Ioane 5:1-47

5  Fakamuli ifo, ne fai ei se aso fakamanatu o tino Iutaia, kae ne fanatu a Iesu ki Ielusalema.  E isi se vai koukou i te mataloa o mamoe i Ielusalema e fakaigoa i te ‵gana Epelu ki a Petesa mo ana koga fakamalu‵malu e lima.  E ta‵kato sale i konā a tino ma‵saki e tokouke, tino ‵kivi, tino ‵pili mo tino kolā e se katoatoa olotou foitino. 4 * ——  Ne nofo atu i konā se tagata telā ne masaki i tausaga e tolusefulu valu.  I te laveaga ne Iesu te tagata tenei e takato i lalo, kae ona ko tena iloa me ne masaki a ia i se taimi leva, fai atu ei a ia ki te tagata tenā: “E manako koe ke malosi koe?”  Ne tali atu te tagata masaki: “Tou ‵malu, e seai se tino e tuku ne ia au ki lalo i te vai i te taimi e ‵lepu ei; kae kafai e fanaifo au a ko mua atu te suā tino i a au.”  Fai atu ei a Iesu ki a ia: “Tu ki luga, puke tou moega kae sasale.”  Ne ‵lei fakavave te tagata tenā, puke tena moega kae kamata o sasale. A te aso tenā ko te Sapati. 10  Ne fai atu ei a tino Iutaia ki te tagata telā ne faka‵lei aka: “A te mea tenei ko te Sapati, kae e tapu ma ave ne koe tou moega.” 11  Kae ne tali atu a ia ki a latou: “A te tino telā ne faka‵lei ne ia au ko ia eiloa telā ne fai mai, ‘Puke tou moega kae sasale.’” 12  Ne fesili atu latou ki a ia: “Ko oi te tino ne fai atu ki a koe, ‘Puke tou moega kae sasale’?” 13  Kae ne seki iloa ne te tagata telā ne faka‵lei a te tino tenā, me ko oti ne fano keatea a Iesu, a ko te koga tenā e ‵fonu i te vaitino. 14  I te otiga o mea konei ne maua atu ei ne Iesu a tou tagata i te faletapu kae fai atu ki a ia: “Kiloke, a koe nei ko ‵lei. Sa toe agasala la, ko te mea ke se tupu ki a koe se mea telā e masei atu.” 15  Ne fano te tagata tenā kae fakailoa atu ki tino Iutaia me ko Iesu telā ne faka‵lei ne ia a ia. 16  Ona ko te mea tenei ne fakasaua ei ne tino Iutaia a Iesu, me ne fai ne ia a mea konei i te Sapati. 17  Kae ne tali atu a ia ki a latou: “A toku Tamana e galue faeloa ke oko mai eiloa ki te taimi nei, a ko au foki e galue faeloa.” 18  Ona ko te mea tenei, ne ‵sala atu faeloa a tino Iutaia ke tamate a ia, i te mea e se gata fua i te soli ne ia o te Sapati kae ne fai mai foki tou tagata me i te Atua ko tena Tamana, kae e ‵pau foki lāua mo te Atua. 19  Tela la, ne fai atu a Iesu ki a latou: “Au e fai ‵tonu atu ki a koutou, E se mafai ne te Tama o fai se mea i tena loto eiloa, kae e fai fua ne ia a mea kolā e lavea ne ia e fai ne te Tamana. Me i so se mea e fai ne te Tamana, e fai foki ne te Tama. 20  Me e alofa te Tamana ki te Tama kae e fakaasi atu ki a ia a mea katoa kolā e fai ne ia. Ka fakaasi atu foki ki a ia a galuega e sili fakafia atu i mea konei, ko te mea ke ofo koutou. 21  E pelā mo te Tamana e toe faka‵tu aka ne ia a tino ‵mate kae e tuku atu te ola ki a latou, e penā foki te Tama, e tuku atu ne ia te ola ki tino kolā e loto a ia ki ei. 22  E seai se tino e fakamasino ne te Tamana, me ko oti ne tuku atu ne ia ki te Tama ke fai katoa ne ia te fakamasinoga, 23  ko te mea ke fakaaloalo a tino katoa ki te Tama, e pelā eiloa mo te lotou fakaaloalo ki te Tamana. A te tino telā e se fakaaloalo ki te Tama e se fakaaloalo foki ki te Tamana telā ne uga mai ne ia a ia. 24  Au e fai ‵tonu atu ki a koutou, ko te tino telā e lagona ne ia aku pati kae e talitonu ki a ia telā ne uga mai ne ia au ka maua ne ia te ola se-gata-mai, ka se fakamasinogina a ia kae ko sao atu foki a ia mai te mate ki te ola. 25  “Au e fai ‵tonu atu ki a koutou, Ka oko mai te itula, kae ko oko nei ki ei, ka lagona ei ne tino ‵mate a te leo o te Tama a te Atua kae ko tino kolā e faka‵logo ki ei ka ola. 26  E pelā eiloa mo te Tamana telā e maua ne ia te malosi ke tuku atu te ola, ne tuku atu foki ne ia ki te Tama a te malosi ke tuku atu te ola. 27  Kae ko oti ne tuku atu ne ia ki a ia te pule ke fai te fakamasinoga, me i a ia ko te Tama a te tagata. 28  Sa ofo koutou i te mea tenei, me ka oko mai eiloa te itula e lagona ei ne tino katoa kolā e i loto i tanuga* a tena leo 29  ko ulu mai ei ki tua. Ko latou kolā ne fai mea ‵lei ka toe‵tu mai ki te ola, a ko latou kolā ne fai mea ma‵sei ka toe‵tu mai ki te fakamasinoga. 30  E se mafai ne au o fai se mea e tasi i toku loto eiloa. Au e fakamasino e ‵tusa eiloa mo mea kolā e lagona ne au, kae e amiotonu taku fakamasinoga, me e se fai ne au i toku loto eiloa, kae ko te loto o ia telā ne uga mai ne ia au. 31  “Kafai e molimau atu fua au e uiga ki a au eiloa, e se tonu taku molimau. 32  E isi se tino telā e molimau e uiga ki a au, kae e iloa ne au me i te molimau telā e tuku mai ne ia e uiga ki a au e tonu. 33  Ko oti ne uga atu ne koutou a tāgata ki a Ioane, kae ko oti ne molimau atu a ia e uiga ki te mea tonu. 34  Kae e se talia ne au se molimau mai tāgata, kae e fai atu ne au a mea konei ko te mea ke ‵sao koutou. 35  A te tagata tenā se moli telā e ka kae maina, kae ne fia‵fia malosi koutou i se taimi toetoe i tena mainaga. 36  E sili atu taku molimau i lō Ioane, me i galuega kolā ne tuku mai ne toku Tamana ke fakataunu ne au, kae ko galuega kolā e fai nei ne au, e fai pelā me se molimau me ne uga mai au ne te Tamana. 37  A te Tamana foki telā ne uga mai ne ia au ko oti ne molimau mai e uiga ki a au. E seki lagona aka eiloa ne koutou a tena leo i se taimi e tasi io me ne lavea ne koutou a ia. 38  E se tumau foki tena muna i loto i a koutou, me e se tali‵tonu koutou ki te tino telā ne uga mai ne ia. 39  “E suke‵suke koutou ki Tusitusiga Tapu me e mafau‵fau koutou me e maua ne koutou i ei a te ola se-gata-mai. Kae konā eiloa a mea ne molimau mai e uiga ki a au. 40  E se ma‵nako koutou o o‵mai ki a au ko te mea ke maua ne koutou a te ola. 41  E se talia ne au a tavaega mai tino, 42  kae e iloa ‵lei ne au me e se nofo i loto i a koutou a te alofa o te Atua. 43  Au ne vau i te igoa o toku Tamana, kae e se talia ne koutou au. Moi fai ne vau se tino i tena igoa eiloa, penei ko oti ne talia ne koutou te tino tenā. 44  E mafai pefea o tali‵tonu koutou, me e talia ne koutou a tavaega mai nisi tino kae e se ‵sala atu koutou ki tavaega mai i te Atua tonu e tokotasi? 45  Sa mafau‵fau me ka ‵losi ne au a koutou ki te Tamana; e isi se tino telā e ‵losi ne ia koutou, ko Mose, telā e fakamoe‵moe koutou ki ei. 46  E tonu, moi ne tali‵tonu koutou ki a Mose penei ko tali‵tonu mai foki koutou ki a au, me ne tusi mai te tino tenā e uiga ki a au. 47  Kae kafai e se tali‵tonu koutou ki mea ne tusi mai ne te tino tenā, e tali‵tonu la pefea koutou ki aku pati?”

Fakamatalaga mai lalo

Ioa 5:4  Ke onoono ki te fakamatalaga mai lalo i te Mat 17:21.
Ioa 5:28  E fakasino atu a te pati Eleni ki tanuga kolā e fakamasaua ei a tino kolā ko oti ne ‵mate