Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Iuta 1:1-25

 Au ko Iuta, ko te pologa a Iesu Keliso, kae ko te taina o Iakopo, ki tino kolā ne kalagagina kae e alofa ki ei te Atua te Tamana kae kolā e tausigina mō Iesu Keliso:  Ke ‵fonu faeloa koutou i te alofa fakamagalo mo te filemu mo te alofa o te Atua.  Aku fagasele, e tiga eiloa ne taumafai malosi au o tusi atu ki a koutou e uiga ki te fakaolataga telā e maua fakatasi ne tatou, ne ‵tau foki o tusi atu au o fakamalosi atu ke taua malosi koutou mō te fakatuanaki telā ko leva ne tuku atu fakatasi eiloa mō taimi katoa ki tino tapu.  A te pogai me isi ne tāgata ko oti ne ulu lēmū atu ki loto i a koutou; ko latou kolā ko leva ne ‵valo mai i te Tusi Tapu me ka maua ne latou te fakamasinoga, ko tāgata sē amioatua, kolā ko ‵fuli ne latou a te alofa tauanoa o te ‵tou Atua mo fai se fakamasakoga ke fai ne latou a amioga matafatu mo te sē āva, kae kolā ko fakafiti ne latou te ‵tou Matai mo te ‵tou Aliki e tokotasi ko Iesu Keliso.  E tiga eiloa e iloa ‵lei ne koutou a mea katoa konei, e manako au o fakamasaua atu ki a koutou, me ne faka‵sao ne Ieova se potukau o tino mai te fenua o Aikupito, kae fakamuli ifo ne fakaseai ne ia a tino kolā ne seki fakaasi mai ne latou te fakatuanaki.  Kae ko agelu kolā ne seki tumau i olotou tulaga mua kae ne tiaki ne latou a koga kolā ne ‵tau o ‵nofo latou i ei, ko oti ne tausi fakapagota ne ia latou i se koga pouli tagataga ke oko ki te aso lasi o te fakamasinoga.  E penā foki a Sotoma mo Komolo mo fa‵kai i lā tafa, ne fai foki ne latou a amioga pito sili i te matagā* mo amioga fakatauavaga kolā e tapu i te tulafono. E faka‵tu mai a mea konā i ‵tou mua ke fai mo fai se fakamasauaga e uiga ki te fakasalaga ko te ‵sunu ki te afi telā e se mafai o mate.  E tiga te mea tenei, e aofia foki a tāgata konei i moemiti, e fakalailai atu ki te foitino kae takalia‵lia ki pulega kae muna ma‵sei ne latou a tino ‵malu.  Kae i te taimi ne kinau ei a Mikaele, te agelu pule, mo te Tiapolo e uiga ki te foitino o Mose, ne seki fakaaoga ne ia a pati ‵mafa ke fakamasino ei a ia, kae ne fai atu fua, penei: “Ke fakamalaia atu a Ieova ki a koe.” 10  Kae ko tāgata konei e fakamasei faeloa ne latou a mea kolā e se malamalama lele eiloa a latou i ei. Kae ko mea katoa kolā e maina latou i ei e pelā fua me ne manu kolā e seai ne lotou mafaufau, e fakamasei atu fua ki a latou eiloa. 11  Ko malaia eiloa latou, me ne tau‵tali atu latou i te auala o Kaino, kae ne ‵tele fakavave atu i te auala sē tonu o Palaamo ke maua ei se lotou taui, kae ne ‵mate atu ei latou ona ko olotou pati ‵teke e pelā mo Kola! 12  Konei eiloa a akau ‵masa kolā e ‵galo i lalo i te pisipisitai i taimi e ‵kai fakatasi ei koutou i otou fakaala, ko tausi mamoe kolā e fagai ne latou a latou eiloa e aunoa mo te ma‵taku, ko kaumana ‵masa kolā e peipei valevale ne te matagi; ko lakau i te fakaotiga o te ‵tau e ‵to ei a lau o lakau, kae seai ne lotou fuataga e ‵fua mai, ko oti ne ‵mate fakalua latou, kae ko oti foki ne unu kea‵tea; 13  e pelā mo takapiaga o galu ‵fati o te tai te lotou masiasi; e pelā me ne fetū e olo valevale fua, kae kolā ka ‵pei atu ki te pouli tagataga ki te se-gata-mai. 14  E tonu, ne ‵valo mai foki a Enoka, telā ko te tokofitu o tino mai tua o Atamu, e uiga ki a latou, i ana pati konei: “Kiloke! Ne o‵mai foki a Ieova mo ana agelu tapu e se lausia, 15  o fakaoko atu te fakasalaga ki tino katoa, kae fakamasino a tino sē amio atua katoa i olotou amioga sē ‵lei e pelā foki mo olotou faifaiga matagā kolā ne fai atu ne tino agasala ki a ia.” 16  A tāgata konei ne tino mui‵mui, e fameo faeloa e uiga ki olotou mea e maua i te olaga e ‵tusa mo olotou manakoga, kae fai‵pati olotou gutu ki pati fakamata‵mata e uiga ki a latou, kae tavae fakaloi‵loi ne latou a nisi tino mō te lotou ‵lei eiloa. 17  Kae e pelā mo koutou, e aku fagasele, ke masaua a pati kolā ne fai atu muamua ne apositolo a te ‵tou Aliki ko Iesu Keliso, 18  kolā ne fai sale atu ne latou ki a koutou: “Ka isi ne tino fakatauemu i aso fakaoti kolā ka tau‵tali i olotou manakoga mō te faiga o mea ma‵sei.” 19  Konei eiloa a tino e faka‵tupu ne latou a mavaevaega, ne tāgata e amio pelā me ne manu, kae e seai se lotou malosi faka-te-agaga. 20  A ko koutou, e aku fagasele, ke ati aka koutou i luga i te otou fakatuanaki e sili i te tapu, kae ‵talo fakatasi mo te agaga tapu, 21  ko te mea ke tumau koutou i loto i te alofa o te Atua, a koi fakatali‵tali koutou ki te alofa fakamagalo o te ‵tou Aliki ko Iesu Keliso, telā e iku atu ki te ola se-gata-mai. 22  Ke tumau foki koutou i te fakaasi atu o te alofa fakamagalo ki a latou kolā e fakalotolotolua; 23  ke faka‵sao latou mai te ‵futi keatea mai te afi. Kae ke tumau i te fakaasi atu o te alofa fakamagalo ki nisi tino mo te ma‵taku, kae ke takalia‵lia ki te gatu telā ko pisipisia i lailaiga o te foitino. 24  Kae nei la, ki te tino telā e mafai o puipui ne ia ke mo a koutou e ‵siga kae fai ne ia koutou ke tumau i te sē lai‵lai i mua o tena ‵malu mo te fiafia lasi, 25  ke i luga i te Atua fua e tokotasi te ‵tou Fakaola e auala i a Iesu Keliso te ‵tou Aliki, te ‵malu, te malosi mo te pule mai te se-gata-mai ke oko atu eiloa ki te se-gata-mai. Amene.

Fakamatalaga mai lalo

 Io me, ko “faifaiga fakatauavaga sē ‵tau.”