Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Ioane 7:1-53

7  I te otiga o mea konei ne faimalaga sale atu a Iesu i Kalilaia, me ne seki manako a ia o fai penā i Iuta, i te mea ne salasala a tino Iutaia ke tamate a ia.  Kae ko pili eiloa ki te fakamanatuga o fale fakamalu‵malu a te kau Iutaia.  Ne fai atu ei ana taina ki a ia: “Tiakina te koga tenei kae fano ki Iuta, ko te mea ke lavea foki ne ou soko a galuega kolā e fai ne koe.  Me i te tino telā e manako ke lauiloa a ia i mua o nisi tino e se fai ‵funa ana mea. Kafai e fai ne koe a mea konei, ke na fakaasi atu la koe ki te lalolagi.”  A te ‵tonuga loa, ne seki fakatuanaki ana taina ki a ia.  Ne fai atu a Iesu ki a latou: “E seki oko ki toku taimi tonu, kae e ‵lei faeloa ki a koutou a taimi katoa.  E seai se pogai e takalia‵lia ei te lalolagi ki a koutou, kae e takalia‵lia mai ki a au, me e molimau atu au i olotou galuega e matagā.  Olo koutou ki te fakamanatuga; au e se fano nei ki te fakamanatuga tenei, me e seki oko ki toku taimi tonu.”  I te otiga o ana pati konā ki a latou, nofo ei a ia i Kalilaia. 10  Kae i te otiga ne olo ana taina ki te fakamanatuga, ne fanatu foki a ia. Ne seki fano fakaasiasi kae ne fano ‵muni atu. 11  Ne kamata o salasala a tino Iutaia ki a ia i te fakamanatuga kae fai aka, penei: “Tefea te tagata tenā?” 12  Ne lasi eiloa te musu‵musu o te vaitino e uiga ki a ia. E fai mai a nisi tino: “A ia se tagata ‵lei.” A ko nisi tino e fai mai: “Ikai, e takitaki ‵se fua ne ia a tino.” 13  E seai se tino e mafai o faipati e uiga ki a ia i mua o tino katoa me ne ma‵taku latou i tino Iutaia. 14  Kāti ko te fa o aso o te fakamanatuga kae fanatu a Iesu ki loto i te faletapu kae kamata o akoako atu i ei. 15  Ne ofo a tino Iutaia, olotou muna: “Ne poto pefea a te tagata tenei i tusi, me ne seki akoga a ia i se akoga?” 16  Ne tali atu a Iesu ki a latou kae fai atu: “A mea kolā e akoako atu ne au e se i a aku, kae i a te tino telā ne uga mai ne ia au. 17  Kafai e manako se tino ke fai ne ia te loto o te Atua, ka iloa ei ne ia me i akoakoga konei e aumai mai te Atua io me e fai atu fua ne au i aku pati eiloa. 18  A ia telā e faipati ki ana manatu eiloa e ‵sala atu ke maua ana tavaega; a ko ia telā e ‵sala atu ki tavaega o te tino telā ne uga mai ne ia a ia, a te tino tenā e fakamaoni kae amiotonu foki. 19  E a, e seki tuku atu ne Mose ki a koutou te Tulafono? Kae e seai se tino i a koutou e fakalogo ki te Tulafono. Kaia la e lamalama ei koutou o tamate au?” 20  Ne tali atu te vaitino: “E isi se temoni i a koe. Ko oi e lamalama o tamate koe?” 21  Ne tali atu a Iesu ki a latou: “E tasi te mea ne fai ne au, kae ne ofo katoa koutou i ei. 22  Tenei te pogai ne tuku atu ei ne Mose te pilitome ki a koutou—e se fai pelā me ne māfua mai i a Mose, kae mai i otou tupuga—kae e pilitome ne koutou te tagata i te Sapati. 23  Kafai e pilitome se tagata i te Sapati ko te mea ke se soli i ei te tulafono a Mose, kaia la e kaitaua mai ei koutou ki a au me e faka‵lei katoatoa ne au se tino i te Sapati? 24  Sa fakamasino ne koutou a mea i olotou foliga i tua, kae fai ke tonu te otou fakamasinoga.” 25  Tela la, kamata ei o fai aka penei a nisi tino i Ielusalema: “E se ko te tagata tenei e lamalama ne latou ke tamate? 26  Kae kiloke! tenā eiloa e faipati mai a ia ki tino e tokouke, kae e seai ne olotou pati e fai ki a ia. E a, e seki fakamautinoa aka ne tino pule me tenei eiloa te Keliso? 27  E iloa ne matou te koga ne vau ei te tagata tenei; kafai e vau te Keliso e seai eiloa se tino e ‵tau o iloa ne ia me ne vau a ia mai fea.” 28  A koi akoako atu a ia i te faletapu, ne faipati atu a Iesu i se leo maluga: “E iloa ne koutou au kae e iloa foki ne koutou te koga ne vau ei au. Kae ko au ne seki vau i a au eiloa. A te tino telā ne uga mai ne ia au se tino tonu eiloa, kae e se iloa ne koutou a ia. 29  E iloa ne au a ia, me i a au ko tena sui, kae ko te Tino tenā ne uga mai ne ia au.” 30  Ne kamata ei latou o lamalama ke puke a ia, kae e seai se tino ne oko atu ana lima ki a ia, me ne seki oko ki tena taimi tonu. 31  E ui i ei, e tokouke a tino mai te vaitino ne fakatuanaki ki a ia; kae fai aka olotou pati penei: “Kafai e oko mai te Keliso, e a, ka uke atu ana galuega ‵mana e fai i lō te tagata tenei?” 32  Ne lagona ne te kau Falesaio a te vaitino e musu‵musu ki mea konei e uiga ki a ia, kae ne uga atu ne faitaulaga pule mo Falesaio a ofisa ke puke a ia. 33  Fai atu ei a Iesu: “Au ka ‵nofo fakatasi eiloa mo koutou i se taimi tai leva a koi tuai au o fano ki a ia telā ne uga mai ne ia au. 34  Ka ‵sala mai koutou ki a au, kae ka se maua ne koutou au. Ko te koga e nofo ei au e se mafai ne koutou o olo atu ki ei.” 35  Ne fai‵pati a tino Iutaia i a latou eiloa: “Tefea te koga ka fano ki ei te tagata tenei, ko te mea ke se mafai o maua ne tatou a ia? E a, ka fano a ia ki tino Iutaia kolā e salalau valevale i Eleni kae akoako atu a tino Eleni? 36  Ne a uiga o ana pati konei, ‘Ka ‵sala mai koutou ki a au, kae ka se maua ne koutou au, kae ko te koga e nofo ei au, e se mafai ne koutou o olo atu ki ei’?” 37  I te aso fakaoti, ko te ‵toe aso sili eiloa o te fakamanatuga, ne tu aka a Iesu ki luga kae faipati atu i se leo maluga: “Kafai se tino e fia inu, ke na vau ki a au o inu. 38  A te tino telā e fakatuanaki mai ki a au, e pelā eiloa mo muna i Tusitusiga Tapu, ‘Ka ‵tafe mai i loto i a ia a te vai o te ola.’” 39  Kae ne faipati ne ia te mea tenei e uiga ki te agaga telā ko pili o maua ne tino kolā e fakatuanaki ki a ia, me ne seki ai se agaga i te taimi tenā i te mea ne seki faka‵malugina a Iesu. 40  Tela la, ne kamata o fai aka a nisi tino mai te vaitino penei: “Tenei eiloa a te Pelofeta.” 41  Ne fai mai a nisi tino: “Tenei te Keliso.” Kae fai mai a nisi tino: “E a, e ‵tau o vau te Keliso mai Kalilaia? 42  E a, e seki fai mai i Tusitusiga Tapu me i te Keliso e vau i te gafa o Tavita, mai i Petelema te tamā fa‵kai telā ne nofo i ei a Tavita?” 43  Ne fakatau kinau ei a te vaitino e uiga ki a ia. 44  Kae ne ma‵nako a nisi tino ke puke ne latou a ia, kae seai eiloa se tino ne oko atu ana lima ki a ia. 45  Ne ‵foki atu a ofisa ki faitaulaga pule mo te kau Falesaio, kae fai atu a te kau Falesaio ki a latou: “Kaia ne seki aumai ei ne koutou a ia?” 46  Ne tali atu a ofisa: “Ne seki ai eiloa se tagata kai faipati penei mo te tagata tenei.” 47  Ne fai atu a te kau Falesaio: “E a, ko takitaki‵segina foki koutou? 48  E a, ko oti ne fakatuanaki se tino pule io me se Falesaio e tokotasi ki a ia? 49  Kae ko te vaitino kolā e se iloa ne latou te Tulafono ne tino malaia.” 50  Ne fai atu a Nikotemo, telā ne fanatu muamua ki a ia, kae se tino e tokotasi o latou: 51  “E a, e se fakamasino ne te ‵tou tulafono se tagata seiloga ke faka‵logo muamua tatou ki ei ke iloa ei ne tatou ana mea ne fai?” 52  Ne tali atu latou ki a ia: “E a, a koe foki se tino mai Kalilaia? Sukesuke kae ka lavea ne koe me e seai se pelofeta e ‵tau o sae mai i Kalilaia.” E se aofia i nisi lomiga mua mo nisi lomiga lauiloa a te fuaiupu e 53 ke oko ki te mataupu e 8 fuaiupu e 11, kolā e faitau penei (e isi ne kese‵kesega i nisi fuaiupu i te ‵gana Eleni mo nisi lomiga): 53  Tela la, olo ei latou katoa ki olotou fale.

Fakamatalaga mai lalo