Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Ioane 9:1-41

9  I tena sasaleatuga, lavea ei ne Iesu se tagata telā ne ‵kivi talu mai tena fanaumaiga.  Ne fesili atu ana soko ki a ia: “Te Faiakoga,* ko oi ne agasala, ko te tagata tenei io me ko ana mātua, ko ala ei o fanau mai a ia e ‵kivi?”  Ne tali atu a Iesu: “E se ko te tagata tenei io me ko ana mātua, kae ne fai penei ko te mea ke fakaasi atu ei a galuega a te Atua e auala i a ia.  E ‵tau o fai ne tatou a galuega a te tino telā ne uga mai ne ia au a koi ao; me kafai ko oko mai te po e seai se tino e mafai o galue.  Au ko te mainaga o te lalolagi, i te taimi e nofo ei au i te lalolagi.”  I te otiga o ana pati konei, ne puaki atu a ia ki te laukele kae palu ne ia mo ana suavale ke liu pela, nini ei ne ia ki mata o te tagata tenā  kae fai atu ki a ia: “Fano o mulumulu i te vai o Siloama (telā e ‵fuli ki te ‘Uga atu’). Ne fano ei tou tagata o mulumulu i ei, kae toe foki mai ko ‵kite ana mata.  Ne fai aka ei ana tuakoi mo tino kolā ne iloa ne latou i a ia se tino akai mea: “E se ko ia tenei ne sagasaga sale kae akai mea?”  Ne fai atu a nisi tino: “Ko ia tenā.” Kae fai mai a nisi tino: “Ikai, kae e pelā loa mo ia.” Ne fai atu te tagata tenā: “Ko au eiloa ko te tino tenā.” 10  Ne fai atu ei latou ki a ia: “Ne ‵kite la pefea ou mata?” 11  Ne tali atu a ia: “A te tagata telā e igoa ki a Iesu ne palu ne ia a te pela kae nini ki oku mata kae fai mai ki a au, ‘Fano ki Siloama o mulumulu i ei.’ Ne fano au o mulumulu, ‵kite ei oku mata.” 12  Olotou muna: “Tefea te tagata tenā?” Ana muna: “E se iloa ne au.” 13  Ne ‵taki atu ne latou te tagata telā ne ‵kivi ki te kau Falesaio. 14  A te aso telā ne palu ei ne Iesu a te pela ke fai ei ke ‵kite a mata o te tino tenā, ko te Sapati. 15  I konā loa, ne toe fesili atu foki a te kau Falesaio ki a ia me ne ‵kite pefea ana mata. Ana muna ki a latou: “Ne tuku ne ia a pela ki oku mata, mulumulu ne au, ‵kite ei oku mata.” 16  Ne fai atu a nisi Falesaio: “A ia tenei e sē se tagata mai te Atua, me e se tausi ne ia te Sapati.” Kae fai atu a nisi tino: “E mafai pefea o fai ne se tagata agasala a vaegā galuega ‵mana penā?” Ne vaelua i ei latou. 17  Ne toe fai atu latou ki te tagata ‵kivi: “Se a tau faka‵tau e uiga ki te tagata telā ne faka‵pula ne ia ou mata?” Muna a te tagata tenā: “A ia se pelofeta.” 18  Kae ne seki tali‵tonu a tino Iutaia i a ia ne ‵kivi muamua kae ko toe ‵kite ana mata, ke oko ki te taimi ne aumai ei ne latou a mātua o te tagata telā ko ‵kite ana mata. 19  Ne fesili atu latou ki a lāua: “Tenei te lū tama ne fai mai koulua me ne fanau mai e ‵kivi? Ne ‵kite pefea ana mata?” 20  Ne tali atu ana mātua: “E iloa ne māua me tenei te mā tama a ko ia ne fanau mai e ‵kivi. 21  Kae e se iloa ne māua me ko oi ne fai ne ia ke ‵kite ana mata, io me ko oi foki ne faka‵pula ne ia ana mata. Fesili atu ki a ia. A ia ko matua ‵lei. E ‵tau o faipati a ia mō ia eiloa.” 22  Ne fai atu ne ana mātua a pati konei me ne ma‵taku lāua i tino Iutaia, me ko leva ne fakaiku aka ne tino Iutaia, ke fakatea mai te sunako* so se tino e fakaasi ‵tonu mai ne ia i a Iesu ko te Keliso. 23  Tenei te pogai ne fai atu ei ana mātua: “A ia ko matua. Fesili atu ki a ia.” 24  Ne toe aumai ne latou i te lua o taimi a te tagata telā ne ‵kivi, kae fai atu ki a ia: “‵Viki atu ki te Atua; e iloa ne matou i te tagata tenei se tino agasala.” 25  Ne tali atu a ia: “E se iloa ne au me i te tino tenei se tino agasala io me ikai. E tasi fua te mea e iloa ne au, me i a au ne ‵kivi mua, kae nei ko ‵kite oku mata. 26  Fai atu ei latou ki a ia: “Ne a ana mea ne fai ki a koe? Ne faka‵pula pefea ne ia ou mata?” 27  Ne tali atu a ia ki a latou: “Ko oti ne fai atu ne au ki a koutou, kae ne seki fia faka‵logo koutou. Kaia e toe ma‵nako ei koutou ke lagona ne koutou? E a, e ma‵nako foki koutou ke fai koutou mo ana soko?” 28  Ona ko te mea tenā, ne taku fakamasei ei ne latou a ia kae fai atu: “A koe se soko o te tagata tenā, a ko matou ko soko o Mose. 29  E iloa ne matou i te Atua ne faipati ki a Mose, kae e se iloa ne matou te koga ne vau ei te tagata tenā.” 30  Ne tali atu te tagata tenei ki a latou: “E fakaofoofogia eiloa te mea tenei, me e se iloa ne koutou a te koga ne vau ei a ia, kae ne faka‵pula eiloa ne ia oku mata. 31  E iloa ne tatou i te Atua e se fakalogo ki tino agasala, kae ko so se tino e mataku ki te Atua kae fai ne ia tena loto, e fakalogo eiloa a ia ki te tino tenā. 32  Ne seki lagona aka eiloa ne tatou i aso mua me ne faka‵pula ne se tino a mata o se tagata telā ne fanau mai e ‵kivi. 33  Kafai te tagata tenei e seki vau mai te Atua, e seai eiloa sena mea e mafai o fai.” 34  Ne tali atu latou ki a ia: “A koe ne fanau mai i te agasala, kae ko vau koe o akoako matou?” ‵Tuli ei ne latou a ia keatea! 35  Ne lagona ne Iesu me ko oti ne ‵tuli ne latou a ia, kae i te mauaga ne ia o tou tagata, fai atu ei a ia: “E a, e fakatuanaki koe ki te Tama a te tagata?” 36  Ne tali atu te tagata tenā: “Kae ko oi la a ia, e tou ‵malu, ko te mea ke fakatuanaki au ki a ia?” 37  Ne fai atu a Iesu ki a ia: “Ko oti ne lavea ne koe a ia, kae ko te tino telā e faipati atu nei ki a koe ko ia tenā.” 38  Fai atu ei a ia: “Te Aliki, e fakatuanaki au ki a ia.” Ne ifo atu ei tou tagata ki a ia. 39  Ne fai atu a Iesu: “Tenā te pogai ne vau ei au ki te lalolagi: ko te mea ko tino ‵kivi ke ‵kite kae ko tino ‵kite ke ‵kivi.” 40  Ne lagona ne nisi Falesaio ana pati konei, kae fai atu ki a ia: “E a, a matou foki ne tino ‵kivi?” 41  Ne fai atu a Iesu ki a latou: “Moi ne ‵kivi koutou penei e seai ne otou agasala. Kae nei la e fai mai koutou, ‘A matou e ‵kite.’ Tela la, e tumau eiloa otou agasala.”

Fakamatalaga mai lalo

 Ke onoono ki te fakamatalaga mai lalo i te Mat 23:7
 Ke onoono ki te fakamatalaga mai lalo i te Mat 4:23.