tagata telā ne fakasaua ne ia tatou muamua tenei ko folafola atu ne ia te tala ‵lei e uiga ki te fakatuanaki telā ne taumafai a ia o fakaseai i te taimi muamua.” 24  Ne kamata ei o ‵viki atu latou ki te Atua ona ko au.

Fakamatalaga mai lalo