Fanatu ki te fakasologa

Fanatu ki te lua o auala

Fanatu ki te fakasologa o mataupu

Molimau a Ieova

Tuvalu

Tusi Tapu i te Itaneti | NEW WORLD TRANSLATION (Ne `Lomi i te 1984)

Ioane 2:1-25

2  I te tolu o aso, ne fai ei te ‵kaiga o te fakaipoipoga i Kana i Kalilaia, kae ne nofo atu i konā te mātua o Iesu.  Ne ‵kami foki a Iesu mo ana soko ki te ‵kaiga o te fakaipoipoga.  I te taimi ne oti ei te uaina, fai atu ei te mātua o Iesu ki a ia: “Ko seai ne olotou uaina.”  Kae ne fai atu a Iesu ki a ia: “Kaia e ‵tau ei o manavase au ki ei e pelā foki mo koe?* E seki oko mai toku taimi.”  Ne fai atu tena mātua ki tavini: “Fai so se mea e fai atu ne ia ke fai.”  E isi ne fagu kele utu vai ‵lasi e ono e ‵tu i konā e ‵tusa mo tulafono a tino Iutaia e uiga ki te faka‵maga. Kāti e ‵tusa mo te fasefulu fa io me onosefulu ono lita i te fagu e tasi.*  Ne fai atu a Iesu ki a latou: “Faka‵fonu a fagu konā ki vai.” Ne faka‵fonu ei ne latou ke oko eiloa ki kaugutu.  Ne fai atu a ia ki a latou: “Asu ne vai mai i ei kae tuku atu ki te pule o te ‵kaiga.” Ne fai eiloa ne latou te mea tenā.  I te taimi ne tami ei te pule o te ‵kaiga ki te vai telā ko oti ne ‵fuli ki te uaina kae seki iloa ne ia me ne aumai mai fea, e tiga eiloa ne iloa ne tavini kolā ne asu mai ne latou te vai, ne kalaga atu te pule o te ‵kaiga ki te tamataene ka fakaipoipo 10  kae fai atu ki a ia: “A nisi tino katoa e fakasoa atu muamua ne latou te uaina ‵lei, kae kafai ko ko‵na a tino, ko fakasoa atu ei te uaina masei. Kae ne tausi ne koe te uaina ‵lei ki te taimi tenei.” 11  Ne fai ne Iesu a te mea tenei i Kana i Kalilaia e pelā me ko te kamataga o ana galuega ‵mana, kae ne fakaasi atu i ei tena ‵malu; kae ne fakatuanaki ana soko ki a ia. 12  I te otiga o te mea tenei, olo atu ei latou mo tena mātua mo ana taina mo ana soko ki Kapanaumi, kae ne seki ‵nofo leva latou i konā. 13  Ko pili o oko ki te paseka a te kau Iutaia, fanatu ei a Iesu ki Ielusalema. 14  Ne maua atu ne ia i te faletapu a tino e fakatau olotou pulumakau, mamoe mo lupe mo tino ‵fuli tupe e ‵nofo mai i ei. 15  Ne faite ne ia se ‵kini ki lopu, kae afuli ne ia a tino katoa mo olotou pulumakau mo mamoe ki tua mo te faletapu. Ne ‵ligi ne ia ki lalo a tupe siliva a tino ‵fuli tupe kae ‵tule atu olotou taipola ki lalo. 16  Kae ne fai atu a ia ki tino kolā e fakatau olotou lupe: “Ave keatea a mea konei mai konei! Sa fai ne koutou a te fale o toku Tamana mo fai se fale e fakatau ei a koloa!”* 17  Ne masaua ne ana soko a pati kolā ne tusi penei: “A toku loto finafinau mō tou fale e ‵ka eiloa e pelā me se afi.” 18  Ne fai atu a tino Iutaia ki a ia: “Se a te fakailoga e fakaasi mai ne koe ki a matou, ona ko mea konei e fai ne koe?” 19  Ne tali atu a Iesu ki a latou: “Lepe ki lalo te faletapu tenei, kae ka toe fakatu aka ne au i aso e tolu.” 20  Ne fai atu a tino Iutaia ki a ia: “A te faletapu tenei ne fakatu i tausaga e fasefulu ono, kae ka fakatu aka ne koe i aso e tolu?” 21  Kae ne faipati eiloa a ia ki te faletapu telā ko tena foitino. 22  I te taimi ne fakatu aka ei a ia mai te mate, ne masaua ne ana soko me ne faipati sale a ia ki te mea tenei; kae ne tali‵tonu latou ki Tusitusiga Tapu mo pati a Iesu kolā e fai sale atu. 23  Kae i tena nofoatuga i Ielusalema i te fakamanatuga o te Paseka, ne fakatuanaki a tino e tokouke ki tena igoa, me ne lavea ne latou a galuega ‵mana kolā ne fai ne ia. 24  Ne seki talitonu fua a Iesu ki a latou ona ko te mea ko iloa ne ia a latou katoa 25  kae e se manako foki a ia ke fai atu ne se tino se molimau e uiga ki se isi tino, me ko leva ne iloa ne ia a mea i te loto o te tino.

Fakamatalaga mai lalo

 I te ‵gana Eleni, “Te fafine, se a ‵ta fekau i ei?” se tugapati fakauiga; se fesili telā e fakaasi atu ei te sē fiafia.
 E ‵tusa mo te 12 ki te 17 kalone (44 lita ki te 66 lita) e mafai o utu ki fagu takitasi.
 Io me “fai pisinisi.”