Ioane 19:1-42

19  Tela la, ave ei ne Pilato a Iesu i te taimi tenā ke ‵kini.  Ne ‵fili ne sotia se foualiki ki mea makai‵kai kae fakafou atu ki tena ulu kae fakapei atu ki a ia se gatu violeta.  Ne olo sale atu latou ki a ia kae fai atu: “Talofa, te Tupu o tino Iutaia!” Ne laupāpā foki ne latou ana mata.  Ne toe foki atu a Pilato ki tua kae fai atu ki a latou: “Kiloke! Ko aumai ne au a ia ki tua i a koutou ko te mea ke iloa ne koutou me seai se mea ‵se ne maua ne au i a ia.”  Ne vau a Iesu ki tua, mo tena foualiki makai‵kai mo tena gatu violeta. Kae ne fai atu a Pilato ki a latou: “Kiloke! Tenei te tagata!”  Kae i te laveaga ne faitaulaga pule mo ofisa a ia, ne paka‵laga atu ei latou: “‵Tuki atu a ia ki te lakau! ‵Tuki atu a ia ki te lakau!” Ne fai atu a Pilato ki a latou: “Puke la ne koutou a ia kae ‵tuki atu ki te lakau, me e seai se mea ‵se ne maua ne au i a ia.”  Ne tali atu a tino Iutaia ki a ia: “E isi se motou tulafono, kae e ‵tusa mo te tulafono tenā e ‵tau o tamate a ia, me ne fai mai i a ia ko te tama a te Atua.”  I te lagonaga ne Pilato olotou pati, ne mataku malosi eiloa a ia.  Ne toe ulu atu a ia ki loto i te palesi o te kovana kae fai atu ki a Iesu: “A koe se tino mai fea?” Kae ne seki tali atu a Iesu ki a ia. 10  Fai atu ei a Pilato ki a ia: “A koe e se faipati mai ki a au? E se iloa ne koe me e isi saku pule o fakasaoloto koe kae e isi foki saku pule o ‵tuki koe ki te lakau?” 11  Ne tali atu a Iesu ki a ia: “E seai lele eiloa sau pule i luga i a au seiloga ko oti ne talia ke tuku atu te pule tenā ki a koe mai te lagi. Tenā te pogai e lasi atu ei te agasala a te tino telā ne tuku atu ne ia au ki a koe.” 12  Tenei te pogai ne salasala ei a Pilato ki se auala ke fakasaoloto a ia. Kae ne paka‵laga mai a tino Iutaia: “Kafai e fakasaoloto ne koe a te tagata tenei, a koe e sē se taugasoa o Kaisala. So se tino e fai mai i a ia se tupu e ‵teke ki a Kaisala.” 13  Tela la, i te lagonaga ne Pilato a pati konei, ne avatu ne ia a Iesu ki tua, kae ne sagasaga ki tena nofoga fakamasino i te koga telā e taku ko te Pae Fatu, kae i te ‵gana Epelu ko Kapata. 14  Ko te aso eiloa tenei e fakatoka ei mō te Paseka; kae kāti ko te ono o itula. Kae ne fai atu a ia ki tino Iutaia: “Kiloke! Tenei te otou tupu!” 15  Kae ne paka‵laga atu latou: “Ave keatea a ia! Ave keatea a ia! ‵Tuki atu a ia ki te lakau!” Ne fai atu a Pilato ki a latou: “E a, ka ‵tuki ne au ki te lakau te otou tupu?” Ne tali mai a faitaulaga pule: “E seai se motou tupu kae na ko Kaisala.” 16  I te taimi tenā ne tuku atu ne ia a Iesu ki a latou ke ‵tuki ki te lakau. Tenā ne ave ei ne latou a Iesu. 17  Ne amo eiloa ne ia te lakau fakasaua,* kae fanatu ki te koga e igoa ki a Gatiulupoko, telā ko Kolokota i te ‵gana Epelu: 18  ne ‵tuki ne latou a ia i te lakau i konā, fakatasi mo nisi tāgata e tokolua, e tokotasi i te feitu tenei kae tokotasi i te suā feitu, a ko Iesu i te kogaloto. 19  Ne tusi foki ne Pilato se faka‵pulaga kae faka‵piki atu ki luga i te lakau, e fai penei: “Iesu te Nasaleta, te Tupu o tino Iutaia.” 20  Ne fai‵tau a tino Iutaia e tokouke ki te faka‵pulaga tenei, me i te koga telā ne ‵tuki i ei a Iesu ki te lakau, e pili fua ki te fa‵kai. Ne tusi a pati konā i te ‵gana Epelu, te ‵gana Latina mo te ‵gana Eleni. 21  Kae ne fai atu a faitaulaga pule o tino Iutaia ki a Pilato: “Sa tusigina penei ‘Te Tupu o Tino Iutaia,’ kae tusi penei me ne fai mai a ia, ‘Au ko te tupu o Tino Iutaia.” 22  Ne tali atu a Pilato: “A te mea ko oti ne tusi ne au, tuku eiloa penā.” 23  I te otiga ne ‵tuki a Iesu ne sotia ki te lakau, ne puke ne latou tena gatu kae vaevae aka ki vaega e fa, ke tofu te sotia mo tena vaega. Ne puke foki ne latou tena gatu i loto. Kae ko tena gatu i loto e seai ne sokoga i ei me ne ‵laga eiloa mai luga ke oko ki lalo. 24  Ne fai aka ei latou ki a latou eiloa: “Ke se saesae ne tatou, kae ke fai ne tatou se vili me ko oi ka maua ne ia.” Ne fai penei ke fakataunu ei a pati i Tusitusiga Tapu: “Ne vaevae ne latou oku gatu i a latou, kae ne fai ne latou se vili ki toku gatu i loto.” Ne fai eiloa ne sotia a mea konei. 25  Kae ne ‵tu atu i tafa o te lakau fakasaua o Iesu a tena mātua, te taina o tena mātua, Malia te avaga a Kalopa, mo Malia te Makatala. 26  Tela la, i te laveaga ne Iesu a tena mātua mo te soko telā ne alofa a ia ki ei e ‵tu ‵pili mai, fai atu ei a ia ki tena mātua: “Te fafine, kiloke! Tenā tau tama!” 27  Ne fai atu foki a ia ki te soko tenā: “Kiloke! Tenā tou mātua!” Kae mai te itula eiloa tenā ne puke ei ne te soko a tou fafine ke nofo i tena fale. 28  Fakamuli ifo, ne iloa ne Iesu me ko oti ne fakataunu a mea katoa e ‵tusa mo Tusitusiga Tapu, fai atu ei a ia: “Au ko fia inu.” 29  Ne tu atu se fagu i konā telā e ‵fonu i uaina ‵kona. Ne puke ne latou se omomi telā e ‵fonu i te uaina ‵kona kae faka‵piki atu ki luga i se kaula o te isopo kae tuku atu ki tena gutu. 30  I te otiga ne tami ki te uaina ‵kona, ne fai aka ei a Iesu: “Ko oti ne fakataunu!” ne fakagaugau ifo tena ulu, gata ei tena mānava.* 31  Kae ona ko te Aso Fakatoka tenā, ne fakamolemole atu a tino Iutaia ki a Pilato ke fatifati a vae o latou konā kae ave keatea olotou foitino ko te mea ke seai se foitino e tautau i luga i se lakau i te Sapati, (me ko te Sapati sili tenā). 32  Ne olo atu ei a sotia kae ‵fati ne latou a vae o te tagata muamua mo vae o te suā tagata kolā ne ‵tuki foki ki lakau fakatasi mo Iesu. 33  Kae i te lotou okoatuga ki a Iesu, ne lavea atu ne latou i a ia ko leva ne mate, ne seki ‵fati ei ne latou ana vae. 34  E ui i ei, ne velo ne se sotia e tokotasi tena kaokao ki se tao, kae ne ‵sali fakavave mai ei ki tua a toto mo vai. 35  Kae ko ia telā ne lavea ne ia te mea tenā, ne fai mo fai se molimau, kae e tonu eiloa tena molimau, e iloa ne te tagata tenā me e ‵tonu eiloa ana pati, ko te mea ke tali‵tonu foki koutou. 36  E tonu, ne ‵tupu a mea konei ke fakataunu ei a muna i Tusitusiga Tapu: “Ka se fati eiloa sena ivi e tasi.” 37  Kae e fai mai penei te suā tusi faitau: “Ka salasala latou ki a Ia telā ne velo ne latou.” 38  I te otiga o mea konei, fakamolemole atu ei a Iosefa te Alimataia ki a Pilato ke ave ne ia te foitino o Iesu. A Iosefa se soko foki o Iesu, kae ona ko tena mataku i tino Iutaia ne seki fakaasi atu ne ia te mea tenei ki tino. Ne tuku atu ne Pilato te saolotoga ki a ia. Vau ei tou tagata o ave tena foitino keatea. 39  Ne vau foki a Nikotemo, te tagata telā ne fanatu ki a Iesu i te po i te taimi muamua, mo se pelugā mulo mo aloe, kāti e selau pauna te ‵mafa. 40  Tela la, ne puke ne lāua te foitino o Iesu kae fusi ne lāua ki laugatu lino mo mea ma‵nogi, e pelā eiloa mo te tuu masani a tino Iutaia i te fakatokaga o te foitino mō te tanuga. 41  E isi se fatoaga i te koga ne ‵tuki ei a ia ki te lakau, kae i loto i te fatoaga tenā e isi se tanuga fou telā e seai eiloa se tino kai tuku ki loto i ei. 42  Ona ko te Aso Fakatoka o tino Iutaia ne tuku ei ne latou a Iesu i te koga tenā me e pili mai fua te tanuga tenā.

Fakamatalaga mai lalo

Ioa 19:17  Ke onoono ki te Mataupu Fakaopoopo e 7.
Ioa 19:30  I te ‵gana Eleni, ko te “tuku atu o tena agaga.”