Ioane 7:53–8:59

E se aofia i nisi lomiga mua mo nisi lomiga lauiloa a te fuaiupu e 53 ke oko ki te mataupu e 8 fuaiupu e 11, kolā e faitau penei (e isi ne kese‵kesega i nisi fuaiupu i te ‵gana Eleni mo nisi lomiga): 53  Tela la, olo ei latou katoa ki olotou fale. 8  Ne fano a Iesu ki te Mauga o Olive.  Kae i te tafataeao ‵malu, ne fanatu ei a ia ki te faletapu, sagasaga ki lalo kae kamata o akoako atu latou.  Kae ne avatu ne failautusi mo te kau Falesaio se fafine telā ne maua atu me e mulilua, kae i te otiga ne fakatu ne latou tou fafine i olotou tafa,  fai atu ei latou ki a Iesu: “Te Faiakoga, a te fafine tenei ne maua atu me e mulilua.  E fakatonu mai te Tulafono a Mose ki a tatou ke peipei ki fatu a vaegā fāfine penei. E a, se a tou manatu ki ei?”  Ne fai atu fua olotou pati konei ke tofotofo aka ei a ia, ko te mea ke isi se mea e ‵losi atu ki a ia. Kae ne punou ifo a Iesu kae kamata o tusi ne ia a mea i luga i te laukele ki tena matikao.  I te taimi ne kinau ‵soko atu ei latou ki a ia, ne tu tonu aka a ia ki luga kae fai atu ki a latou: “Ko te tino i a koutou telā e seai sena agasala ke pei muamua ne ia se fatu ki te fafine tenei.”  Ne toe punou ifo a ia ki lalo o tusi a mea i luga i te laukele.  Kae ne olo keatea a latou kolā ne lagona ne latou a te mea tenei, e kamata mai i te kau ma‵tua, kae ‵toe mai fua ei a ia fakatasi mo te fafine telā ne tu i olotou tafa. 10  Ne tu tonu aka a Iesu ki luga kae fai atu: “Te fafine, ko fea latou? E a, e seai se tino ne taku fakamasei ne ia koe?” 11  Ana muna: “E seai, e tou ‵malu.” Muna a Iesu: “E se taku fakamasei foki ne au a koe. Fano la. Ke mo a e toe agasala koe mai te taimi tenei o fano ki mua.” 12  Ne fai atu a Iesu ki a latou, ana muna: “Au ko te mainaga o te lalolagi. Ko te tino telā e tautali mai i a au ka se mafai eiloa o sasale i te pouliga, kae ka maua ne ia te mainaga o te ola.” 13  Ne fai atu a te kau Falesaio ki a ia: “E molimau koe ki a koe eiloa; e se tonu tau molimau.” 14  Ne tali atu a Iesu ki a latou: “Kafai foki e molimau au ki a au eiloa, e tonu loa taku molimau, me e iloa ne au te koga ne vau ei au mo te koga ka fano au ki ei. Kae e se iloa ne koutou te koga ne vau ei au mo te koga ka fano au ki ei. 15  A koutou e fakamasino e ‵tusa mo mea faka-te-foitino; kae e seai eiloa se tino e fakamasino ne au. 16  Kafai e fai ne au te fakamasinoga, e tonu eiloa taku fakamasinoga, me e se ko au tokotasi, kae ko te Tamana telā ne uga mai ne ia au e fakatasi mai ki a au. 17  Kae e tusi mai foki i te otou Tulafono, ‘A te molimau a tino e tokolua e tonu.’ 18  Au ko te tino telā e molimau e uiga ki a au, a ko te Tamana telā ne uga mai ne ia au e molimau foki ki a au.” 19  Ne fai atu latou ki a ia: “Tefea tou Tamana?” Ne tali atu a Iesu: “E se iloa ne koutou au io me ko toku Tamana. Moi ne iloa ne koutou au, e iloa foki ne koutou toku Tamana.” 20  Ne faipati ne ia a pati konei i te koga ‵teu tupe a koi akoako atu a ia i te faletapu. Kae ne seki puke a ia ne se tino me e seki oko ki tena taimi* tonu. 21  Ne toe fai atu a ia ki a latou: “Au ka fano keatea, ka salasala koutou ki a au, kae ka ‵mate koutou i otou agasala. Ko te koga telā e fano au ki ei e se mafai ne koutou o olo atu ki ei.” 22  Ne fai atu a tino Iutaia: “E a, ka tamate ne ia a ia eiloa? Me e fai mai a ia, ‘Ko te koga telā e fano au ki ei e se mafai ne koutou o olo atu ki ei.” 23  Ne fai atu a ia ki a latou: “A koutou ne tino i lalo nei; au se tino mai i luga. A koutou ne tino o te lalolagi nei; a ko au e sē se tino mai te lalolagi nei. 24  Tela la, e fai atu au ki a koutou, ka ‵mate koutou i otou agasala. Me kafai e se tali‵tonu koutou i a au ko ia, ka ‵mate eiloa koutou i otou agasala.” 25  Ne fai atu latou ki a ia: “Ko oi la koe?” Ne fai atu a Iesu ki a latou: “Kaia e faipati atu ei au ki a koutou? 26  E uke a mea e fia faipati atu ne au e uiga ki a koutou kae e uke foki a mea e ‵tau o fakamasino ne au. Se mea tonu me i te tino telā ne uga mai ne ia au e tonu, kae ko mea eiloa kolā ne lagona ne au mai i a ia e faipati ne au i te lalolagi.” 27  Ne seki maina latou me ne faipati a ia ki a latou e uiga ki te Tamana. 28  Ne fai atu a Iesu: “Kafai ko oti ne sisi aka ne koutou te Tama a te tagata, ko iloa ei ne koutou i a au ko ia, kae seai se mea e fai ne au i toku loto eiloa, kae ko mea fua kolā e akoako mai ne te Tamana ki a au e faipati ne au. 29  Kae ko ia telā ne uga mai ne ia au e fakatasi mai ki a au; e seki tuku tiaki ne ia au, me fai faeloa ne au a mea kolā e fiafia a ia ki ei.” 30  E tokouke a tino ne fakatuanaki ki a ia i te faiatuga ne ia o pati konei. 31  Ne fai atu a Iesu ki tino Iutaia kolā ne tali‵tonu ki a ia: “Kafai e tumau koutou i aku muna, ko oku soko ‵tonu koutou, 32  kae ka iloa ne koutou te munatonu, a ko te munatonu ka fakasaoloto ne ia koutou.” 33  Ne tali atu latou ki a ia: “A matou ko fanau a Apelaamo kae ne seki ‵nofo pologa eiloa matou ki se tino. E mafai la pefea o fai mai koe, ‘Ka fakasaoloto koutou’?” 34  Ne tali atu a Iesu ki a latou: “Au e fai ‵tonu atu ki a koutou, So se tino e fai ne ia te agasala ko te pologa eiloa a te agasala. 35  E se gata i ei, a te pologa e se tumau i loto i te kaufale ki te se-gata-mai; a ko te tama e tumau ki te se-gata-mai. 36  Tela la, kafai e fakasaoloto koutou ne te Tama, ka saoloto tonu eiloa koutou. 37  E iloa ne au i a koutou ko fanau a Apelaamo; kae ko koutou e lamalama ke tamate au, me e se talia ne koutou aku muna. 38  Ko mea kolā ko oti ne lavea ne au i taku ‵nofoga mo toku Tamana e faipati ne au; kae ko koutou e fai ne koutou a mea kolā ne lagona ne koutou mai te otou tamana.” 39  Ne tali atu latou ki a ia: “A te motou tamana ko Apelaamo.” Muna a Iesu ki a latou: “Kafai koutou ko fanau a Apelaamo, fai la a galuega a Apelaamo. 40  Kae nei ko lamalama koutou ke tamate au, te tagata telā ne fai atu ne ia ki a koutou a te mea tonu telā ne lagona ne au mai te Atua. Ne seki fai ne Apelaamo a te mea tenei. 41  E fai ne koutou a galuega a te otou tamana.” Olotou muna ki a ia: “A matou e se ne tama fua‵taka;* e tokotasi te motou Tamana, ko te Atua.” 42  Ne fai atu a Iesu ki a latou: “Moi fai te otou Tamana ko te Atua, penei ko a‵lofa mai koutou ki a au, me i a au ne vau mai te Atua kae tenei au ko nofo atu i konei. Ne seki vau au i a au eiloa, kae e isi se tino telā ne uga mai ne ia au. 43  Kaia e se maina ei koutou i aku pati? Me e se mafai o faka‵logo koutou ki aku muna. 44  A koutou ko fanau a te otou tamana ko te Tiapolo, kae e fai ne koutou a mea e manako ki ei te otou tamana. A ia se tino tatino i te kamataga, kae ne seki tumau i te munatonu, me e seai se munatonu i loto i a ia. Kafai e faipati a ia ki te loi, ko ana pati eiloa konā, me i a ia se tino loi a ko te tamana foki o te loi. 45  A ko au e faipati ki te mea tonu, kae e se tali‵tonu koutou ki a au. 46  Ko oi te tino i a koutou e mafai o fai mai i a au e agasala? Kafai e faipati au ki te mea tonu, kaia e se tali‵tonu ei koutou ki a au? 47  A ia telā e vau mai te Atua e fakalogo ki muna a te Atua. Tenā te pogai e se faka‵logo ei koutou, i a koutou ne seki o‵mai mai te Atua.” 48  Ne tali atu a tino Iutaia ki a ia: “E a, e se ‵tonu omotou muna konei, A koe se tino Samalia kae e isi se temoni i a koe?” 49  Ne tali atu a Iesu: “E seai se temoni i a au, kae e āva au ki toku Tamana, a ko koutou e se āva mai ki a au. 50  A ko au e se ‵sala ki oku tavaega; e isi se Tino telā e ‵sala ki ei a ko ia foki ko te famasino. 51  Au e fai ‵tonu atu ki a koutou, So se tino e fakalogo ki aku pati, ka se lavea eiloa ne ia te mate.” 52  Ne fai atu a tino Iutaia ki a ia: “Nei la, ko iloa eiloa ne matou me e isi se temoni i a koe. Ko mate a Apelaamo e pelā foki mo te kau pelofeta, kae e fai mai koe, ‘So se tino e fakalogo ki aku pati, ka se tami eiloa ki te mate.’ 53  E a, e sili atu koe i te motou tamana ko Apelaamo telā ko mate? Ko ‵mate atu foki a pelofeta. Ko oi la koe i tou taofi?” 54  Ne tali atu a Iesu: “Kafai e faka‵malu ne au a au eiloa, e seai se aoga o toku ‵malu. Ko toku Tamana e faka‵malu ne ia au, ko ia telā e fai mai koutou me ko te otou Atua; 55  kae e se iloa ne koutou a ia. E iloa ne au a ia. Kafai e fai atu au me e se iloa ne au a ia, ka fai eiloa au e pelā mo koutou, se tino loi. Kae e iloa ne au a ia kae e fakalogo foki au ki ana muna. 56  Ne fiafia kae fakamoemoe malosi a Apelaamo te otou tamana ke lavea ne ia a mea ka fai ne au, kae ne lavea eiloa ne ia kae ne fiafia malosi.” 57  Ne fai atu ei a tino Iutaia ki a ia: “E seki kātoa tou limasefulu tausaga, kae e fai mai koe me ko oti ne lavea ne koe a Apelaamo?” 58  Ne fai atu a Iesu ki a latou: “Au e fai ‵tonu atu ki a koutou, a koi tuai o fanau mai a Apelaamo, a ko leva au ne ola.” 59  Ne puke ne latou a fatu ke peipei a ia; kae ne ‵muni a Iesu, fano ei ki tua mo te faletapu.

Fakamatalaga mai lalo

Ioa 8:20  Io me “e seki oko ki tena itula tonu.”
Ioa 8:41  I te ‵gana Eleni, “ko fanau o amioga fakatauavaga sē ‵tau.” Ke onoono ki te Mataupu Fakaopoopo e 5.