Ioane 4:1-54

4  I te iloaga ne te Aliki me ko ‵logo te kau Falesaio me ko tokouke a tino ko fai mo soko kae papatiso foki ne Iesu i lō Ioane—  e tiga eiloa ne fai ne soko o Iesu a te papatisoga kae e se ko Iesu—  ne tiakina ne ia a Iuta kae toe foki atu ki Kalilaia.  Kae ne ‵tau o ui atu a ia i loto i Samalia.  Ne oko atu a ia ki se fa‵kai i Samalia e igoa ki a Sukala i tafa o te laumanafa telā ne tuku ne Iakopo ki tena tama ko Iosefa.  Ne tu i konā a te vaikeli o Iakopo. Ne fi‵ta a Iesu mai te malaga, telā sagasaga ifo ei a ia i tafa o te vaikeli. Kāti ko te ono o itula.*  Ne fanatu se fafine Samalia o asu vai, kae ne fai atu a Iesu ki a ia: “Aumai aka ne vai ke inu au.”  (Me ko oti ne olo ana soko ki te fa‵kai o ‵togi meakai.)  Tela la, fai atu ei te fafine Samalia ki a ia: “E mafai pefea o fai mai koe ki a au ke inu koe i a koe se tino Iutaia a ko au se fafine Samalia?” (Me e seai ne fesokotakiga e fai sāle i te va o tino Iutaia mo tino Samalia.) 10  Ne tali atu a Iesu ki a ia: “Moi ne iloa ne koe te meaalofa faivasaga a te Atua penā foki loa mo te tino telā e fai atu ki a koe, ‘Aumai aka ne vai ke inu au,’ penei ko fakamolemole mai koe ki a ia, ko tuku atu ei ne ia ki a koe a te vai o te ola.” 11  Ne fai atu tou fafine: “Tou ‵malu, e seai sau ‵soni mo ‵soni aka a vai, kae e ‵poko a te vaikeli. Tela la, e maua ne koe i fea a te vai o te ola tenei? 12  E a, e sili atu koe i te motou tupuga ko Iakopo, telā ne tuku mai ne ia te vaikeli tenei ki a matou kae ne inu ei a ia mo ana tama mo ana pulumakau?” 13  Ne tali atu a Iesu ki a ia: “A tino katoa kolā e inu ki te vai tenei e toe fia inu foki. 14  So se tino e inu ki te vai telā ka tuku atu ne au ka se toe fia inu eiloa, kae ko te vai telā ka tuku atu ne au ki a ia ka fai pelā me se punavai i loto i a ia telā ka ‵puna aka ke tuku mai ei te ola se-gata-mai.” 15  Ne fai atu te fafine ki a ia: “Tou ‵malu, tuku mai ki a au a te vai tenā, ko au ke se toe fia inu io me toe vau ki te koga tenei o asu vai.” 16  Ana muna ki a ia: “Fano o kalaga ki tau avaga ko o‵mai ei koulua ki konei.” 17  Ne tali atu te fafine: “E seai saku avaga.” Ne fai atu a Iesu ki a ia: “E tonu eiloa koe i au pati, ‘E seai saku avaga.’ 18  Me ko oti ne avaga koe ki tāgata e tokolima, a ko te tagata tenā e ‵nofo mo koe e se ko tau avaga. Ne faipati ‵tonu eiloa koe.” 19  Ne fai atu te fafine ki a ia: “Tou ‵malu, ko iloa nei ne au i a koe se pelofeta. 20  A omotou tupuga ne tapuaki i te mauga tenei; kae e fai mai koutou me ko Ielusalema te koga e ‵tau o tapuaki i ei a tino.” 21  Ne fai atu a Iesu ki a ia: “Talitonu mai ki a au, e toku fafine, Ka oko mai eiloa te itula ka se toe tapuaki ei a tino ki te Tamana i te mauga tenei io me ko Ielusalema. 22  E se iloa ne koutou a te tino telā e tapuaki koutou ki ei, kae e iloa ne matou, me i te fakaolataga ne kamata mai i tino Iutaia. 23  E tiga te feitu tenā, ka oko mai te itula, kae ko oko foki eiloa ki ei, ka tapuaki atu ei a tino tapuaki ‵tonu ki te Tamana i te agaga mo te munatonu, me e ‵sala eiloa te Tamana ki vaegā tino penā ke tapuaki atu ki a ia. 24  A te Atua se agaga, kae ko tino kolā e tapuaki ki a ia e ‵tau o tapuaki atu i te agaga mo te munatonu. 25  Ne fai atu te fafine ki a ia: “E iloa ne au i te Mesia e vau telā e taku ko Keliso. Kafai e oko mai a ia, ka folafola mai ne ia a mea katoa ki a matou.” 26  Ne fai atu a Iesu ki a ia: “Ko te tino tenā e faipati koe ki ei, ko ia tenā.” 27  Ne oko atu ana soko i te taimi eiloa tenā, kae ne ofo latou me i a ia e fai‵pati mo se fafine. Kae e seai eiloa se tino i a latou ne fai atu penei: “Se a te mea e ‵sala koe ki ei?” io me, “Kaia e faipati ei koe ki te fafine tenā?” 28  Ne tiaki ne te fafine tena fagu vai kae fano ki te fa‵kai o fai atu ki tāgata i ei: 29  “O‵mai o onoono ki te tagata telā ne fai mai ne ia ki a au a mea katoa kolā ne fai ne au. E mata, ko te Keliso tenei?” 30  Ne olo atu ei latou mai te fa‵kai ki a ia. 31  I te vaitaimi tenei ne fakamalosi atu ana soko ki a ia, olotou muna: “Te Faiakoga, na kai.” 32  Kae ne fai atu a ia ki a latou: “E isi ne aku meakai e kai ei au kolā e se iloa ne koutou.” 33  Ne fai‵pati ana soko i a latou eiloa: “E a, e isi se tino ne avatu ne ia ki ei ne meakai?” 34  Ne fai atu a Iesu ki a latou: “A taku meakai ko te faiga o te loto o ia telā ne uga mai ne ia au kae ke fakapalele foki tena galuega. 35  E a, e se fai mai koutou me e toe fa masina kae oko ki te taimi e tau ei a fuataga? Kiloke! Au e fai atu ki a koutou: ‵Kilo aka ki luga kae onoono atu ki fatoaga, me ko ‵kena aka eiloa i fuataga e ‵tau o tau. Ko oti 36  ne maua ne te tino tau fuataga a tena ‵togi kae ko ‵luku mai a fuataga mō te ola se-gata-mai, ko te mea ke fia‵fia fakatasi a te tino ‵toki mo te tino tau fuataga. 37  I te feitu tenei, ko tonu ei te faigamuna tenei, E tokotasi e ‵toki kae e tau ne te suā tino. 38  Ne uga atu ne au koutou ke tau a fuataga kolā ne seki ga‵lue eiloa koutou ki ei. Ne ga‵lue a nisi tino, kae maua ne koutou a mea aoga mai i olotou galuega.” 39  E tokouke a tino Samalia mai te fa‵kai tenā ne fakatuanaki ki a ia ona ko te molimau a te fafine telā ne fai atu ki a latou: “Ne fai mai ne ia ki a au a mea katoa kolā ne fai ne au.” 40  Tela la, i te oloatuga a tino Samalia ki a ia, fakamolemole atu ei ke nofo a ia i a latou; kae ne nofo atu a ia i konā i aso e lua. 41  Fakamuli ifo, ne tali‵tonu a nisi tino e tokouke ona ko ana pati kolā ne fai atu, 42  kae ne fai atu latou ki te fafine: “Ko se toe tali‵tonu matou ona ko tau tala; me ko oti eiloa ne lagona ne matou kae ko iloa ne matou mo te mautinoa me i te tagata tenei ko te fakaola o te lalolagi.” 43  I te otiga o aso e lua ne tiaki ei ne ia te koga tenā o fano ki Kalilaia. 44  Kae ne molimau mai a Iesu me e seai se pelofeta e fakaaloalogina i tena fenua tonu. 45  Tela la, i tena okoatuga ki Kalilaia, ne fakafetaui atu ki a ia a tino Kalilaia, me ko oti ne lavea ne latou a mea katoa kolā ne fai ne ia i Ielusalema i te taimi o te fakamanatuga, me ne ‵nofo foki latou i te fakamanatuga tenā. 46  Ne fanatu a ia ki Kana i Kalilaia, ko te koga telā ne ‵fuli ei ne ia a vai ki uaina. E isi se tavini a te tupu telā e masaki tena tama tagata i Kapanaumi. 47  I te logoga a te tagata tenei me ko oti ne fanatu a Iesu mai i Iuta ki Kalilaia, fanatu ei ki a ia o fakamolemole atu ke vau o faka‵lei aka tena tama, me ko pili eiloa o mate. 48  Kae ne fai atu a Iesu ki a ia: “E se mafai lele eiloa o tali‵tonu koutou, seiloga ke lavea ne koutou a galuega ‵mana mo mea fakaofoofogia.” 49  Ne fai atu te tavini a te tupu ki a ia: “Te Aliki, vau la koi tuai o mate taku tamaliki.” 50  Ne fai atu a Iesu ki a ia: “Fano la me ko ola tau tama.” Ne talitonu eiloa te tagata tenā ki pati a Iesu, fano ei a ia. 51  A koi fanatu a ia i tena auala ne fakafetaui atu ana pologa ki a ia o fakailoa atu me ko ola tena tamaliki. 52  Ne fesili atu a ia ki a latou me ko te itula fea ne ‵lei ei a ia. Olotou muna ki a ia: “Ko te aso anafi i te fitu* o itula ne ‵lei ei tena fiva.” 53  Tela la, ne iloa ne te tamana me tenā eiloa te itula ne fai atu ei a Iesu ki a ia: “Ko ola tau tama.” Ne talitonu ei a ia fakatasi mo tena kau fale kātoa. 54  Tenei eiloa te lua o galuega ‵mana ne fai ne Iesu i tena fanatuga mai i Iuta ki Kalilaia.

Fakamatalaga mai lalo

Ioa 4:6  E ‵pau mo te itula e 12 i te tutonu māfai e lau mai i te saeakaga o te la.
Ioa 4:52  E ‵pau mo te itula e 1 i te fakaafiafi māfai e lau mai i te saeakaga o te la.