Ioane 18:1-40

18  I te otiga o ana pati konei, ne olo ei a Iesu mo ana soko i loto i te Vanu o Ketalono ki te koga telā e tu ei te fatoaga kae ne ulu atu a ia mo ana soko ki ei.  Ne iloa foki ne Iuta, telā ka fakatogafiti ne ia a Iesu, a te koga tenā, me ne fetaui sale i konā a Iesu mo ana soko.  Tela la, ne puke ne Iuta te kau sotia mo ofisa a faitaulaga pule mo Falesaio kae olo atu latou ki konā mo olotou lama mo moli mo meatau.  Ona ko te mea ko iloa ne Iesu a mea katoa ka ‵tupu ki a ia, ne tu atu tou tagata ki mua kae fai atu ki a latou: “Ko oi te tino e ‵sala koutou ki ei?”  Ne tali atu latou ki a ia: “Ko Iesu te Nasaleta.” Ana muna ki a latou: “Ko au tenei.” A ko Iuta, telā ka fakatogafiti ne ia a Iesu, ne ‵tu mai foki mo latou.  Kae i tena faiatuga ki a latou: “Ko au tenei,” ne ‵poi latou ki tua kae ‵siga ki lalo.  Ne toe fesili atu a ia ki a latou: “Ko oi te tino e ‵sala koutou ki ei?” Olotou muna: “Ko Iesu te Nasaleta.”  Ne tali atu a Iesu: “Ko oti au ne fai atu ki a koutou ko au tenei. Tela la, kafai e ‵sala mai koutou ki a au, tuku atu la a tino konei ke olo”;  Ne fai a te mea tenei ko te mea ke fakataunu ei ana pati konei: “A latou kolā ne tuku mai ne koe ki a au e seai eiloa se tino i a latou ne galo.” 10  A Simona Petelu telā e isi sena pelu, ne tata ne ia kae ‵kati ne ia te taliga fakaatamai o te pologa a te faitaulaga sili ke tō kea‵tea. A te igoa o te pologa tenā ko Maliko. 11  Kae ne fai atu a Iesu ki a Petelu: “Tuku te pelu ki tena tukuga. E a, ka se inu ne au a te ipu telā ne tuku mai ne te Tamana ki a au?” 12  Ne puke ne sotia mo takitaki kautau mo ofisa a te kau Iutaia a Iesu kae saisai ne latou a ia. 13  Ne ave muamua ne latou a ia ki a Anasa, me i a ia ko te tamana o te avaga a Kaiafa, telā ko te faitaulaga sili i te tausaga tenā. 14  A Kaiafa ko te tino telā ne fai atu ki tino Iutaia me ka aoga eiloa ki a latou ke mate se tino e tokotasi mō tino katoa. 15  Ne tau‵tali atu a Simona Petelu mo te suā soko i a Iesu. Ne masani a te faitaulaga sili mo te soko tenā, kae ne olo lāua mo Iesu ki loto i te koga ateatea o te faitaulaga sili 16  a ko Petelu ne tu i tua o te mataloa. Ne foki atu ki tua a te suā soko telā e masani mo te faitaulaga sili, kae faipati atu ki te tino e tausi i te mataloa, ke aumai ne ia a Petelu ki loto. 17  Ne fai atu a te tavini tamafine, telā ko te tausi mataloa, ki a Petelu: “A koe foki se soko o te tagata tenei?” Ne fai atu a ia: “Ikai.” 18  Ne tu‵tu atu a pologa mo ofisa i konā. Ne faka‵ka ne latou se afi ki malala ‵ka ke fakavelavela i ei latou i te mea ko ‵moko ‵ki eiloa. Kae ne tu atu foki a Petelu fakatasi mo latou i konā o fakavelavela i ei. 19  I te taimi tenā, ne fakafesili ei ne te faitaulaga pule a Iesu e uiga ki ana soko mo ana akoakoga. 20  Ne tali atu a Iesu ki a ia: “Au ne faipati atu i mua o tino katoa. Au ne akoako atu faeloa i sunako mo te faletapu, ko koga kolā ne maopoopo faeloa i ei a tino Iutaia, kae e seai ne aku pati ne fai ‵funa. 21  Kaia e fesili mai ei koe ki a au? Fesili atu ki tino kolā ne lagona ne latou aku pati ne fai ki a latou. Kiloke! Konei a tino e iloa ne latou aku pati ne fai.” 22  I te otiga o ana pati konā, ne ‵pa ei ana mata ne te ofisa e tokotasi telā ne tu atu i konā kae fai atu: “E mata, e ‵tau o faipati atu koe penā ki te faitaulaga pule?” 23  Ne tali atu a Iesu ki a ia: “Kafai e ‵se aku pati, fakamaoni mai la me kaia e ‵se i ei; kae kafai e ‵tonu aku pati, kaia la ne ‵pa ei ne koe au?” 24  Uga atu ei ne Anasa a ia ki a Kaiafa te faitaulaga sili. 25  Ne tu a Simona Petelu i konā o fakavelavela i ei. Fai atu ei latou ki a ia: “A koe foki se soko o te tino tenā?” Ne fakafiti tou tagata kae fai atu: “Ikai.” 26  Ne fai atu se tokotasi o pologa a te faitaulaga sili telā e kāiga mo te tagata telā ne ‵kati tena taliga ne Petelu: “E se ko koe telā ne lavea ne au e ‵nofo fakatasi mo ia i te fatoaga?” 27  Kae ne toe fakafiti foki ne Petelu. I konā foki loa ko te moa eiloa ko tagi. 28  Ne ‵taki atu ei ne latou a Iesu mai i a Kaiafa ki te palesi o te kovana i te tafataeao ‵malu. Kae ne seki ulu atu latou ki loto i te palesi o te kovana i a latou ma lai‵lai; ko te mea ke mafai o ‵kai latou i te Paseka. 29  Ne vau a Pilato ki tua kae fai atu ki a latou: “Ne a otou ‵losiga e uiga ki te tagata tenei?” 30  Ne tali atu latou ki a ia: “Moi fai a te tagata tenei e sē se tino fai mea ‵se, penei e se aumai ne matou a ia ki a koe.” 31  Ne fai atu a Pilato ki a latou: “Ave la kae fakamasino ne koutou e ‵tusa mo te otou tulafono.” Ne fai atu a tino Iutaia ki a ia: “E se saoloto i te tulafono ke tamate ne matou se tino. 32  Ne fai a te mea nei ke fakataunu ei a pati a Iesu kolā ne fai e uiga ki te vaegā mate telā ko pili o mate ei a ia. 33  Ne toe ulu a Pilato ki loto i te palesi, kalaga atu ki a Iesu, kae fai atu ki a ia: “A koe ko te tupu o tino Iutaia?” 34  Ne tali atu a Iesu: “E mata, i a koe eiloa a pati konā e fai mai, io me e isi ne tino ne fai atu ki a koe e uiga ki a au?” 35  Ne tali atu a Pilato: “E a, au se tino Iutaia? A koe ne aumai ne tou fenua tonu mo faitaulaga pule ki a au. Ne a au mea ne fai?” 36  Ne tali atu a Iesu: “A toku malo e sē se vaega o te lalolagi tenei. Moi fai a toku malo se vaega o te lalolagi tenei, penei ka taua atu oku tino ke mo a eiloa e tuku atu au ki tino Iutaia. Kae ko toku Malo e se mai i lalo nei. 37  Ne fai atu ei a Pilato ki a ia: “Ko tena uiga, a koe se tupu?” Ne tali atu a Iesu: “Tenā eiloa e fai mai ne koe i a au se tupu. Tenā te pogai ne fanau mai ei au, kae tenā foki te pogai ne vau ei au ki te lalolagi, ko te mea ke molimau atu au ki te munatonu. A tino katoa kolā e ‵kau ki te feitu o te munatonu, e faka‵logo ki toku leo.” 38  Ne fai atu a Pilato ki a ia: “Se a te munatonu?” Kae i te otiga o ana pati konei, fano ei a ia ki tua i tino Iutaia kae fai atu ki a latou: “E seai se mea ‵se ne maua ne au i a ia. 39  Kae e isi se tu a koutou ke fakasaoloto atu ne au se tagata ki a koutou i te taimi o te Paseka. Tela la, e ma‵nako koutou ke ‵tala atu ne au ki a koutou a te tupu o tino Iutaia?” 40  Ne toe paka‵laga mai latou: “E se ko te tagata tenā, kae ko Palapa!” A Palapa se tino kaisoa.

Fakamatalaga mai lalo