Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Ioane 6:1-71

6  I te otiga o mea konei, fanatu ei a Iesu ki te suā feitu o te vai o Kalilaia, io me ko Tipelia.  Kae ne tau‵tali atu faeloa a te vaitino tokouke i a ia, me ne lavea ne latou a galuega ‵mana ne fai ne ia ki tino kolā ne ma‵saki.  Ne fanaka a Iesu ki luga i se mauga, kae ne sagasaga a ia i konā fakatasi mo ana soko.  Ko pili o oko ki te Paseka, te aso fakamanatu o tino Iutaia.  I te kiloakaga a Iesu ki luga, lavea ei ne ia te vaitino tokouke ko olo atu ki a ia, fai atu ei a ia ki a Filipo: “Tefea te koga ka ‵togi ei ne tatou a falaoa ke ‵kai ei a latou konei?  Kae ne fai atu fua ne ia a pati konei ke tofotofo aka ei a tou tagata, me ne iloa ne ia te mea telā ka fai ne ia.  Ne tali atu a Filipo ki a ia: “E se lava te lua selau tenali ke ‵togi ki ei a falaoa mō latou, ko te mea fua ke maua ne mu mea ma tino taki tokotasi konei.”  Ne fai atu ki a ia se soko e tokotasi, ko Anitelea te taina o Simona Petelu, penei:  “E isi se tamaliki tenei e isi ne ana falaoa e lima mo tamā ika e lua. Kae se a te aoga o mea konā ki tino e tokouke konei?” 10  Ne fai atu a Iesu: “Fai ke saga‵saga a tāgata konā.” A te koga tenā se koga moukua, tela la, ne saga‵saga ei a tāgata i konā, kāti e toko 5,000 te lotou aofaki. 11  Ne puke ne Iesu a falaoa, kae i te otiga ne fai tena fakafetai, tufa atu ei ne ia ki tino kolā e saga‵saga. Ne fai foki penā ki tamā ika, ki te uke telā ne ma‵nako latou ki ei. 12  Kae i te taimi ne ma‵kona ei latou, fai atu ei a ia ki ana soko: “‵Luku mai a toegā meakai, ko te mea ke seai se mea e māumāu.” 13  Tela la, ne ‵luku mai ne latou, kae ne faka‵fonu ne latou a tapola e sefululua ki toegā meakai mai falaoa e lima, kolā ne ‵toe i te otiga a latou ne ‵kai. 14  Tela la, i te laveaga ne tāgata a galuega ‵mana kolā ne fai ne ia, fai aka ei olotou pati: “Tenei eiloa te pelofeta telā ne ‵tau o vau ki te lalolagi.” 15  I te iloaga ne Iesu me ka o‵mai latou o puke a ia mo fai te lotou tupu, ne fano tokotasi ei a ia ki te mauga. 16  I te okoga ki te afiafi, ne olo atu ana soko ki te namo. 17  Ne ‵sopo latou ki te poti kae olo atu ki Kapanaumi i te suā feitu. Ko pouli i te taimi tenei kae e seki oko atu eiloa a Iesu ki a latou. 18  Ne kamata foki o sou te namo me ko agi malosi te matagi. 19  Ne pūlu te lotou poti, kāti ko te tolu io me ko te fa maila, kae ne lavea atu ne latou a Iesu e sasale i luga i te vai. Ko pili atu a ia ki te poti; kae ne ma‵taku ei latou. 20  Ne fai atu a ia ki a latou: “Ko au fua tenei, sa ma‵taku!” 21  Ne fakasopo ne latou a ia mo te fia‵fia ki loto i te poti, kae ne oko atu eiloa te poti ki te koga telā ne taumafai latou o olo ki ei. 22  I te suā aso, ne lavea ne te vaitino kolā ne ‵tu i te suā feitu o te vai me ko seai se poti i konā kae se tamā vaka fua. Ne iloa foki ne latou me ne seki sopo a Iesu i te poti kae ko ana soko fua kolā ne olo atu i ei. 23  Kae ne oko atu a poti mai Tipelia ki tafa o te koga telā ne ‵kai ei latou ki falaoa i te otiga ne fai ne te Aliki te fakafetai. 24  Tela la, i te laveaga ne te vaitino i a Iesu mo ana soko ko ‵galo i konā, ‵sopo ei latou ki olotou poti kae olo atu o ‵sala a Iesu i Kapanaumi. 25  I te mauaga ne latou a ia i te suā feitu o te vai, fai atu ei latou ki a ia: “Te Faiakoga,* anafea ne oko mai ei koe ki konei?” 26  Ne tali atu a Iesu ki a latou: “Au e fai ‵tonu atu ki a koutou, a koutou e se ‵sala mai ki a au ona ko te mea ne lavea ne koutou a galuega ‵mana, kae ona ko koutou ne ‵kai ki falaoa, ma‵kona ei koutou. 27  Sa ga‵lue ke maua a meakai kolā e se tumau, kae ke maua a meakai kolā e tumau mō te ola se-gata-mai, telā ka tuku atu ne te Tama a te tagata ki a koutou; me ko oti ne tuku atu ne te Atua te Tamana a te fakamailoga o tena taliaga ki luga i te tino tenei.” 28  Tela la, ne fai atu latou ki a ia: “Se a te mea e ‵tau o fai ne matou ke ga‵lue ei matou i galuega a te Atua?” 29  Ne tali atu a Iesu ki a latou: “Tenei te galuega a te Atua, ke fakatuanaki koutou ki te tino telā ne uga mai ne Ia.” 30  Tela la, ne fai atu latou ki a ia: “Se a te fakailoga ka fai ne koe ko te mea ke lavea ne matou ko tali‵tonu ei matou ki a koe? Se a te galuega e fai ne koe? 31  Ne ‵kai omotou tupuga ki te manai i te koga lavaki, e pelā eiloa mo muna ne tusi i te tusi, ‘Ne tuku atu ne ia a falaoa mai te lagi ke ‵kai ei latou.’” 32  Ne fai atu ei a Iesu ki a latou: “Au e fai ‵tonu atu ki a koutou, ne seki tuku ifo ne Mose a falaoa mai te lagi, kae e tuku ifo ne toku Tamana te falaoa tonu mai te lagi. 33  Me i te falaoa a te Atua ko te tino telā ne fanaifo mai te lagi ke tuku atu te ola ki te lalolagi.” 34  Fai atu ei latou ki a ia: “Te Aliki, tuku mai faeloa te falaoa tenā ki a matou.” 35  Ne fai atu a Iesu ki a latou: “Au ko te falaoa o te ola. A te tino telā e vau ki a au ka se toe fiakai eiloa, kae ko te tino telā e fakatuanaki mai ki a au ka se toe fiainu eiloa. 36  Kae e fai atu au ki a koutou, ko oti ne lavea ne koutou au kae e se tali‵tonu eiloa koutou. 37  A tino katoa kolā e tuku mai ne te Tamana ki a au ka o‵mai ki a au, kae ko te tino telā e vau ki a au ka se ‵tuli eiloa ne au keatea; 38  me i a au ne vau mai te lagi o fai te loto o ia telā ne uga mai ne ia au kae e se ko toku loto. 39  Tenei te loto o ia telā ne uga mai ne ia au, ko te mea ke se galo se tino i tino katoa kolā ko oti ne tuku mai ne ia ki a au kae e ‵tau o faka‵tu aka ne au a latou i te aso fakaoti. 40  Tenei te loto o toku Tamana, ko tino katoa kolā e lavea ne latou te Tama kae fakatuanaki ki a ia ka maua eiloa ne latou te ola se-gata-mai, kae ka toe faka‵tu aka ne au a latou i te aso fakaoti.” 41  Tela la, ne kamata o mui‵mui a tino Iutaia e uiga ki a ia me ne fai atu: “Au ko te falaoa telā ne fanaifo mai te lagi.” 42  Kae ne fai atu latou, penei: “E se ko Iesu tenei te tama a Iosefa, telā e iloa ne tatou a tena tamana mo tena mātua? E pefea la o fai mai a ia penei, ‘Au ne fanaifo mai te lagi’? 43  Ne tali atu a Iesu ki a latou: “Sa mui‵mui koutou. 44  E seai se tino e vau ki a au seiloga ke talia a ia ne te Tamana, telā ne uga mai ne ia au; kae ka toe fakatu aka ne au a ia i te aso fakaoti. 45  E tusi mai penei i tusi a te kau Pelofeta, ‘Ka akoako eiloa a latou katoa ne Ieova.’ So se tino telā ko oti ne lagona ne ia kae tauloto mai i te Tamana, e vau eiloa ki a au. 46  E seai se tino kai lavea ne ia te Tamana kae na ko ia fua telā ne vau mai te Atua; ko oti ne lavea ne ia te Tamana. 47  Au e fai ‵tonu atu ki a koutou, a ia telā e talitonu ki ei e maua ne ia te ola se-gata-mai. 48  “Au ko te falaoa o te ola. 49  Ne ‵kai otou tupuga ki te manai i te koga lavaki kae e ui i ei ne ‵mate latou. 50  Tenei te falaoa ne fanaifo mai te lagi, ko te mea ko tino katoa kolā e ‵kai ki ei ka se ‵mate. 51  Au ko te falaoa o te ola telā ne fanaifo mai te lagi; so se tino e kai ki te falaoa tenei ka ola ki te se-gata-mai; kae e tonu eiloa i te falaoa telā ka tuku atu ne au ko toku foitino ke sui ei a ola o tino i te lalolagi.” 52  Ne fakatau kinau a tino Iutaia, kae fai aka, penei: “E mafai pefea o tuku mai ne te tagata tenei a tena foitino ke kai ne tatou?” 53  Fai atu ei a Iesu ki a latou: “Au e fai ‵tonu atu ki a koutou, ka se maua ne koutou te ola* seiloga ke ‵kai koutou ki ‵kano o te Tama a te tagata kae inu ki tena toto. 54  A ia telā e kai ki oku ‵kano kae inu ki toku toto ka maua ne ia te ola se-gata-mai, kae ka toe fakatu aka ne au a ia i te aso fakaoti; 55  me i oku ‵kano ko te mea‵kai tonu eiloa, a ko toku toto ko te mea inu tonu eiloa. 56  A ia telā e kai ki oku ‵kano kae inu ki toku toto e tumau i te ‵kau fakatasi māua, a ko au e ‵kau fakatasi foki mo ia. 57  E pelā eiloa mo te Tamana ola telā ne uga mai ne ia au e ola foki au ona ko te Tamana, kae ko ia telā e kai ki toku foitino, ka ola foki a ia ona ko au. 58  Tenei te falaoa ne fanaifo mai te lagi. E se fai pelā mo te taimi ne ‵kai ki ei otou tupuga kae oti ko ‵mate ei. A ia telā e kai ki te falaoa tenei ka ola ki te se-gata-mai.” 59  Ne faipati a ia ki mea konei i te koga telā ne maopoopo ei a tino i Kapanaumi. 60  Tela la, i te lagonaga ne soko e tokouke a te mea tenei, fai atu ei penei: “E fakatakalia‵lia a pati konei; ko oi la e fia fakalogologo ki ei?” 61  Kae ne iloa ne Iesu i ana soko e mui‵mui e uiga ki te mea tenei, fai atu ei a ia ki a latou: “E a, e ‵poi* koutou i te mea tenei? 62  E a la māfai e lavea ne koutou te Tama a te tagata e fanaka ki te koga telā ne nofo muamua ei a ia? 63  Ko te agaga telā e tuku mai ne ia te ola; kae e seai eiloa se aoga o te foitino. A pati kolā ne fai atu ne au ki a koutou ko te agaga mo te ola. 64  Kae e isi ne tino i a koutou e se tali‵tonu.” Me ne iloa ne Iesu i te kamataga a tino kolā ne seki tali‵tonu mo te tino telā ka fakatogafiti ne ia a ia. 65  Fai atu ei a ia: “Tenā te pogai ne fai atu ei au ki a koutou, E seai se tino e vau ki a au seiloga ke talia a ia ne te Tamana.” 66  Ona ko te mea tenei ne toe ‵foki ei ana soko e tokouke ki mea ko oti ne tiakina ne latou kae ne seki toe tau‵tali atu i a ia. 67  Ne fai atu a Iesu ki te toko sefululua: “E a, e ma‵nako foki koutou o olo keatea?” 68  Ne tali atu a Simona Petelu ki a ia: “Te Aliki, ko oi te tino ka olo matou ki ei? A muna o te ola se-gata-mai konā e nofo mo koe; 69  kae ko oti ne tali‵tonu kae iloa ne matou i a koe ko te Tino Tapu a te Atua.” 70  Ne tali atu a Iesu ki a latou: “E a, e se ko au ne filifili ne au te toko sefululua o koutou? Kae e tokotasi i a koutou se tino fakamasei tino.”* 71  Ne faipati eiloa a ia e uiga ki a Iuta te tama a Simona te Isikaliota; me ka fakatogafiti ne te tino tenei a ia, e ui eiloa a ia se tokotasi o te toko sefululua.

Fakamatalaga mai lalo

 Ke onoono ki te fakamatalaga mai lalo i te Mat 23:7.
 I te ‵gana Eleni, ko te “seai se ola i loto i a koutou.”
 I te ‵gana Eleni, ko te “pa‵ku io me siga.”
 Io me “se tiapolo.”