Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Ioane 20:1-31

20  I te aso muamua o te vaiaso, ne alausu atu ei a Malia te Makatala o fano ki te tanuga, a koi tai pouli eiloa, kae ne lavea ne ia me ko oti ne ave keatea a te fatu mai te tanuga.  Ne tele atu a ia ki a Simona Petelu mo te suā soko telā ne alofa malosi a Iesu ki ei, kae fai atu ki a lāua: “Ko oti ne ave keatea ne latou te Aliki mai te tanuga, kae e se iloa ne tatou te koga ne tuku ei ne latou a ia.”  Ne olo atu a Petelu mo te suā soko ki te tanuga.  Ne kamata o ‵tele fakatasi atu a lāua, kae ne makini atu te suā soko i a Petelu, oko muamua atu ei a ia ki te tanuga.  Ne fatio atu a ia ki loto. Ne lavea ei ne ia a laugatu lino e tuku mai, kae ne seki fano a ia ki loto.  Ne oko atu a Simona Petelu mai i ana tua, kae ne ulu atu ki loto i te tanuga. Ne lavea ne ia a laugatu lino e tuku mai i ei.  A te laugatu telā ne pulou i tena ulu e se tuku fakatasi mo nisi laugatu, kae ko oti ne pelu kae tuku i se isi koga.  Ne ulu atu foki ki loto a te soko telā ne oko muamua ki te tanuga. Ne lavea ne ia kae talitonu foki a ia.  I te mea ne seki malamalama latou i Tusitusiga Tapu me e ‵tau o toetu mai a ia mai te mate. 10  Telā ne toe ‵foki ei a soko konā ki olotou kāiga. 11  Ne tu a Malia i tua i tafa o te tanuga, kae tagi i ei. A koi tagi a ia kae fatio ifo ki loto i te tanuga 12  kae ne lavea ne ia a agelu e tokolua e ‵pei ki gatu ‵kena, e saga‵saga i te koga ne takato ei te foitino o Iesu, e tokotasi i fogaulu kae e tokotasi i mulivae. 13  Kae ne fai atu lāua ki a ia: “Te fafine, kaia e tagi ei koe?” Ne fai atu a ia ki a lāua: “Ko oti ne ave ne latou toku Aliki keatea, kae e se iloa ne au te koga ne tuku ne latou a ia i ei.” 14  I te otiga o ana pati konā, mafuli aka tou fafine kae lavea ei ne ia a Iesu e tu mai, kae ne seki iloa ne ia me ko Iesu tenā. 15  Ne fai atu a Iesu ki a ia: “Toku fafine, kaia e tagi ei koe? Ko oi e ‵sala koe ki ei?” Ne leake tou fafine i a ia ko te tino faifatoaga, fai atu ei ki a ia: “Tou ‵malu, kafai ne ave keatea ne koe a ia, fakaasi mai la ki a au te koga ne tuku ne koe i ei, kae ka ave ne au a ia keatea.” 16  Ne fai atu a Iesu ki a ia: “Malia!” Ne toe mafuli aka tou fafine kae fai atu i te ‵gana Epelu: “Laponi!” (ko tena uiga “Te Faiakoga!”) 17  Ne fai atu a Iesu ki a ia: “Sa ‵piki mai ki a au, me i a au e seki fanaka ki te Tamana. Kae fano nei ki oku taina o fai atu ki a latou, ‘Au ka fanaka ki toku Tamana telā ko te otou Tamana foki, ki toku Atua telā ko te otou Atua foki.’” 18  Ne fanatu a Malia te Makatala o fakailoa atu a te tala tenā ki te kau soko: “Ko oti ne lavea ne au te Aliki!” Kae ne fai atu ne ia ki a latou a pati a Iesu. 19  I te afiafi o te aso tenā, ko te aso muamua o te vaiaso, ne ‵loka a mataloa o te kau soko ona ko te ma‵taku i tino Iutaia. Ne fanatu a Iesu, tu i tafa o latou kae fai atu: “Ke i luga i a koutou te filemu.” 20  I te otiga o ana pati, fakaasi atu ei ne ia ki a latou ana lima mo tena kaokao. Tenā ne fia‵fia malosi ei a soko i te laveaga ne latou a te Aliki. 21  Ne toe fai atu ei a Iesu ki a latou: “Ke i luga i a koutou te filemu. E pelā eiloa mo te Tamana ne uga mai ne ia au, ka uga atu foki ne au koutou.” 22  I te otiga o ana pati konei ne ‵pusi atu tena mānava ki a latou kae fai atu: “Ke talia ne koutou te agaga tapu. 23  Kafai e fakamagalo ne koutou a agasala a se tino ka fakamagalogina eiloa koutou; kafai e se fakamagalo ne koutou a agasala a se tino, e se fakamagalogina eiloa koutou. 24  Kae ko Toma, se tokotasi o te toko sefululua, telā ne taku ki te Masaga, ne seki nofo i konā i te taimi ne fanatu ei a Iesu. 25  Tela la, ne fai atu a nisi soko ki a ia: “Ko oti ne lavea ne matou te Aliki!” Kae ne fai atu a ia ki a latou: “E se talitonu eiloa au seiloga ke lavea ne au i ana lima a pūga o fao kae faulu toku maikao ki ei kae faulu atu foki toku lima ki tena kaokao.” 26  I te valu o aso mai tua ifo i ei, ne toe ‵nofo atu ana soko i loto i se fale fakatasi mo Toma. E ui eiloa ne ‵loka a mataloa, ne fanatu a Iesu, tu atu ei i tafa o latou, kae fai atu: “Ke i luga i a koutou te filemu.” 27  Fai atu ei a ia ki a Toma: “Tuku mai tou maikao ki konei, kae onoono ki oku lima, faulu tou lima ki toku kaokao, ke na talitonu kae fakagata te fakalotolotolua.” 28  Ne fai atu a Toma ki a ia: “Toku Aliki mo toku Atua!” 29  Ne fai atu a Iesu ki a ia: “E a, e talitonu koe me ko oti ne lavea ne koe au? E fia‵fia eiloa a tino kolā e se lavea ne latou kae e tali‵tonu. 30  Ne fai foki ne Iesu a galuega ‵mana e uke i mua o ana soko, kae kolā e se tusi i te peluga tusi tenei. 31  Kae ko oti ne tusi a mea konei ki lalo ko te mea ke tali‵tonu koutou i a Iesu ko te Keliso, te Tama a te Atua, kae ona ko te otou tali‵tonu ko maua ei ne koutou a te ola e auala i tena igoa.

Fakamatalaga mai lalo