Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Ioane 3:1-36

3  E isi se Falesaio e igoa ki a Nikotemo, se pule o tino Iutaia.  Ne fanatu a ia ki a Iesu i te po kae fai atu ki ei: “Te Faiakoga,* e iloa ne matou i a koe se faiakoga ne vau mai te Atua; me e seai se tino e mafai ne ia o fai a galuega ‵mana kolā e fai ne koe seiloga ke nofo i a ia te Atua.”  Ne tali atu a Iesu ki a ia: “Au e fai ‵tonu atu ki a koe, Kafai e se toe fanau mai* se tino, e se mafai o lavea ne ia a te Malo o te Atua.”  Muna a Nikotemo ki a ia: “E mafai pefea o toe fanau mai se tino telā ko matua? E se mafai o toe ulu a ia ki loto i te moegatama o tena mātua ke toe fanau mai i te lua o taimi, e tonu au?”  Ne tali atu a Iesu: “Au e fai ‵tonu atu ki a koe, Kafai e se toe fanau mai se tino i te vai mo te agaga, e se mafai o ulu atu ki te Malo o te Atua.  A te mea telā ne fanau mai i te foitino ko te foitino eiloa, a ko te mea telā ne fanau mai i te agaga ko te agaga eiloa.  Sa ofo i taku muna ne fai atu ki a koe, E ‵tau o toe fa‵nau mai a koutou katoa.  E agi te matagi ki te koga e manako ki ei, e lagona fua ne koe kae e se iloa ne koe me ne vau mai fea io me e fano ki fea. E penā foki a tino katoa kolā ko oti ne fa‵nau mai i te agaga.”  Ne tali atu a Nikotemo ki a ia: “E mafai la pefea o ‵tupu a mea konei?” 10  Ne tali atu a Iesu ki a ia: “A koe se faiakoga o Isalaelu kae e se iloa ne koe a mea konei? 11  Au e fai ‵tonu atu ki a koe, A mea kolā e iloa ne matou e faipati atu ne matou a ko mea kolā ne lavea ne matou e molimau atu matou ki ei, kae e se talia ne koutou te molimau telā e tuku atu ne matou. 12  Kafai e se tali‵tonu koutou ki mea faka-te-lalolagi kolā ko oti ne fai atu ne au ki a koutou, e mafai la pefea o tali‵tonu koutou māfai e fai atu ne au a mea faka-te-lagi? 13  E ui i ei, e seai se tino kai fanaka ki te lagi kae na ko ia fua telā ne fanaifo mai te lagi, ko te Tama a te tagata. 14  E pelā eiloa mo te sikiakaga ki luga ne Mose a te gata i te koga lavaki, e penā foki te Tama a te tagata, e ‵tau o siki aka ki luga, 15  ko te mea ke maua ne tino katoa kolā e tali‵tonu ki a ia a te ola se-gata-mai. 16  “Ona ko te lasi o te alofa o te Atua ki te lalolagi ne tuku mai ei ne ia tena Tama fagasele e tokotasi, ko te mea ke se fakaseai atu so se tino e fakatuanaki ki a ia kae ke maua ne ia te ola se-gata-mai. 17  Me ne seki uga mai ne te Atua a tena Tama ki te lalolagi o fakamasino a te lalolagi, kae o fakasao a te lalolagi e auala i a ia. 18  A te tino telā e fakatuanaki ki a ia e se fakamasinogina. A ko ia telā e se fakatuanaki ko oti ne fakamasinogina, me ne seki fakatuanaki a ia ki te igoa o te Tama fagasele e tokotasi a te Atua. 19  Tenei eiloa te fakavae o te fakamasinoga, me ko oti ne oko mai te mainaga ki te lalolagi. Kae e sili atu te ma‵nako o tino ki te pouliga i lō te mainaga, me e matagā olotou galuega. 20  Me ko ia telā e fai faeloa ne ia a mea ma‵sei e takalialia ki te mainaga kae se fia vau ki te mainaga, ko te mea ke mo a ma polopoloki a ia i ana galuega. 21  A ko ia telā e fai mea tonu e vau ki te mainaga, ko te mea ke fakaasi mai ana galuega ‵lei, kolā ne fai e ‵tusa mo te loto o te Atua.” 22  I te otiga o mea konei ne olo atu ei a Iesu mo ana soko ki te kogā fenua o Iuta, kae ne ‵nofo i konā i se taimi tai mata leva kae ne fai ne latou te papatisoga i ei. 23  Ne fai foki ne Ioane te papatisoga i Ainona i tafa o Salima, me ne uke ‵ki a vai i konā, kae ne solo atu faeloa a tino kae ne papatiso latou; 24  me ne seki ‵pei a Ioane ki te falepuipui i te taimi tenā. 25  Tela la, ne sae aka se kinauga i te va o soko o Ioane mo se tino Iutaia e uiga ki te faka‵maga. 26  Ne olo atu ei latou ki a Ioane kae fai atu ki a ia: “Te Faiakoga, a te tino telā ne ‵nofo mo koe i te Iolitana, telā ne molimau mai koe e uiga ki ei, e fai foki ne ia te papatisoga kae ko solo atu faeloa a tino ki a ia.” 27  Ne tali atu a Ioane: “E seai se mea e tasi e mafai o maua ne se tino seiloga ke tuku atu ki a ia a te mea tenā mai te lagi. 28  Ne molimau eiloa koutou ki aku pati, i a au e se ko te Keliso, a ko au ne uga mai ke mua atu i te tino tenā. 29  A te tamataene ka fakaipoipo ko te tino telā e a ia te tamafine ka fakaipoipo. Kae kafai e tu a te taugasoa o te tamataene ka fakaipoipo kae e lagona ne ia a tena leo, ka fiafia lasi eiloa a ia ona ko te leo o te tamataene ka fakaipoipo. Tela la, ko katoatoa ‵lei ei toku fiafia. 30  Ka tumau te tino tenā i te gasolo aka ki luga, kae e ‵tau o gasolo ifo au ki lalo.” 31  A ia telā e vau mai te lagi e sili atu i tino katoa. A te tino o te lalolagi e vau mai te lalolagi kae e faipati ki mea o te lalolagi. A ia telā e vau mai te lagi e sili atu i tino katoa. 32  E molimau a ia ki mea kolā ne lavea kae lagona ne ia, kae e seai se tino e talia ne ia tena molimau. 33  A te tino telā e talia ne ia tena molimau, e fakamaoni aka i ei me e tonu te Atua. 34  Me ko te tino telā ne uga mai ne te Atua e fai mai ne ia a muna a te Atua, me e se fakatapula ne ia te tukumaiga o tena agaga. 35  E alofa te Tamana ki te Tama kae ko oti ne tuku atu ki ana lima a mea katoa. 36  A ia telā e fakatuanaki ki te Tama e maua ne ia te ola se-gata-mai; a ia telā e se fakalogo ki te Tama ka se lavea ne ia te ola, kae ka tumau eiloa te kaitaua o te Atua i luga i a ia.

Fakamatalaga mai lalo

 Ke onoono ki te fakamatalaga mai lalo i te Mat 23:7.
 I te ‵gana Eleni, “fanau mai mai te lagi.”